Degé Kangyur volume 101, F.19.a

།ཚེ་ཉིད་འདི་ན་ཡོད་ཀྱི་གཞན་མེད་པ། །​དེ་ལ་བྱང་ཆུབ་སེམས་དཔའ་སྦྱོར་བར་བྱེད། །​འདི་ནི་མི་ལྡོག་རྣམས་ཀྱི་བསྟན་པ་ཡིན། །​ཚད་མེད་གཞལ་ཡས་བསམ་གྱིས་མི་ཁྱབ་པའི། །​སངས་རྒྱས་རྣམས་དང་ཕྲད་གྱུར་ཅི་འདྲ་བ། །​བྱང་ཆུབ་སེམས་དཔའ་དེ་ལ་སྟོན་པར་བྱེད། །​འདི་ནི་མི་ལྡོག་རྣམས་ཀྱི་བསྟན་པ་ཡིན། །​ཏིང་འཛིན་གང་དག་ཇི་སྙེད་ཡོད་པ་དང་། །​དེ་བཞིན་ཏིང་འཛིན་རྒྱུད་ཀྱི་རྣམ་པ་དག །​དེ་དག་བདེ་གཤེགས་སྲས་ལ་རྗོད་པར་བྱེད། །​འདི་ནི་མི་ལྡོག་རྣམས་ཀྱི་བསྟན་པ་ཡིན། །​འཁོར་བའི་འཁོར་ལོ་རྣམ་པར་ཟློག་པ་དང་། །​དམ་པའི་ཆོས་ཀྱི་འཁོར་ལོ་རབ་བསྐོར་བ། །​འཇིག་རྟེན་ཀུན་གྱིས་རྟག་ཏུ་མ་བསྐོར་བ། །​བྱང་ཆུབ་སེམས་དཔའ་རྣམས་ལ་དེ་བསྟན་བྱ། །​ཤིན་དུ་སྡུག་བསྔལ་འཇིག་རྟེན་ཐམས་ཅད་དང་། །​ངན་སོང་ས་རྣམས་དག་ཏུ་གནོད་གྱུར་པའི། །​གནས་དང་སྐྱབས་དང་དཔུང་གཉེན་གྱུར་པ་དེ། །​བྱང་ཆུབ་སེམས་དཔའ་རྣམས་ལ་བསྟན་པར་བྱ། །​གང་ཞིག་བྱང་ཆུབ་དོན་དུ་སེམས་འཇོག་པ། །​དེ་ནི་དང་པོའི་བྱང་ཆུབ་སེམས་དཔར་བསྟན། །​བསླབ་པའི་གདམས་ངག་ཇི་བཞིན་ངེས་བྱས་པ། །​ཇི་བཞིན་རྣམ་པར་གཞག་འདི་དེ་ཡི་ཡིན། །​ནད་བྲལ་རྣམས་ཀྱི་བསྟན་པ་ཇི་བཞིན་དུ། །​འཇིག་རྟེན་ཀུན་ལ་ཕན་པ་བྱ་བའི་ཕྱིར། །​དེ་ལྟར་ཐོག་མ་སུ་ཞིག་སེམས་བསྐྱེད་པ། །​འདི་ནི་གཉིས་ཏེ་དང་པོའི་ལས་ཅན་ནོ། །​ཕན་པ་ཐོབ་བྱེད་སེམས་དང་རབ་དང་བདེ། །​གཉེན་དང་སྡུག་དང་དེ་བཞིན་སྡུད་སེམས་དང་། །​ཀུན་དུ་བསྲུང་བའི་སེམས་དང་སྙོམས་པའི་སེམས། །​སློབ་དཔོན་སེམས་དང་སྙོམས་པར་སྟོན་པའི་སེམས། །​དེ་འདྲ་དག་ལ་སེམས་གནས་གྱུར་པ་དེ། །​ལུང་ནོད་ཁ་ཏོན་བྱེད་པར་སྦྱར་བར་བྱ། །​མང་དུ་ཐོས་ནས་དགོན་པར་གནས་སུ་གཞུག །​དབེན་པར་གྱུར་ནས་དགེ་བཤེས་སྟེན་དུ་གཞུག །​དགེ་བཤེས་རྣམས་ལ་བཀའ་བློ་བདེ་བར་བྱ། །​དུས་ཚོད་ཤེས་ལ་ཤེས་བཞིན་ལྡན་པར་བྱ། །​དུས་ཤེས་གྱུར་ནས་ཤིན་ཏུ་འཇིགས་མེད་བྱ། །​འཇིགས་པ་མེད་ནས་དོན་ལ་བརྩོན་པར་བྱ།