Degé Kangyur volume 101, F.11.b

ཕྱིར་ཞེ་ན། འདི་ལྟར་སེམས་བསྐྱེད་མ་ཐག་པ་དེ་ཉིད་ཀྱིས་ཤས་ཆེར་སངས་རྒྱས་ཀྱི་ཆོས་ཐམས་ཅད་ལ་མངོན་པར་བརྩོན་པར་བྱེད་ཅིང་གོང་དུ་གནས་གང་དག་ཐོབ་པའི་གནས་དེ་དག་ལ་ཡང་བདག་ཉིད་སྦྱོར་གྱི་གཞན་གྱི་དྲིང་ལ་མི་འཇོག་པ་ཐོབ་པའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་ལས་དང་པོ་པའི་བྱང་ཆུབ་སེམས་དཔའ་རྣམ་པར་གཞག་པའོ། །​ཀྱེ་རྒྱལ་བའི་སྲས་དག་དེ་ལ་རྣལ་འབྱོར་སྤྱོད་པའི་བྱང་ཆུབ་སེམས་དཔའ་རྣམ་པར་གཞག་པ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་རྣལ་འབྱོར་སྤྱོད་པའི་བྱང་ཆུབ་སེམས་དཔའ་ནི་དམིགས་པ་རྣམ་པ་བཅུས་ཆོས་རྣམས་རྟོགས་པར་བྱེད་དེ། བཅུ་གང་ཞེ་ན། འདི་ལྟ་སྟེ། ཆོས་ཐམས་ཅད་ལ་མི་རྟག་པ་ཉིད་དུ་རྟོགས་པར་བྱེད་པ་དང་། ཆོས་ཐམས་ཅད་ལ་སྡུག་བསྔལ་བ་ཉིད་དང་། བདག་མེད་པ་ཉིད་དང་། སྟོང་པ་ཉིད་དང་། གཡོ་བ་མེད་པ་ཉིད་དང་། དབུགས་འབྱིན་པ་མེད་པ་ཉིད་དང་། གནས་མེད་པ་ཉིད་དང་། རྣམ་པར་རྟོག་པ་མེད་པ་ཉིད་དང་། རྩོལ་བ་མེད་པ་ཉིད་དང་། མངོན་པར་འདུ་བྱེད་པ་མེད་པ་ཉིད་དུ་རྟོགས་པར་བྱེད་དེ། ཆོས་ཀྱི་རྗེས་སུ་འབྲང་བར་གྱུར་པའི་ཕྱིར་སྦྱོར་བར་མི་བྱེད། མི་སྦྱོར་བར་ཡང་མི་བྱེད་དེ། ཀྱེ་རྒྱལ་བའི་སྲས་དག་འདི་ནི་རྣལ་འབྱོར་སྤྱོད་པའི་བྱང་ཆུབ་སེམས་དཔའོ། །​ཀྱེ་རྒྱལ་བའི་སྲས་དག་རྣལ་འབྱོར་སྤྱོད་པའི་བྱང་ཆུབ་སེམས་དཔའ་དེ་ནི་སེམས་ཅན་གྱི་ཁམས་བརྟག་པ་ལ་སྦྱར་བར་བྱའོ། །​ཆོས་ཀྱི་དབྱིངས་བརྟག་པ་ལ་སྦྱར་བར་བྱའོ། །​འཇིག་རྟེན་གྱི་ཁམས་བརྟག་པ་ལ་སྦྱར་བར་བྱའོ། །​སའི་ཁམས་བརྟག་པ་ལ་སྦྱར་བར་བྱའོ། །​ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་བརྟག་པ་ལ་སྦྱར་བར་བྱའོ། །​དེ་ཅིའི་ཕྱིར་ཞེ་ན། འདི་ལྟར་དེ་ནི་ཤས་ཆེར་ཆོས་རྣམས་ལ་སྣང་བ་འཇུག་ཅིང་གོང་དུ་གནས་གང་དག་ཐོས་པའི་གནས་དེ་དག་ལ་ཡང་བདག་ཉིད་སྦྱོར་གྱི་གཞན་གྱི་དྲིང་ལ་མི་འཇོག་པ་ཐོབ་པའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་རྣལ་འབྱོར་སྤྱོད་པའི་བྱང་ཆུབ་སེམས་དཔའ་



The English translation of this folio by 84000 Translating the words of the Buddha can be found at:
https://read.84000.co/translation/toh847.html?part=UT22084-057-004-2599#UT22084-057-004-2599