བུད་མེད་ཀྱི་རྒྱན་ཐམས་ཅད་ཀྱིས་ལུས་བརྒྱན་པ། ལག་པ་གཡོན་པ་ན་ཨུཏྤ་ལ་ཐོགས་པ། གསེར་གྱི་ཁ་དོག་ཅན་རྐེད་པ་ཕྲ་བ་ཧ་ཅང་ཡང་མི་སྐེམ་ཧ་ཅང་ཡང་མི་སྦོམ་ཧ་ཅང་ཡང་མི་རྒན། སེམས་བསམ་གཏན་ལ་ཞུགས་པ། བཀའ་ཉན་ཅིང་འདུག་པ། ལག་པ་གཡས་པ་མཆོག་སྦྱིན་པ། ཅུང་ཟད་གདོང་དང་ལུས་འདུད་པ། སྐྱིལ་ཀྲུང་གིས་འདུག་པ། འཕགས་པ་སྤྱན་རས་གཟིགས་དབང་ཕྱུག་ལ་ཅུང་ཟད་ལྟ་ཞིང་འདུག་པ། ཀུན་ནས་འབར་བའི་འོད་ཀྱི་ཕྲེང་བས་ཡོངས་སུ་བསྐོར་བ། དེར་ཡང་བཻ་ཌཱུརྱ་རིན་པོ་ཆེའི་རྩེ་མོ་ལ་ཤིང་པུནྣྣཱ་གའི་ཡལ་གས་ཀུན་ནས་བསྐོར་བ། ཡལ་ག་དག་ལ་ཡང་མེ་ཏོག་འཕེལ་ཞིང་ཁ་བྱེ་བས་ལེགས་པར་རྒྱས་པས་བཅོམ་ལྡན་འདས་མ་སྒྲོལ་མ་མངོན་པར་བཀབ་པ། ཡལ་ག་མངོན་པར་འདུད་པ་དེ་ཉིད་ཀྱང་ཤིན་ཏུ་ཁ་དོག་སྣ་ཚོགས་པ་བྱི་རུའི་མྱུ་གུའི་འབྲེལ་བ་རྣམ་པ་སྣ་ཚོགས་ཀྱི་ངོ་བོའི་ཚོན་འབར་བ་ན། ལྷ་མོ་སྒྲོལ་མ་མངོན་དུ་ཕྱོགས་ཤིང་ལྟ་བ་བྲི་བར་བྱའོ། །ལྷ་མོ་བགེགས་རྣམས་མ་ལུས་འཇོམས། །འཇིགས་པ་སེལ་བར་བྱེད་པའི་མཆོག །སྒྲུབ་པ་པོ་ནི་སྲུང་དོན་དུ། །དེས་ནི་དམ་པ་སྦྱིན་ཞིང་དགེ། །སྟོབས་བཅུ་ལྡན་སྲས་ཐུགས་རྗེ་ནི། །བུད་མེད་གཟུགས་འཆང་ལྷ་མོ་ཡིན། །འབྱུང་པོ་ཀུན་གྱི་དཔལ་དོན་དང་། །མཆོག་སྦྱིན་བྱེད་པ་བྲི་བར་བྱ། །འཇམ་པའི་དབྱངས་ཅན་འོད་ཆེན་ནི། །གཞོན་ནུའང་ལྷ་མོ་འདི་ལ་དགྱེས། །བགེགས་རྣམས་ཐམས་ཅད་བསལ་བའི་ཕྱིར། །སྒྲུབ་པ་པོས་ཀྱང་ཡང་དག་བཀུར། །མི་ཡི་བདག་པོ་སྲུང་དོན་དང་། །དཔལ་སྒྲུབ་ཕྱིར་ཡང་རི་མོ་བྲི། །ཁྲོ་བོའི་རྒྱལ་པོ་གང་ཡིན་ཏེ། །རི་ཡི་རྩེ་མོར་གཞག་བྲིས་པ། །བགེགས་རྣམས་ཐམས་ཅད་གཞིག་པའི་ཕྱིར། །རྒྱལ་བ་མཆོག་དང་སྲས་ཀྱིས་གསུངས། །མི་བཟད་ཆེན་པོ་འཁྱིལ་བ་ཆེ། །གཏུམ་ཆེན་འོད་ཆེན་ལྡན་པ་པོ། །མ་རུངས་སེམས་ཅན་ཚར་གཅད་ཕྱིར། །སྒྲུབ་པ་ལ་ནི་རབ་ཏུ་བརྟགས། །སྒྲུབ་པ་པོ་ནི་སྲུང་བ་དང་། །བགེགས་རྣམས་ཐམས་ཅད་སེལ་བར་བྱེད། །མི་བཟད་ཁྲོ་བོའི་ངང་ཚུལ་ཅན། །སྔགས་ཀྱི་ལྷ་དག་འགུགས་པར་བྱེད། །ཤིན་ཏུ་མི་བཟད་དྲག་པོའི་གཟུགས། །བརྩེ་བ་མེད་པ་ཐམས་ཅད་འདུལ།