ཚོན་མ་འདྲེས་ཤིང་ཁ་དོག་གསལ་བ་དང་ལྡན་པའི་ཚོན་རྩི་རྣམས་བླངས་ཏེ། སྔར་ཐ་ག་པ་ལ་བྱས་པའི་ཆོ་ག་ཅི་ལྟ་བ་དེ་ཉིད་ཀྱི་མཚན་ཉིད་དང་ལྡན་པས། རི་མོ་མཁན་ལ་སྔ་མ་བཞིན་སྦྱར་བར་བྱ་སྟེ། སྔར་ཅི་ལྟར་ཐ་ག་པ་ལ་བྱས་པ་དེ་ཉིད་ཀྱིས་རས་ལ་རི་མོ་འདྲིར་གཞུག་གོ། །ཡང་ན་བདག་ཉིད་ཀྱིས་བྲི་བར་བྱའོ། །ག་པུར་དང་ཙནྡན་དང་གུར་གུམ་ལ་སོགས་པའི་དྲིས་ཚོན་རྩི་ལ་བསྒོ་བར་བྱ་ཞིང་བདུག་སྤོས་བསྲེགས་ཏེ། དེ་ཉིད་ཀྱི་སྔགས་ཀྱིས་ལན་བརྒྱ་རྩ་བརྒྱད་འཁོར་དང་བཅས་པ་ལ་ཡང་བཟླ་སྟེ། མེ་ཏོག་ནཱ་ག་གེ་སར་དང་པུན་ནཱ་ག་དང་བ་ཀུ་ལ་དང་ཙམ་པ་ཀ་དང་དབྱར་གྱི་མེ་ཏོག་དང་དྷཱ་ནུཤྐ་རི་དང་མཱ་ལ་ཏིའི་མེ་ཏོག་ལ་སོགས་པས་རས་དེ་གཅལ་བཀྲམ་པ་བྱས་ལ། ཤར་དུ་མངོན་པར་ཕྱོགས་པས་ཀུ་ཤའི་ཁྲེས་ལ་འདུག་སྟེ་བློ་ལེགས་པར་གནས་པ་དང་། སངས་རྒྱས་དང་བྱང་ཆུབ་སེམས་དཔའ་ལ་དམིགས་པའི་སེམས་ཀྱིས་པིར་ཕྲ་མོ་ལག་པར་བླངས་ནས། འཁྲུག་པ་མེད་པའི་སེམས་ཀྱིས་རས་དེ་ལ་བྲི་བར་བྱའོ། །དང་པོར་རེ་ཞིག་བཅོམ་ལྡན་འདས་ཤཱཀྱ་ཐུབ་པ་བྲི་བར་བྱ་སྟེ། རྣམ་པ་ཐམས་ཅད་ཀྱི་མཆོག་དང་ལྡན་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་མཚན་པ། སྐུ་དཔེ་བྱད་བཟང་པོ་བརྒྱད་ཅུས་ཉེ་བར་མཛེས་པ་རིན་པོ་ཆེའི་པདྨ་ལ་བཞུགས་པ་ཀུན་ནས་འོད་འབར་བ། སྐུ་འོད་འདོམ་གང་གིས་ཉེ་བར་མཛེས་པ་ཆོས་འཆད་བཞིན་པ། སྐུ་དང་ཞིང་རྣམ་པ་ཐམས་ཅད་ཀྱི་མཆོག་དང་ལྡན་པ། དབུས་ན་གནས་པའི་པདྨ་བཻ་ཌཱུརྱའི་སྡོང་བུ་ཅན་འོག་ན་ནི་ཀླུའི་རྒྱལ་པོ་གཉིས་ཀྱི་གདན་ཆེན་པོའི་པདྨའི་སྡོང་བུ་ལ་འཛིན་ཅིང་། དེ་བཞིན་གཤེགས་པ་ལ་བལྟ་བ། ལག་པ་གཡས་པས་ཕྱག་འཚལ་བ། མདོག་དཀར་པོ་རྒྱན་ཐམས་ཅད་ཀྱིས་བརྒྱན་པ་མི་དང་འདྲ་བ། ཕྱེད་སྦྲུལ་གྱི་གཟུགས་ཅན་དགའ་བོ་དང་ཉེ་དགའ་བྲི་བར་བྱའོ། །ཀུན་ནས་པདྨའི་མཚོ་པདྨའི་འདབ་མ་དང་མེ་ཏོག་ཅུང་ཟད་ཁ་བྱེ་བ་དང་། རྣམ་པར་ཁ་བྱེ་བ་དང་ཆུ་ལས་སྐྱེས་པའི་སྲོག་ཆགས་རྣམས་དང་། བྱ་དང་ཉ་ལ་སོགས་པས་ཁྱབ་པ་ཡངས་ཤིང་མཛེས་པར་སྐྱེས་པ་བྲི་བར་བྱའོ། །གང་བཅོམ་ལྡན་འདས་ཀྱི་རྩ་བའི་པདྨའི་སྡོང་བུ་དེ་ལས་འཕྲོས་པའི་ཡལ་ག་ལས་པདྨའི་མེ་ཏོག་དུ་མ་མཐར་གྱིས་མཐོ་བ་བྱའོ།