གཟུངས་སྔགས་འདི་བརྗོད་པར་བྱའོ། །ནན་ཏན་དུ་བསྒྲུབ་པར་བྱའོ། །འདིའི་ཡོན་ཏན་ཤེས་པར་བྱའོ། །འདི་མཆོད་པར་བྱའོ། །ལུང་ནོད་པར་བྱའོ། །ཐེ་ཚོམ་མེད་པར་བྱའོ། །ལས་ལ་ནན་ཏན་དུ་བྱའོ། །འདིའི་བསྔགས་པ་ཡིད་ལ་བྱའོ། །ལས་སོ་སོའི་སྒོ་ནས་བསྒྲུབ་པར་བྱའོ། །དེ་སྐད་ཅེས་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་བསྟན་ཏོ། །དེས་ནི་གླེང་གཞིའི་ལེའུ་བསྟན་པ་སྟེ་ལེའུ་དང་པོའོ།། །།དེ་ནས་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་གསོལ་པ། བཅོམ་ལྡན་འདས་འདི་ཇི་ལྟར་བསྒོམ་པར་བྱ། འདི་ལ་ཇི་ལྟར་དུ་ནན་ཏན་དུ་བྱ་ཞེས་སྨྲས་པ་དང་། བཅོམ་ལྡན་འདས་ཀྱིས་གསུངས་པ། འཇམ་དཔལ་འདི་ལྟར་ཡིད་ལ་བྱའོ། །འཇམ་དཔལ་ཆོས་ཐམས་ཅད་ནི་མ་སྐྱེས་པའོ། །ཆོས་ཐམས་ཅད་ནི་མ་འགགས་པའོ། །ཆོས་ཐམས་ཅད་ནི་དྲི་མ་དང་བྲལ་བའོ། །ཆོས་ཐམས་ཅད་ནི་མྱ་ངན་ལས་འདས་ཤིང་རང་བཞིན་གྱིས་རྣམ་པར་དག་པར་བསྒོམ་པར་བྱའོ། །འཇམ་དཔལ་དེའི་ཕྱིར་སྔགས་འདི་བརྗོད་པར་བྱའོ། །ཨོྃ་སྭ་བྷ་བ་ཤུད་དྷཿསརྦ་དྷརྨཱཿསྭ་བྷཱ་བ་ཤུད་དྷོ྅་ཧཾ། ཞེས་བརྗོད་པར་བྱའོ། །ཡང་བཅོམ་ལྡན་འདས་ཀྱིས་གསུངས་པ། མངལ་ལས་སྐྱེས་པ་དང་། སྒོ་ང་ལས་སྐྱེས་པ་དང་། དྲོད་གཤེར་ལས་སྐྱེས་པ་དང་། བརྫུས་ཏེ་སྐྱེ་བ་དག་ལ་བལྟས་ཏེ་བྱམས་པ་བསྒོམ་པར་བྱའོ། །སྐྱེ་བ་དང་། རྒ་བ་དང་། ན་བ་དང་། འཆི་བ་ལ་སྙིང་རྗེ་ཆེན་པོ་བསྐྱེད་པར་བྱའོ། །སྟོང་པ་ཉིད་དང་མཚན་མ་མེད་པ་དང་། སྨོན་པ་མེད་པ་དང་། རང་བཞིན་གྱིས་འདུས་མ་བྱས་པ་ལ་དགའ་བ་དང་བཏང་སྙོམས་བསྒོམ་པར་བྱའོ། །འཇམ་དཔལ་དེ་ལྟ་བས་ན། རྒྱུ་ནི་ཚད་མེད་པ་བཞིའོ་དེས་བསྐྱེད་པ་ནི་བྱང་ཆུབ་ཀྱི་སེམས་སོ། །དེའི་ཕྱིར་དེ་ལ་ནན་ཏན་དུ་ཡིད་ལ་བྱའོ། །འཇམ་དཔལ་དེའི་ཕྱིར་སྔགས་འདི་བརྗོད་པར་བྱའོ། །ཨོྃ་བྷོ་དྷི་ཙིཏྟ་ཨུཏྤ་དཱ་ཡ་ཨ་ཧཾ། ཞེས་བརྗོད་པར་བྱའོ། །ཡང་བཅོམ་ལྡན་འདས་ཀྱིས་གསུངས་པ། མཆོད་པ་འདི་རྣམས་ཀྱིས་མཆོད་པར་བྱའོ།