ལག་ན་མདུང་རྩེ་གསུམ་ཐོགས་པ་ལྷ་མོ་དཀའ་ཟློག་མ་ཁ་དོག་སྣ་ཚོགས་པ་རྒྱན་ཐམས་ཅད་ཀྱིས་བརྒྱན་པ། སྨིན་དྲུག་གི་བུ་རྨ་བྱའི་སྟན་ལ་འདུག་པ་མདུང་ཐོགས་པ། གཞོན་ནུའི་གཟུགས་ཅན་གདོང་དྲུག་པ་ལུས་དམར་པོར་སྣང་བ། གོས་སེར་པོ་བགོས་པ། གོས་སེར་པོའི་སྟོད་གཡོགས་ཅན་ལག་པ་གཡོན་པ་ན་དྲིལ་བུ་དང་བ་དན་དམར་པོ་ཐོགས་པ། མཐར་གྱིས་བྷྲིང་གི་རི་ཏི་ཤིན་ཏུ་རིད་པ་འདྲ་བ་དང་། ཚོགས་ཀྱི་བདག་པོ་ཆེན་པོ་དང་། དགའ་བྱེད་དབང་ཕྱུག་དང་ནག་པོ་ཆེན་པོ་དང་། མ་མོ་བདུན་པོ་རྒྱན་དང་མཚོན་ཆ་དང་ཁ་དོག་དང་དབྱིབས་ཅི་ལྟ་བ་བཞིན་བྲི་བར་བྱའོ། །ནོར་ལྷ་བརྒྱད་དང་དྲང་སྲོང་བདུན་དང་ཁྱབ་འཇུག་ལག་པ་བཞི་ན་འཁོར་ལོ་དང་དུང་དང་ག་དཱ་དང་རལ་གྲི་ཐོགས་པ། གདན་ནམ་མཁའ་ལྡིང་རྒྱན་ཐམས་ཅད་ཀྱིས་བརྒྱན་པ། གཟའ་བརྒྱད་དང་རྒྱུ་སྐར་ཉི་ཤུ་རྩ་བདུན་དང་། གང་ཡང་ཉེ་བའི་གཟའ་བརྒྱད་ས་སྟེང་གི་དཀྱིལ་འཁོར་ན་རབ་ཏུ་རྒྱུ་བ་ཡང་བྲི་བར་བྱའོ། །མཐར་གྱིས་ཚེས་གྲངས་བཅྭ་ལྔ་དང་ཡར་ངོ་དང་མར་ངོའི་ཕྱོགས་དང་། ཁྱིམ་བཅུ་གཉིས་དང་དུས་དྲུག་དང་ཟླ་བ་བཅུ་གཉིས་དང་ལོ་ཚིགས་དང་། སྲིང་མོ་བཞི་གྲུ་ལ་ཞོན་པ་དང་མིང་པོ་ལྔ་གྲུ་ལ་ཞོན་ཞིང་ཆུ་ལ་གནས་པ་སྟེ། མདོར་ན་ཕྱག་རྒྱར་གཞག་པར་བྱ་བ་ཡང་ཡིན་ནོ། །ལྷ་མོ་དེ་དག་མཐར་གྱིས་རིམ་པ་གཉིས་པ་ལ་བརྟེན་ཏེ་བྱ་བ་ཡིན་ནོ། །སློབ་དཔོན་བདག་ཉིད་ཕྱི་རོལ་ཏུ་བྱུང་ནས་དཀྱིལ་འཁོར་དེ་ལ་གཡས་ཕྱོགས་སུ་བསྐོར་བ་བྱས་ཏེ། མདོར་ན་དཀྱིལ་འཁོར་གསུམ་ཡང་དཀྱིལ་འཁོར་ལ་བརྟེན་ཅིང་བྲི་བར་བྱ་སྟེ། དཀྱིལ་འཁོར་གསུམ་ཆར་ཡང་གྲུ་བཞིར་རྣམ་པར་གནས་པར་བྱ་བ་ཡིན་ནོ། །མདོར་ན་འདི་ལྟར་སངས་རྒྱས་བཅོམ་ལྡན་འདས་སེམས་ཅན་རྣམས་ཀྱི་མགོན་པོ་ནི་ངེས་པར་བྲི་བར་བྱའོ། །པདྨའི་རིགས་འཕགས་པ་སྤྱན་རས་གཟིགས་དབང་ཕྱུག་ཀྱང་ངེས་པར་བྲི་བར་བྱའོ། །རྡོ་རྗེའི་རིགས་འཕགས་པ་ཕྱག་ན་རྡོ་རྗེའང་ངེས་པར་བྲི་བར་བྱའོ། །བྱང་ཆུབ་སེམས་དཔའ་རྣམས་ཀྱི་གཙོ་བོ་འཕགས་པ་ཀུན་དུ་བཟང་པོའང་ངེས་པར་བྲི་བར་བྱའོ། །འཇམ་དཔལ་གཞོན་ནུར་གྱུར་པའང་ངེས་པར་བྲི་བར་བྱའོ། །ལྷག་མ་རྣམས་ནི་ཇི་ལྟར་རྣམ་པར་བཞག་པ་བཞིན་ཕྱག་རྒྱ་བྲི་བར་བྱའོ། །འདི་ནི་ནང་གི་དཀྱིལ་འཁོར་རོ།