ཚེ་དང་ལྡན་པ་ག་ཡཱ་འོད་སྲུང་དང་། ཚེ་དང་ལྡན་པ་གསུས་པོ་ཆེ་དང་། ཚེ་དང་ལྡན་པ་ལམ་ཕྲན་བསྟན་དང་། ཚེ་དང་ལྡན་པ་ནམ་གྲུ་དང་། ཚེ་དང་ལྡན་པ་ཆུ་ཀླུང་འོད་སྲུང་དང་། ཚེ་དང་ལྡན་པ་ལྟེང་རྒྱས་འོད་སྲུང་དང་། ཚེ་དང་ལྡན་པ་བྱམས་མའི་བུ་གང་པོ་དང་། ཚེ་དང་ལྡན་པ་སྒྲ་གཅན་ཟིན་དང་། ཚེ་དང་ལྡན་པ་བཟང་སྐྱོང་དང་། ཚེ་དང་ལྡན་པ་རླངས་པ་དང་། ཚེ་དང་ལྡན་པ་ཀུན་དགའ་བོ་དང་། དེ་དག་དང་ཉན་ཐོས་ཆེན་པོ་གཞན་དག་དང་། གྲགས་འཛིན་ལ་སོགས་པ་དགེ་སློང་མ་ལྔ་བརྒྱ་ཡང་འདུས་པར་གྱུར་ཏོ། །ཁམས་ཀྱི་རྒྱལ་པོ་དང་། སྟོབས་ཀྱི་འཁོར་ལོས་སྒྱུར་བ་དག་ཀྱང་འདུས་པར་གྱུར་ཏོ། །རྒྱལ་རིགས་དང་བྲམ་ཟེ་དང་ཁྱིམ་བདག་གི་འཁོར་དག་ཀྱང་འདུས་པར་གྱུར་ཏོ། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་དེང་འདི་ལྟར་འཁོར་ཆེན་པོ་འདུས་པ་འདི་སུའི་མཐུ་ལགས། དེ་ཇི་ལྟར་འཚལ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཚེ་དང་ལྡན་པ་ཤ་ར་དྭ་ཏིའི་བུ་འདི་ནི་དཀོན་མཆོག་ཏ་ལ་ལའི་གཟུངས་ཀྱི་མཐུ་ཡིན་ནོ། །ཤ་ར་དྭ་ཏིའི་བུས་གསོལ་བ། བཅོམ་ལྡན་འདས་དཀོན་མཆོག་ཏ་ལ་ལའི་གཟུངས་མཉན་པར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། ཤ་ར་དྭ་ཏིའི་བུ་སོང་ལ་འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོ་ལ་གསོལ་བ་ཐོབ་ཤིག །དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་ཏིང་ངེ་འཛིན་རིན་པོ་ཆེ་བསྟན་པ་དཀོན་མཆོག་ཏ་ལ་ལ་འདི་ཤོད་ཅིག །འཇམ་དཔལ་གྱིས་སྨྲས་པ། བཙུན་པ་ཤ་ར་དྭ་ཏིའི་བུ་དཀོན་མཆོག་ཏ་ལ་ལའི་གཟུངས་ཉན་པར་འགྱུར་བ་སུ་ཡིན། ཤ་ར་དྭ་ཏིའི་བུས་སྨྲས་པ། འཁོར་བཞི་འདུས་པ་འདི་དག་དང་བརྒྱ་བྱིན་དང་ཚངས་པ་དང་འཇིག་རྟེན་སྐྱོང་བ་རྣམས་འདུས་པ་འདི་དག་སྟེ། ཁོ་བོ་ཡང་ཉན་པའི་ཕྱིར་འོངས་སོ། །དེ་ནས་འཇམ་དཔལ་གཞོན་ནུར་གྱུར་པས་གནས་བརྟན་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ།