Degé Kangyur volume 101, F.28.b

ཆོས་འདི་དག་སྤོང་བར་འགྱུར་བའི་སེམས་ཅན་དེ་དག་ནི་ཕལ་ཆེར་རབ་ཏུ་བྱུང་བ་དག་འབྱུང་སྟེ། འདི་སྐད་དུ་འདི་དག་ནི་སྙན་དངགས་སྦྱར་བ་ཡིན་གྱི། འདི་དག་ནི་དེ་བཞིན་གཤེགས་པས་གསུངས་པ་མ་ཡིན་ནོ། །​འདི་དག་ནི་རང་བཟོར་བྱས་པ་ཡིན་ཏེ། མདོ་སྡེ་འདི་དག་ནི་སྔོན་ནམ་ཡང་མ་ཐོས་སོ་ཞེས་འཛེར་ཅིང་དེ་དག་ཆོས་ཀྱི་རྣམ་གྲངས་འདི་སྤོང་བར་འགྱུར་རོ། །​སྤངས་ནས་ཀྱང་མཐོལ་ཞིང་འཆགས་པར་མི་འགྱུར་ཏེ། དེ་དག་ཆོས་སྤངས་པས་འཆི་བའི་ཚེ་སེམས་ཅན་དམྱལ་བ་ཀུན་དུ་འབར་བ་མི་བཟད་པར་སྐྱེ་བར་འགྱུར་རོ། །​སྐྱེས་མ་ཐག་ཏུ་ལྕགས་ཀྱི་འཁོར་ལོས་མི་གཏི་མུག་པ་དེ་དག་གི་མགོ་བཅད་ནས་ས་ལ་ལྟུང་བར་འགྱུར་རོ། །​དེ་ལྟར་གྱུར་ནས་ཀྱང་བསྐལ་བ་མང་པོ་བསྐལ་པ་བརྒྱ་ཕྲག་མང་པོ་དང་། བསྐལ་པ་སྟོང་ཕྲག་མང་པོར་དམུས་ལོང་དུ་འགྱུར་རོ། །​གལ་ཏེ་བསྐལ་པ་བརྒྱ་དག་འདས་ནས་མིར་སྐྱེ་བར་གྱུར་ན་ཡང་ཚེ་རབས་ཐམས་ཅད་དུ་དམུས་ལོང་དུ་སྐྱེ་བར་འགྱུར་ཞིང་ལྕེ་མེད་པ་དང་། གདོང་ཕྱིན་ཕྱོགས་སུ་འདུག་པ་དང་། ལྟག་སྒུར་དང་། མཇིང་པ་ནུབ་པ་དང་། རྐང་གྱོལ་དང་། ང་རོ་ཁྱི་སྐད་ལྟ་བུ་དང་། རྟག་ཏུ་བཀྲེས་ཤིང་སྐོམ་པས་ཉེན་པ་དང་། ལུས་སྐམས་པ་དང་། ཁ་མནམ་པ་དང་། སེམས་ཅན་ཐམས་ཅད་ཀྱིས་མཐོང་ངམ་ཐོས་ན་ཡིད་དུ་མི་འོང་བར་སྐྱེ་བར་འགྱུར་རོ། །​དེ་ནས་ཐམས་ཅད་དང་ལྡན་པའི་འཁོར་དེས་མགྲིན་གཅིག་ཏུ་ཚིག་སྨྲས་པ། བཅོམ་ལྡན་འདས་མ་འཚལ་བ་བདག་ཅག་གིས་མདོ་སྡེ་འདི་ལྟ་བུ་དག་སྤངས་པ་དང་། ཆོས་སྨྲ་བ་དེ་དག་ལ་ཁྲོས་པའི་སེམས་ཀྱིས་བལྟས་པར་གྱུར་པ་རྣམས་ནོངས་པ་ལ་ནོངས་པར་འཆགས་སོ། །​བཅོམ་ལྡན་འདས་བདག་ཅག་ཇི་ལྟར་བྱིས་པར་གྱུར་པ་དང་། ཇི་ལྟར་རྨོངས་པར་གྱུར་པ་དང་། ཇི་ལྟར་ཤེས་རབ་འཆལ་བར་གྱུར་པ་དང་། ཇི་ལྟར་བློ་ཆུང་བར་གྱུར་པ་རྣམས་འཆགས་ཤིང་མཆིས་ན་སངས་རྒྱས་བཅོམ་ལྡན་འདས་རྣམས་དགོངས་སུ་གསོལ། དེ་ནས་ཉན་ཐོས་ཆེན་པོ་དེ་དག་དང་། བརྒྱ་བྱིན་དང་། ཚངས་པ་དང་། འཇིག་



The English translation of this folio by 84000 Translating the words of the Buddha can be found at:
https://read.84000.co/translation/toh847.html?part=UT22084-057-004-2665#UT22084-057-004-2665