གལ་ཏེ་མ་འོངས་ན་ངེས་པར་འཆི་བར་འགྱུར་རོ། །འདིས་བརྒྱ་བྱིན་མངག་གཞུག་པར་འགྱུར་ཞིང་པང་ན་གནས་པ་བླངས་ཏེ་སྟེར་བར་བྱེད་དོ། །གལ་ཏེ་མ་འོངས་ན་སྤྱི་བོ་འགས་ཞིང་དུམ་བུ་བརྒྱར་འཇིག་ལ་རང་གི་རིགས་རྒྱུད་རྣམས་བརླག་པར་འགྱུར་རོ། །གཞོན་ནུ་མནན་ནས་སྟོང་ཕྲག་བརྒྱད་བཟླས་ན་ཉི་མ་བདུན་ན་མྱུར་དུ་འོང་སྟེ། གཞོན་ནུ་མངག་གཞུག་པར་འགྱུར་རོ། །གཞོན་ནུའི་གདོན་ཐམས་ཅད་བྲན་དུ་འགྱུར་ཞིང་ཆེ་གེ་མོ་འཚོ་བར་གྱིས་ཤིག །ཆེ་གེ་མོ་སོད་ཅིག་ཅེས་སྨྲས་ན་དེ་དག་ཐམས་ཅད་བྱེད་དོ། །ཚོགས་ཀྱི་བདག་པོ་མནན་ཏེ། སྟོང་ཕྲག་བརྒྱད་བཟླས་ན་ཉི་མ་བདུན་ན་མྱུར་དུ་འོང་སྟེ། གལ་ཏེ་མ་འོངས་ན་རིགས་རྒྱུད་བརླག་ཅིང་འཆི་བར་འགྱུར་རོ། །ལོག་འདྲེན་ཐམས་ཅད་མངག་གཞུག་མར་འགྱུར་རོ། །ཉི་མ་རྐང་པ་གཡོན་པས་མནན་ཏེ་བརྒྱད་སྟོང་བཟླས་ན་ཉི་མ་བདུན་ན་མྱུར་དུ་འོང་སྟེ་རྒྱལ་སྲིད་སྟེར་རོ། །གལ་ཏེ་མ་འོངས་ན་འཆི་བའམ་རང་གི་བརྒྱུད་བརླག་པར་འགྱུར་རོ། །ཟླ་བ་མནན་ཏེ་བརྒྱད་སྟོང་བཟླས་ན་ཉི་མ་བདུན་ན་མྱུར་དུ་འོང་ཞིང་མངག་གཞུག་པར་འགྱུར་ལ་གསེར་སྲང་བརྒྱ་སྟེར་རོ། །གལ་ཏེ་མ་འོངས་ན་སྤྱི་བོ་འགས་ཤིང་བསྐམས་ཏེ་འཆི་བར་འགྱུར་རོ། །རང་གི་རིགས་དང་རྒྱུད་ཕུང་བར་ཡང་འགྱུར་རོ། །འདི་ནི་ཟླ་བ་འཁོར་དུ་བསྒྲུབ་པར་བཤད་པའོ། །འཇིག་བྱེད་རྐང་པ་གཡོན་པས་མནན་ཏེ། ཉི་མ་བདུན་དུ་སྟོང་ཕྲག་བརྒྱད་བཟླས་ནས་ཡང་མཚན་མོ་མཆོད་པ་ཆེན་པོ་བྱས་ཏེ། ཤ་ཆེན་པོས་མཆོད་པ་བྱས་ནས་ཤ་ཆེན་པོའི་གཏོར་མ་བྱས་ཏེ་ཤ་ཆེན་པོ་ཉིད་དང་ཏིལ་གྱིས་མར་མེ་རབ་ཏུ་སྦར་ཏེ། ནམ་ཕྱེད་ན་སྒྲ་ཆེན་པོ་བྱུང་སྟེ་དྲག་དུ་རྒོད་ཅིང་བསྡད་ནས། ཀྱེ་སྐྱེས་བུ་ཆེན་པོ་འདི་བཟའ་ཡིས་སློངས་ཤིག་ཅེས་ཟེར་རོ། །དེས་སྐྲག་པར་མི་བྱའོ་སྟེ། གལ་ཏེ་སྐྲག་པར་གྱུར་ན་ཡི་གེ་ཧཱུྃ་བཟླས་ན་བདེ་བར་གནས་པར་འགྱུར་རོ། །འཇིགས་བྱེད་འཁོར་དང་བཅས་པ་བྲན་དུ་འགྱུར་རོ། །ཁམས་གསུམ་པའི་རྒྱལ་སྲིད་སྟེར་ཞིང་ཡི་གེ་ཧཱུྃ་བཟླས་པ་ཙམ་གྱིས་འཇིག་རྟེན་པའི་ལྷ་ཐམས་ཅད་འཇོམས་སོ། །གར་གྱི་དབང་ཕྱུག་རྐང་པ་གཡོན་པས་མནན་ཏེ། ཉི་མ་བདུན་དུ་བརྒྱད་སྟོང་བཟླས་ན་སྐད་ཅིག་དེ་ལ་འོང་ཞིང་མངག་གཞུག་པར་འགྱུར་རོ།