Degé Kangyur volume 43, F.146.a

།སྤྲེའུ་ལྟར་དེ་ཡི་སེམས་ནི་གཡོ་བར་འགྱུར། །​སྨྲ་ལ་དགའ་བའི་ཉེས་པ་འདི་དག་གོ །​རང་གི་བློ་ནི་ཤེས་པས་དམན་པའི་ཕྱིར། །​རྨོངས་པ་དེ་ནི་གཞན་གྱི་དྲིང་ལ་འཇོག །​དེ་ནི་ཉོན་མོངས་ཕྱོགས་ཀྱི་དབང་དུ་འགྲོ། །​སྨྲ་ལ་དགའ་བའི་ཉེས་པ་འདི་དག་གོ །​མིག་ཀྱང་འཁྲུལ་ཅིང་དེ་བཞིན་རྣ་བ་འང་འཁྲུལ། །​སྣ་ཡང་འཁྲུལ་ཅིང་དེ་བཞིན་ལྕེ་ཡང་འཁྲུལ། །​ལུས་ཀྱང་འཁྲུལ་ཅིང་ཡིད་ཀྱང་འཁྲུལ་པར་འགྱུར། །​སྨྲ་ལ་དགའ་བའི་ཉེས་པ་འདི་དག་གོ །​ཡུན་རིང་དུས་ནས་སྨྲ་ལ་དགའ་བས་ན། །​དེ་ནི་བདག་ཉིད་དགའ་བ་མི་འཐོབ་པོ། །​ཚིག་གང་དགའ་བ་མཐའ་ཡས་འཐོབ་འགྱུར་བ། །​ཚིག་གཅིག་ཙམ་ཞིག་བསམས་ཀྱང་མཆོག་ཡིན་ནོ། །​བུ་རམ་ཤིང་ཤུན་སྙིང་པོ་ཅི་ཡང་མེད། །​དགའ་བར་བྱ་བའི་རོ་ནི་ནང་ན་འདུག །​ཤུན་པ་ཟོས་པའི་མིས་ནི་བུ་རམ་རོ། །​ཞིམ་པོ་རྙེད་པར་ནུས་པ་མ་ཡིན་ནོ། །​ཇི་ལྟར་ཤུན་པ་དེ་བཞིན་སྨྲ་བ་སྟེ། །​རོ་ལྟ་བུ་ནི་འདི་ལ་དོན་སེམས་ཡིན། །​དེ་ལྟ་བས་ན་སྨྲ་ལ་དགའ་སྤོངས་ཏེ། །​རྟག་ཏུ་བག་ཡོད་བྱོས་ལ་དོན་སོམས་ཤིག །​སྨྲ་བའི་ཉེས་པ་འདི་འདྲ་རྟོག་གྱུར་ཅིང་། །དོན་གྱི་ཡོན་ཏན་མཆོག་འདི་ཤེས་ནས་ནི། །​འདི་ན་བྱང་ཆུབ་མཁས་པ་གང་ཡིན་པ། །​དེས་ནི་དོན་བསམ་པ་ལ་དགའ་བར་གྱིས། །​དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་འདི་སྐད་ཅེས་གསོལ་ཏོ། །​བཅོམ་ལྡན་འདས་འདི་ལྟར་སྨྲ་བ་ལ་དགའ་བའི་སྐྱོན་རྣམས་དང་། དོན་ལ་སེམས་པའི་ཡོན་ཏན་རྣམས་དེ་བཞིན་གཤེགས་པས་ལེགས་པར་གསུངས་པ་ནི་ངོ་མཚར་ལགས་སོ། །​བཅོམ་ལྡན་འདས་བྱང་ཆུབ་སེམས་དཔའ་སྙིང་པོ་འཚལ་བ་རྣམས་ཀྱིས་ནི་དོན་བསམ་པ་བཏང་སྟེ་སྙིང་པོ་མ་མཆིས་པའི་སྨྲ་བ་ལ་དགའ་བར་བགྱིད་པའི་རྔོ་མི་ཐོག་ལགས་སོ། །​བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་གཉིད་ཀྱི་དགའ་བས་དགའ་བའི་སྐྱོན་ཇི་ལྟར་བརྟག་པར་བགྱི། བྱང་ཆུབ་སེམས་དཔས་ཇི་ལྟར་བརྟགས་ན་རྨུགས་པ་དང་། གཉིད་ཀྱི་ནོངས་དམིགས་མཐོང་ནས་བརྩོན་འགྲུས་རྩོམ་ཞིང་ཡོངས་སུ་སྐྱོ་བར་ཡང་མི་འགྱུར་བ་ལགས།