།དེ་འདྲའི་བརྩོན་འགྲུས་གང་ཡིན་པ། །སངས་རྒྱས་རྣམས་ཀྱིས་རབ་ཏུ་བསྔགས། །འཇིག་རྟེན་གཏིང་ནི་མི་རྙེད་པ། །དེ་གཏིང་བྱང་ཆུབ་སེམས་དཔས་རྙེད། །འཇིག་རྟེན་འཇིག་ཅིང་བྱིང་གྱུར་ཀྱང་། །བྱང་ཆུབ་སེམས་དཔའ་འཇིག་བྱིང་མེད། །བརྩོན་པའི་སེམས་ཀྱིས་རྟག་ཏུ་ནི། །སྟོང་དབེན་བྱང་ཆུབ་ཚོལ་བར་བྱེད། །སྟོང་པའི་ཆོས་ལ་འཇིག་མེད་པས། །ལྡོག་ཅིང་བྱིང་བར་གྱུར་པའང་མེད། །བདག་ཆོས་མཚན་ཉིད་གནས་པ་ལས། །དེ་ཕྱིར་འཇིག་བྱིང་རབ་ཏུ་སྐྱེ། །ཆོས་རྣམས་ཐམས་ཅད་འཇིག་འཐོར་བ། །དེ་ནི་བྱང་ཆུབ་ལམ་ཞེས་བྱ། །ནན་ཏན་བརྩོན་འགྲུས་གང་སྐྱེད་པ། །མང་ཐོས་རྒྱ་མཚོ་མྱུར་དུ་འགྲུབ། །གཞན་ཡང་གང་པོ་བྱང་ཆུབ་སེམས་དཔས་ཕུང་པོ་ལྔ་ལ་མཁས་པར་བྱ། སྐྱེ་མཆེད་བཅུ་གཉིས་ལ་མཁས་པར་བྱ། ཁམས་བཅྭ་བརྒྱད་ལ་མཁས་པར་བྱ། །རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་ལ་མཁས་པར་བྱའོ། །ཕུང་པོ་ལྔ་དང་། སྐྱེ་མཆེད་བཅུ་གཉིས་དང་། ཁམས་བཅྭ་བརྒྱད་དང་། རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་པོ་ལ་རབ་ཏུ་མཁས་པར་གྱུར་ན་གནས་པ་མེད་པའི་ཡེ་ཤེས་ཡོངས་སུ་འགྲུབ་པར་འགྱུར་རོ། །གནས་པ་མེད་པའི་ཡེ་ཤེས་ཐོབ་པའི་ཕྱིར་ཆོས་ཐམས་ཅད་ལ་མི་སེམས་ཤིང་རྣམ་པར་རྟོག་པར་ཡང་མི་བྱེད་དོ། །མི་སེམས་ཤིང་རྣམ་པར་མི་རྟོག་པས་སེམས་ཅན་ལ་ཆོས་བསྟན་ནས་ལྟ་བ་ཐམས་ཅད་འཇིག་ཅིང་འཇིག་ཚོགས་ལ་ལྟ་བ་རབ་ཏུ་འདུལ་བར་འགྱུར་ཏེ། བྱང་ཆུབ་སེམས་དཔའ་གང་ཆོས་གསུམ་པ་འདི་དང་ལྡན་པར་གྱུར་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པར་མི་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། བྱང་ཆུབ་སེམས་དཔས་ཕུང་པོ་ལྔ། །སྐྱེ་མཆེད་བཅུ་གཉིས་སྟོང་པར་ཤེས། །ཁམས་ནི་བཅྭ་བརྒྱད་རབ་འབྱེད་ཅིང་། །རྟེན་འབྲེལ་བཅུ་གཉིས་རབ་ཏུ་རྟོགས། །ལྔ་ཕུང་རྗེས་སུ་མི་འབྲང་ཞིང་། །ལུས་ནི་མི་བདེན་ཉིད་དུ་རིག །ཕྱི་ནང་སྐྱེ་མཆེད་ཐམས་ཅད་ཀུན། །རང་བཞིན་དག་ནི་སྟོང་པར་ཤེས། །དེ་ལྟར་ཆོས་རྣམས་ཤེས་ནས་ཀྱང་། །གཞན་དག་ལ་ནི་སྟོན་བྱེད་པས། །དེ་ཕྱིར་བྱང་ཆུབ་སེམས་དཔའ་དེ། །ཤེས་རབ་རྒྱ་ཆེར་འཕེལ་བར་འགྱུར། །གཞན་ཡང་གང་པོ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཇི་ལྟར་ཚུལ་ཁྲིམས་བཅས་པ་དང་།