།ཁྲོ་བོ་ཡི་ནི་གཡོན་ལོགས་སུ། །ལྷ་མོ་ཨུ་མ་བྲི་བར་བྱ། །ཁྲོ་བོ་ཡི་ནི་མདུན་ཉིད་དུ། །དཔལ་གྱི་ལྷ་མོ་བྲི་བར་བྱ། །ལག་པ་མེ་ཏོག་ཐོགས་པའོ། །ཁྲོ་བོ་ཡི་ནི་གཡས་ལོགས་སུ། །རྒྱན་ཀུན་གྱིས་ནི་བརྒྱན་བྱས་ཤིང་། །ལག་པ་ན་ནི་སྤོས་ཐོགས་པའི། །ཐིག་ལེ་མཆོག་ནི་ལེགས་པར་བྲི། །ཁྲོ་བོ་ཡི་ནི་རྒྱབ་ཀྱི་ཆར། །ལྷ་ཡི་རྣ་ཆས་བརྒྱན་པ་ཡི། །ལག་ན་མར་མེ་ཐོགས་པར་ནི། །ཟླ་བའི་ལྷ་མོ་བྲི་བར་བྱ། །ལྷ་ཡི་རྣ་ཆས་བརྒྱན་པ་ཡི། །ལག་ན་དྲི་ཡི་སྣོད་ཐོགས་པ། །རིན་ཆེན་རྒྱན་གྱིས་བརྒྱན་པ་ཡི། །ལྷ་མོ་མེ་ཡི་གྲྭ་རུ་བྲི། །གླུ་དང་སྙན་དངགས་མང་སྨྲ་བའི། །ཚིག་དབང་ལྷ་མོ་སྲིན་པོར་བྲི། །གནོད་སྦྱིན་ཀུན་གྱི་དབང་ཕྱུག་མ། །སྡུ་གུ་མཛེས་མ་ཞེས་གྲགས་པ། །ལག་ན་རིན་ཆེན་ཕྲེང་ཐོགས་པ། །རླུང་གི་གྲྭར་ནི་བྲི་བར་བྱ། །འབྱུང་པོ་ཀུན་གྱི་དབང་ཕྱུག་རྒྱལ། །མི་འབྱུང་ཞེས་བྱའི་འབྱུང་མོ་ནི། །རྒྱན་རྣམས་ཀུན་གྱིས་བརྒྱན་པ་རུ། །དབང་ལྡན་གྲྭ་རུ་བྲི་བར་བྱ། །བཞིན་བཟངས་མིག་གི་དཀྱུས་རིང་ཞིང་། །གཟུགས་དང་ལང་ཚོས་བརྒྱན་པ་ལ། །མདོག་ནི་གསེར་དང་འདྲ་བ་སྟེ། །སྐྲ་ནི་མཐོན་མཐིང་འཁྱིལ་པ་ལ། །ཡན་ལག་ཀུན་མཛེས་ལྷ་མོ་ནི། །སྒྲུབ་པའི་རིགས་ལ་དགའ་རྣམས་སོ། །བརྒྱ་བྱིན་ཤར་དུ་བྲི་བྱ་སྟེ། །མེ་ནི་མེ་རུ་ལེགས་པར་བྲིས། །ལྷོར་ནི་གཤིན་རྗེའི་རྒྱལ་པོ་སྟེ། །སྲིན་པོའི་བདག་པོ་བདེན་བྲལ་དུ། །ནུབ་ཏུ་ཆུ་ཡི་རྒྱལ་པོའོ། །རླུང་དུ་རླུང་གི་ལྷ་ཉིད་དོ། །བྱང་དུ་ལུས་ངན་རྒྱལ་པོ་བདག །དབང་ལྡན་ཟླ་བ་བྲི་བྱ་སྟེ། །རང་རང་གནས་སུ་དགོད་པར་བྱ། །དེ་ནས་དཀྱིལ་འཁོར་དུ་འཇུག་པའི་ཆོ་ག་བཤད་པར་བྱ་སྟེ། རྡོ་རྗེ་སློབ་དཔོན་བདག་ཉིད་གཙུག་ཏོར་སྔོན་པོ་བཅིངས་ཏེ། རས་སྔོན་པོ་ཟུང་གཅིག་བགོས་ནས། རྡོ་རྗེ་གསོར་ཞིང་འདི་སྐད་ཅེས་བརྗོད་དོ། །སེམས་ཅན་ཀུན་ལ་ཕན་དོན་དུ། །མྱུར་དུ་དངོས་གྲུབ་སྦྱིན་མཛད་པ། །གྲུབ་པའི་རྡོ་རྗེ་ཁྲོ་བོ་ཆེ། །ལྷ་ཉིད་དམ་ཚིག་ལ་བཞུགས་ཤིག །དེ་ནས་དཔལ་ཁྲོ་བོ་ཆེན་པོ་ལྷ་ཉིད་དམ་ཚིག་ལ་བཞུགས་ཤིག་ཅེས་བརྗོད་དོ།