རྒྱ་མཚོའི་ངོགས་དང་ཉེ་བའི་གྲོང་ཁྱེར་ཆེན་པོའི་བྱང་ཤར་གྱི་ཕྱོགས་སུ་ཧ་ཅང་ཡང་མི་རིང་ཧ་ཅང་ཡང་མི་ཉེ་བར་དཀྱིལ་འཁོར་གྱི་སློབ་དཔོན་སོང་སྟེ་ལོ་མའི་སྤྱིལ་བུ་བྱས་པ་ལ་ཞག་བདུན་ནམ་ཟླ་བ་ཕྱེད་ཀྱི་བར་དུ་གཅིག་པུ་རབ་ཏུ་གནས་པར་བྱ་སྟེ། གང་གནས་དེ་དག་ཏུའང་གཙང་མའི་ས་ཕྱོགས་རྡོ་བ་མེད་པ། གྱོ་མོ་དང་ཐལ་བ་དང་སོལ་བ་དང་། །ཕུབ་མ་དང་རུས་པ་སྤངས་པ་ཤིན་ཏུ་གཙང་བ་ཤིན་ཏུ་ཡོངས་སུ་སྦྱངས་པའི་ས་ཕྱོགས་སུ་སྲོག་ཆགས་མེད་པའི་ཆུ་ལ་བའི་རྣམ་ལྔའམ། ཙནྡན་དང་ག་པུར་དང་། གུར་གུམ་གྱི་ཆུས་བསྲེས་པ་ཁྲོ་བོ་གཤིན་རྗེ་གཤེད་ཀྱི་སྔགས་སྟོང་རྩ་བརྒྱད་བཟླས་ཏེ། གཙུག་ཕུད་ལྔའི་ཕྱག་རྒྱ་ཆེན་པོ་དང་ལྡན་པས་ས་ཕྱོགས་དེར་ཕྱོགས་བཞི་དང་སྟེང་དང་། འོག་དང་ཐད་ཀ་དང་ཕྱོགས་མཚམས་ཐམས་ཅད་དུ་བསང་གཏོར་བྱའོ། །དེ་ནས་ཕྱོགས་དེར་ཀུན་ནས་གྲུ་བཞིར་ཁྲུ་བཅུ་དྲུག་གམ་ཁྲུ་བཅུ་གཉིས་སམ་ཁྲུ་བརྒྱད་པ་བྱ་སྟེ། དེ་ལ་ཆེན་པོ་ནི་ཁྲུ་བཅུ་དྲུག་པའོ། །འབྲིང་ནི་ཁྲུ་བཅུ་གཉིས་པའོ། །ཆུང་ངུ་ནི་ཁྲུ་བརྒྱད་པའོ། །དཀྱིལ་འཁོར་འདི་ནི་རྣམ་པ་གསུམ། །ཐམས་ཅད་གཟིགས་པས་གསུངས་པ་ཡིན། །རྒྱལ་པོ་འདོད་པས་ཆེན་པོ་སྟེ། །འབྲིང་ནི་ལོངས་སྤྱོད་འཕེལ་བྱེད་པ། །ཆུང་ངུའི་དམ་ཚིག་ཡང་དག་སྲུང་། །ལས་རྣམས་ཀུན་བྱེད་ཞི་བ་ཡིན། །དེ་དག་ལས་ཡིད་ལ་གང་འདོད་པའི་དཀྱིལ་འཁོར་བྲི་བ་ནི་དེ་ལ་ས་ཕྱོགས་དེར་ཁྲུ་དོ་ཙམ་བརྐོས་ལ། དེར་རྡོ་བ་དང་སོལ་བ་དང་ཐལ་བ་དང་རུས་པ་དང་སྐྲ་ལ་སོགས་པ་དང་། སྲོག་ཆགས་ཀྱི་རིགས་རྣམ་པ་སྣ་ཚོགས་གལ་ཏེ་མཐོང་ན། སའི་ཕྱོགས་གཞན་དུ་བརྐོ་བ་བྱས་ན་གནོད་པ་མེད་པ་དང་འཚེ་བ་མེད་པར་འགྱུར་རོ། །རི་བོའི་རྩེ་མོ་དང་ཆུ་བོའི་ངོགས་དང་རྒྱ་མཚོའི་འགྲམ་དང་ཆུ་བོ་ཆེན་པོའི་ངོགས་སུ་བྱེ་མའི་ཕུང་པོ་ཆེན་པོ་རྣམས་འབད་པས། ཤིན་ཏུ་སོ་སོར་བརྟགས་ཏེ། ཤིན་ཏུ་གཙང་བ་དང་སྲོག་ཆགས་མེད་པར་བྱས་ལ་བྲི་བར་བྱའོ། །ས་ཕྱོགས་དེ་ཡང་སྲོག་ཆགས་མེད་པའི་ཆུ་ལ་བའི་རྣམ་ལྔ་བསྲེས་ཏེ། ཆུ་བོའི་ཀླུང་གིས་གཙང་མའམ། གྲོག་མཁར་གྱི་ས་གང་དུ་སྲོག་ཆགས་མེད་པའི་ས་དེས་དགང་བར་བྱའོ། །བཀང་ནས་ཀྱང་ལེགས་པར་བརྡུངས་ཏེ་ཀུན་ནས་མཉམ་པར་བྱས་ལ་དཀྱིལ་འཁོར་རྣམ་པ་གསུམ་གང་འདོད་པར་བྱའོ།