Degé Kangyur volume 88, F.137.b

པདྨའི་གདན་ལ་བཞུགས་པ། དེ་བཞིན་གཤེགས་པའི་གཟུགས་ཅུང་ཟད་ཆུང་བར་བྱའོ། །​འོད་ཀུན་ནས་འབར་བའི་ཕྲེང་བས་ཁྱབ་པ། མཆོག་སྦྱིན་གྱི་ཕྱག་རྒྱ་དང་ལྡན་པ། སྐྱིལ་མོ་ཀྲུང་གིས་བཞུགས་པ། དེའི་གཡས་སུ་གཙུག་ཏོར་འཁོར་ལོས་སྒྱུར་བའི་ཕྱག་རྒྱ་བྲི་བར་བྱའོ། །​གཡོན་དུ་ནི་གཟི་བརྗིད་ཕུང་པོའི་ཕྱག་རྒྱ་བྲི་བར་བྱའོ། །​དེ་བཞིན་གཤེགས་པའི་སྤྱན་གྱི་སྟེང་དུ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཕྱག་རྒྱ་བྲི་བར་བྱའོ། །​བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གི་སྟེང་དང་། ཤེས་རབ་ཀྱི་ཕ་རོལ་ཏུ་ཕྱིན་མའི་ཕྱག་རྒྱའི་གཡས་སུ་བཅོམ་ལྡན་འདས་འོད་དཔག་ཏུ་མེད་པ་དེ་བཞིན་གཤེགས་པའི་གཟུགས་ཅན་བྱ་སྟེ། ཕྱག་མཆོག་སྦྱིན་པ། པདྨའི་གདན་ལ་བཞུགས་པ་ཀུན་ནས་འོད་འབར་བའི་ཕྲེང་བས་ཁྱབ་པ། དེའི་ཡང་གཡས་ཕྱོགས་སུ་ནི་ལྷུང་བཟེད་དང་ཆོས་གོས་ཀྱི་ཕྱག་རྒྱ་བྱའོ། །​དེ་བཞིན་དུ་མཐར་གྱིས་འཇུག་པའི་གནས་ལ་ནི་པདྨའི་ཕྱག་རྒྱ་བྱའོ། །​བཅོམ་ལྡན་འདས་མེ་ཏོག་ཡང་དག་པར་སྐྱེས་པའི་རྒྱལ་པོའི་དབང་པོ་དེ་བཞིན་གཤེགས་པའི་གཡོན་ཕྱོགས་སུ་གཙུག་ཏོར་གཟི་བརྗིད་ཕུང་པོའི་ཕྱག་རྒྱ་བྲི་སྟེ་ཀུན་ནས་འོད་འབར་བའི་ཕྲེང་བས་ཁྱབ་པ། དེའི་གཡོན་ཕྱོགས་སུ་དེ་བཞིན་གཤེགས་པ་རིན་ཆེན་ཏོག་བྱ་སྟེ། རིན་པོ་ཆེའི་རི་བོའི་སྟེང་དུ་ཆོས་སྟོན་ཅིང་བཞུགས་པ། བཻ་ཌཱུརྱ་སྔོན་པོ་དང་མརྒད་དང་པདྨ་རཱ་ག་རྣམ་པ་སྣ་ཚོགས་འབར་བའི་འོད་འཕྲོ་བའི་ཀུན་ནས་འོད་དང་ལྡན་པ་བྲི་བར་བྱའོ། །​དེའི་ཡང་གཡོན་ཕྱོགས་སུ་རྒྱལ་བའི་གཙུག་ཏོར་གྱི་ཕྱག་རྒྱ་ཀུན་ནས་འབར་བའི་ཕྲེང་བས་ཁྱབ་པ་བྲིའོ། །​དེའི་ཡང་གཡོན་ཕྱོགས་སུ་ཆོས་ཀྱི་འཁོར་ལོའི་ཕྱག་རྒྱ་ཀུན་ནས་འབར་བ་དང་ལྡན་པ་བྲིའོ། །​དེའི་ཡང་གཡོན་ཕྱོགས་སུ་འཁར་གསིལ་དང་། སྤྱི་བླུགས་དང་ཕྲེང་བ་དང་བཟང་པོའི་གདན་གྱི་ཕྱག་རྒྱ་བྲིའོ། །​མཐར་གྱིས་སྒོའི་གནས་སུ་རྡོ་རྗེ་རྩེ་གསུམ་པ་གཉིས་ཀ་ལ་ཡང་ཀུན་ནས་འབར་བ་བྲིའོ། །​བཅོམ་ལྡན་འདས་འཇམ་དཔལ་གཞོན་ནུར་གྱུར་པའི་འོག་ཏུ་ཕྱག་རྒྱ་ཆེན་པོ་གཙུག་ཕུད་ལྔ་ཞེས་བྱ་བ་དང་། ཨུཏྤ་ལའི་ཕྱག་རྒྱ་



The English translation of this folio by 84000 Translating the words of the Buddha can be found at:
https://read.84000.co/translation/toh543.html?part=UT22084-088-038-18981#UT22084-088-038-18981