།།སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་ལྔ་སྟོང་ཐམས་ཅད་ཀྱང་སྤོབས་པ་ཐོགས་པ་མེད་པ། བཟོད་པ་ཐོབ་པ། བདུད་ཕྱིར་རྒོལ་བ་བཅོམ་པ། སངས་རྒྱས་ཀྱི་ཆོས་ཐམས་ཅད་ལ་ཤིན་ཏུ་ཉེ་བར་གྱུར་པ། སྐྱེ་བ་གཅིག་གིས་ཐོགས་པ། གཟུངས་ཐོབ་པ། ཏིང་ངེ་འཛིན་ཐོབ་པ། སྤོབས་པ་མཐའ་ཡས་པ་ཐོབ་པ། མི་འཇིགས་པ་ཐོགས་པ་མེད་པ་ཐོབ་པ། རྫུ་འཕྲུལ་གྱི་སྟོབས་དང་། དབང་དམ་པའི་ཕ་རོལ་དུ་སོན་པ་ནས། ཡོན་ཏན་གྱི་ཚོགས་ཐམས་ཅད་ཟད་མི་ཤེས་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དང་། ཀུན་ཏུ་མིག་དང་། ཀུན་ཏུ་ལྟ་བ་དང་། ཀུན་ཏུ་འོད་ཟེར་དང་། ཀུན་ཏུ་འོད་དང་། བློ་གྲོས་མཆོག་དང་། བློ་གྲོས་འཕེལ་དང་། བློ་གྲོས་མཐའ་ཡས་དང་། བློ་གྲོས་རྒྱ་ཆེན་དང་། བློ་གྲོས་མི་ཟད་པ་དང་། ས་འཛིན་དང་། འགྲོ་བ་འཛིན་དང་། རྒྱལ་བའི་བློ་གྲོས་དང་། ཁྱད་པར་བློ་གྲོས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཟུངས་ཀྱི་དབང་ཕྱུག་གི་རྒྱལ་པོ་དང་། འཇམ་དཔལ་ལ་སོགས་པ་བྱང་ཆུབ་སེམས་དཔའ་དཔེ་མེད་པ་དྲུག་ཅུ་དང་། བཟང་སྐྱོང་ལ་སོགས་པ་སྐྱེས་བུ་དམ་པ་བཅུ་དྲུག་དང་། མི་མཇེད་ཀྱི་བདག་པོ་ཚངས་པ་དང་། ལྷ་ཡི་དབང་པོ་བརྒྱ་བྱིན་དང་། འཇིག་རྟེན་སྐྱོང་བ་བཞི་དང་། ལྷའི་བུ་མཚན་བཟངས་དང་། ལྷའི་བུ་བློ་གྲོས་ལེགས་གནས་དང་། ལྷ་ཡི་དབང་པོ་ཐམས་ཅད་དང་། ཀླུ་ཡི་དབང་པོ་ཐམས་ཅད་དང་། མིའམ་ཅིའི་དབང་པོ་དང་། དྲི་ཟའི་དབང་པོ་དང་། གནོད་སྦྱིན་གྱི་དབང་པོ་དང་། ལྷ་མ་ཡིན་གྱི་དབང་པོ་དང་། ནམ་མཁའ་ལྡིང་གི་དབང་པོ་འཁོར་བརྒྱ་སྟོང་དུ་མ་ཡོད་པ་ཐམས་ཅད་དང་། འཁོར་དེ་ཉིད་དུ་འདུས་ཏེ་འཁོད་པ་རྣམས་དང་ཐབས་གཅིག་ཏུ་བཞུགས་སོ།