Degé Kangyur volume 42, F.217.b

གནང་བ། འཕགས་པ་རྣམས་ཀྱིས་རབ་ཏུ་བསྔགས་པར་གྱུར་པ་དེ་ལྟར་ངས་ཡུན་རིང་པོར་བརྟགས་ཏེ་སེམས་ཅན་རྣམས་ལ་སྙིང་རྗེ་བའི་བསམ་པ་རབ་ཏུ་བསྐྱེད་ནས་བཏང་ངོ་། །​གཞན་ཡང་མཽད་གལ་ངས་མངོན་པར་དྲན་ཏེ། འདས་པའི་དུས་ཀྱི་ཚེ་ཚོང་དཔོན་ལེགས་པར་རྙེད་པ་ཞེས་བྱ་བ་ཞིག་བྱུང་བར་གྱུར་ཏེ། དེ་རྒྱ་མཚོ་ཆེན་པོར་ཞུགས་ནས་རིན་པོ་ཆེ་ལེན་དུ་སོང་བ་ལས་བདེ་བར་སླར་ལོག་སྟེ་རང་གི་ཡུལ་དུ་ཕྱིན་ནས་གྲོང་ཁྱེར་དུ་ཞུགས་ཏེ་ཁྱིམ་གྱི་སྒོར་ཕྱིན་པ་དང་། དེའི་ཚེ་གྲོང་ཁྱེར་ན་གནས་པའི་སློངས་མོ་བ་མང་པོ་རྣམས་ཀྱིས་དེ་ཡོངས་སུ་བསྐོར་ནས་དེའི་མདུན་དུ་འདི་སྐད་ཅེས་སྨྲས་སོ། །​ལེགས་པར་རྙེད་པ་བདེ་བར་བྱོན་ཏམ། སྦྱིན་བདག་ཆེན་པོ་བདག་ཅག་སློང་བ་མཆིས་ཏེ། གལ་ཏེ་གནང་བར་གྱུར་ན་བདག་ཅག་བསླང་བར་འཚལ་ལོ། །​མཽད་གལ་དེའི་ཚེ་ལེགས་པར་རྙེད་པས་སློངས་མོ་པ་དེ་དག་ལ་འདི་སྐད་དུ་ཁྱེད་སློངས་ཤིག་དང་། བདག་ལ་ཅི་བདོག་པ་ཕངས་པ་མེད་པར་སྦྱིན་པར་བྱའོ་ཞེས་སྨྲས་སོ། །​དེ་ནས་སློངས་མོ་པ་རྣམས་ཀྱིས་ལེགས་པར་རྙེད་པ་ལ་སྨྲས་པ། ཁྱོད་ཀྱིས་རྒྱ་མཚོ་ཆེན་པོ་ནས་རྙེད་པའི་ནོར་བུ་རིན་པོ་ཆེ་རྣམས་བདག་ཅག་ལ་བྱིན་ཅིག་དང་། དེས་ན་བདག་ཅག་རབ་ཏུ་བདེ་བར་འགྱུར་རོ། །​མཽད་གལ་དེའི་ཚེ་ལེགས་པར་རྙེད་པས་ནོར་བུ་རིན་པོ་ཆེ་གཅིག་ཅིག་ཀྱང་གསེར་སྲང་བརྒྱ་སྟོང་དུ་མ་རི་བ་བྱེ་བ་ཕྲག་བརྒྱད་ཅུ་སྙེད་ཀྱི་རིན་པོ་ཆེ་རྣམས་མ་ལུས་པར་སློངས་མོ་པ་རྣམས་ལ་བྱིན་ཏེ། མཽད་གལ་ལ་ལེགས་པར་རྙེད་པ་དེས་དེ་ལྟར་ནོར་མང་པོ་རྣམས་ཡོངས་སུ་བཏང་བར་གྱུར་ཀྱང་སེམས་ལ་གྱུར་བའམ། འགྱོད་པར་གྱུར་པ་ཅི་ཡང་མེད་དོ། །​དེའི་ཚེ་ལེགས་པར་རྙེད་པས་རིན་པོ་ཆེ་མང་པོ་སློངས་མོ་པ་རྣམས་ལ་ཡོངས་སུ་བཏང་ནས་ཁྱིམ་དུ་ཡང་མ་ཞུགས་པར་སླར་ལོག་སྟེ་རྒྱ་མཚོར་ཞུགས་ནས་རིན་པོ་ཆེ་ལེན་དུ་སོང་བ་ལ་སྔ་མ་བས་ཕྱེད་འགྱུར་ཀྱིས་བཟང་བའི་རིན་པོ་ཆེ་མང་པོ་ཐོབ་པར་གྱུར་ཏེ། ལོ་བརྒྱད་ཅུ་འདས་ནས་སླར་རང་གི་ཡུལ་དུ་ཕྱིན་ནས་གྲོང་ཁྱེར་དུ་འཇུག་པ་ལས་དེའི་ཚེ་ཉེས་པ་བྱས་པའི་མི་དག་ཅིག་གཤེད་མ་པས་གཟུང་སྟེ་བཅིངས་ནས་མི་སྙན་པའི་སྒྲ་བསྒྲགས་པའི་རྔ་ཡང་བརྡུངས། ལམ་གྱི་བཞི་



The English translation of this folio by 84000 Translating the words of the Buddha can be found at:
https://read.84000.co/translation/toh61.html?part=UT22084-042-002-859#UT22084-042-002-859