Degé Kangyur volume 94, F.216.b

གསུམ་པའོ།​། །​།དེ་ནས་རིག་སྔགས་ཀྱི་སྦྱོར་བ་གནོན་པར་བྱེད་པའི་འཁོར་ལོ་ནི་ཡུང་བའི་ཁུ་བས་གཡམ་པའམ། ལྷང་ཚེར་མ་གཉིས་གང་ཡང་རུང་བ་ལ་འཁོར་ལོ་བྲིས་ཏེ། ལིང་ཚེ་དགུ་པ་ཕྱི་ནང་དང་བཅས་པ་བྲིའོ། །​སྔགས་དགོད་པ་ནི། དབུས་སུ་ཝ་སྭཱ་སྟཾ་བྷ་ཡ་སྟཾ་བྷ་ཡ་ཧཱ། འཁོར་ལོ་ནང་མ་ལ། ཝ་ཝ་ཝ་ཝ་ཝ་ཝ་ཝ་ཝ། ཞེས་བྱ་བ་བྲིའོ། །​ཕྱི་མ་ལ། ཝ་ཨོཾ་ཝ། ཝ་ཏཱ་ཝ། ཝ་རེ་ཝ། ཝ་ཏུཏ་ཝ། ཝ་ཏཱ་ཝ། ཝ་རེ་ཝ། ཝ་ཏུ་ཝ། ཝ་རེ་ཝ། ཞེས་བྱ་བ་བྲིས་ཏེ་ཕན་ཚུན་གཡས་གཡོན་དུ་འཁོར་ལོ་རེ་རེ་སྦས་ན་གནོན་པར་འགྱུར་རོ། །​རིག་སྔགས་ཀྱི་སྦྱོར་བ་གནོན་པའི་ལེའུ་སྟེ་སུམ་ཅུ་རྩ་བཞི་པའོ།​། །​།དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འཇམ་དཔལ་གཞོན་ནུས་མེ་ཏོག་མན་དཱ་ར་བ་དང་པདྨ་དང་། ཀུ་མུ་ད་ལ་སོགས་པ་བསམ་གྱིས་མི་ཁྱབ་པས་བཅོམ་ལྡན་འདས་ལ་གཏོར་ཏོ། །​ལྷ་རྫས་ཀྱི་རོལ་མོའི་སྒྲ་དུ་མ་ཡང་བསྒྲགས་སོ། །​དེ་ནས་བཅོམ་ལྡན་འདས་ལ་གསོལ་པ། དམ་ཚིག་ཀྱང་གང་གིས་འགྲུབ་པར་འགྱུར་ཞེས་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། སོ་སོའི་དམ་ཚིག་སྡོམ་གནས་ཏེ། །​ལྷ་ཡི་འཁོར་ལོ་དང་ལྡན་པས། །​སྲོག་ཆགས་དག་ནི་གསད་པ་སྤངས། །​མ་བྱིན་བླང་བར་མི་བྱ་ཞིང་། །​བུད་མེད་མི་བསྟེན་སྨད་མི་བྱ། །​བརྫུན་ནི་རྣམ་པ་ཀུན་ཏུ་སྤང་། །​མྱོས་འགྱུར་དག་དང་ཤ་དག་དང་། །​རྐུ་ཞིང་རྣམ་པ་རྟག་ཏུ་སྤང་། །​མོ་རྣམས་ཐམས་ཅད་ཀུན་ལ་ནི། །​ཆགས་པའི་སེམས་ནི་སྤང་བ་སྟེ། །​མ་བཞིན་དུ་ནི་ཀུན་ལ་ནི། །​ཕན་པའི་སེམས་ཀྱིས་ཀུན་ལ་བཀུར། །​དམ་ཚིག་སྡོམ་ལ་གནས་པ་ཡིས། །​ལས་རྣམས་ཀུན་ལ་མཐུ་ཡོད་འགྱུར། །​ཞེས་བཅོམ་ལྡན་འདས་ཀྱིས་གསུངས་སོ། །​དམ་ཚིག་དང་སྡོམ་པ་བསྟན་པའི་ལེའུ་སྟེ་སུམ་ཅུ་རྩ་ལྔ་པའོ།​། །​།དེ་ནས་ལྷའི་དབང་པོ་བརྒྱ་བྱིན་དང་ཚངས་པ་ལ་སོགས་པའི་ལྷ་དཔག་ཏུ་མེད་པ་དང་། བྱང་ཆུབ་སེམས་དཔའ་འཇམ་དཔལ་གཞོན་ནུ་ལ་སོགས་པའི་བྱང་ཆུབ་སེམས་དཔའི་འཁོར་དཔག་ཏུ་མེད་པ་དང་། ལྷ་དང་།



The English translation of this folio by 84000 Translating the words of the Buddha can be found at:
https://read.84000.co/translation/toh726.html?part=UT22084-094-003-599#UT22084-094-003-599