Degé Kangyur volume 89, F.7.b

ཉལ་བའི་དུས་སུ་བརྒྱ་རྩ་བརྒྱད་བཟླས་ཏེ། བདག་གང་ནས་སྐྱེས་པར་གྱུར་གང་དུ་སྐྱེ་བར་འགྱུར་ཞེས་ཡིད་ལ་བསམས་ཤིང་ཉལ་ན་འདས་པ་དང་མ་འོངས་པའི་སྐྱེ་བ་དམིགས་པར་འགྱུར་བར་ཐེ་ཚོམ་མེད་དོ། །​གལ་ཏེ་ཟླ་བ་དྲུག་གི་ནང་རོལ་ཏུ་འཆི་བར་འགྱུར་ན་དེའི་ཚེ་རྨི་ལམ་དུ་བདག་གམ་གཞན་གྱི་མགོ་བོ་མི་མཐོང་བར་འགྱུར་རོ། །​དེ་བཞིན་དུ་མངོན་པར་བསྔགས་པའི་མེ་ལོང་བལྟས་པ་ན་ཁྱེའུ་འམ་བུ་མོ་གང་གི་མགོ་བོ་མཐོང་བར་མ་གྱུར་པ་དེའི་ཟླ་བ་དྲུག་གི་ནང་དུ་འཆི་བར་འགྱུར་རོ། །​རྡོ་ལིག་བུ་མིག་དང་ཤིང་ཨ་གས་ཏི་དཀར་པོའི་རྩ་བ་རེང་བུར་བྱས་ཏེ། བརྒྱ་རྩ་བརྒྱད་མངོན་པར་བསྔགས་པས་མིག་ལ་བྱུགས་ན། གང་དག་ཟླ་བ་དྲུག་གི་ནང་དུ་འཆི་བར་འགྱུར་བའི་རྐང་གཉིས་དང་རྐང་བཞི་དེ་དག་ཐམས་ཅད་ཀྱི་མགོ་བོ་མེད་པ་མངོན་སུམ་དུ་མཐོང་བར་འགྱུར་རོ། །​ཨོཾ་སྭཔྣ་བི་ལོ་ཀི་ནི་སིད་དྷ་ལོ་ཙ་ནི་སྭཔྣཾ། མེ་ཀ་ཐཱ་ཡ་སྭཱ་ཧཱ། སྔགས་ཀྱི་རྒྱལ་པོ་འདི་གོང་ནས་སྨོས་པའི་ཆོ་གས་ལས་ཐམས་ཅད་བྱེད་པར་འགྱུར་རོ། །​ཨོཾ་ཨ་དི་ཏི་དེ་བ་དཏ་ཏཾ། མེ་དེ་ཧི་ད་དཱ་བ་ཡ་སྭཱ་ཧཱ། ཆུའི་ནང་དུ་ཞུགས་ཏེ་བུ་མོ་གང་གང་གི་ཆེད་དུ་བཟླས་པ་བྱེད་པ་དེ་དེ་ཉིད་ལ་སྟེར་བར་བྱེད་དོ། །​ཡི་གེ་འབུམ་བཟླས་པ་བྱས་པ་པྲི་ཡང་ཀུའི་མེ་ཏོག་གམ་པ་ལ་ཤའི་མེ་ཏོག་གི་སྦྱིན་སྲེག་འབུམ་གྱིས་དཔལ་ཆེན་པོ་གྲུབ་པར་བྱེད་དོ། །​མཚན་མོ་འོ་མ་ཅན་གྱི་ཡམ་ཤིང་གིས་སྦྱིན་སྲེག་བྱས་ནས། གྲོང་གང་གི་ཆེད་དུ་སྦྱིན་སྲེག་བཟླས་པ་བྱེད་པ་དེ་རྙེད་པར་འགྱུར་རོ། །​པདྨ་རྣམས་སམ་བིལ་པ་རྣམས་ཀྱི་འབྲས་བུའི་སྦྱིན་སྲེག་འབུམ་གྱིས་རྒྱལ་རིགས་སུ་སྐྱེས་པ་རྒྱལ་སྲིད་རྙེད་པར་འགྱུར་ཞིང་གཞན་དག་གིས་དཔལ་ཆེན་པོ་ཐོབ་པར་བྱེད་དོ། །​ཇི་ལྟ་བ་བཞིན་དུ་རྙེད་པའི་མེ་ཏོག་རྣམས་ཀྱི་སྦྱིན་སྲེག་འབུམ་ཕྲག་བདུན་གྱིས་འབྱོར་པ་མི་ཟད་པར་འགྱུར་རོ། །​ཨོཾ་ཛ་ཡེ། བི་ཛ་ཡེ། ཨ་ཛི་ཏེ། ཨ་པ་རཱ་ཛི་ཏེ་སྭཱ་ཧཱ། སྲིང་མོ་བཞིའི་སྙིང་པོའི་སྔགས་ཀྱི་རྒྱལ་པོ་འདི་གོང་དུ་བཤད་པའི་ཆོ་གས་འབུམ་ཕྲག་བཞི་བཟླས་ན། གོང་དུ་བཤད་པའི་ཆོ་གས་ལས་ཐམས་ཅད་བྱེད་པར་འགྱུར་རོ། །​ཨོཾ་མེ་གྷོལྐཱ་ཡ་སྭཱ་ཧཱ། པ་ལ་ཤའི་མེ་ཏོག་གམ་ཡམ་ཤིང་གིས་སྦྱིན་སྲེག་འབུམ་ཕྲག་གཅིག་བྱས་ན་གསེར་སྲང་འབུམ་



The English translation of this folio by 84000 Translating the words of the Buddha can be found at:
https://read.84000.co/translation/toh544.html?part=UT22084-089-001-436#UT22084-089-001-436