།ཅི་སྲིད་ནམ་མཁའ་ལྡིང་རྒྱུད་དུ། །ཆོ་ག་རྒྱ་ཆེར་བསྟན་དེ་དག །སེམས་ཅན་རྣམས་ལ་ཕན་པའི་ཕྱིར། །ཐམས་ཅད་ང་ཡིས་བསྟན་པ་སྟེ། །བྱང་ཆུབ་སེམས་དཔའ་ནམ་མཁའ་ལྡིང་། །དུལ་བའི་དོན་དུ་འདི་བསྟན་ཏོ། །གདེངས་ཅན་དུག་ནི་གཞོམ་བྱའི་ཕྱིར། །འདབ་ཆགས་ཚུལ་གྱིས་རྣམ་པར་རྒྱུ། །འཇིག་རྟེན་སྔགས་ནི་ཇི་སྲིད་པ། །ཆོ་ག་འདི་ནི་བསྟན་པ་ན། །སེམས་ཅན་གདུལ་བྱའི་དོན་དུ་ནི། །དེ་ལྟ་དེ་ལྟར་རྣམ་པར་རྒྱུ། །གང་ཡང་དེ་བཞིན་གཤེགས་སྔགས་དང་། །རྡོ་རྗེ་པདྨའི་རིགས་དག་ཀྱང་། །ང་ཡིས་ཆོ་ག་རབ་འབྱམ་དང་། །མདོ་དག་ཀྱང་ནི་བསྟན་པ་ཡིན། །ཇི་ལྟར་མ་མོ་མང་པོ་ནི། །འབད་པས་བྱིས་པ་རྣམས་སྲུང་བ། །དེ་བཞིན་བྱིས་པའི་བློ་ཅན་ལ། །སྔགས་ཀྱི་ཚུལ་གྱིས་ང་ཡིས་བཤད། །སྔོན་ནི་སྟོབས་བཅུ་ལྡན་པས་བསྟན། །ད་ནི་ང་ཡིས་བསྟན་པ་ཡིན། །སྔགས་རྒྱུད་དོན་ནི་མ་ལུས་པ། །འོད་ཆེན་གཞོན་ནུས་བསྟན་པ་ཡིན། །རྒྱལ་བ་མཆོག་གིས་གང་གསུངས་དང་། །སྟོབས་བཅུ་ལྡན་པའི་སྲས་གསུངས་དང་། །རྨད་བྱུང་བསམ་མི་ཁྱབ་ཚུལ་གྱིས། །འཇམ་དབྱངས་ཀྱིས་གསུངས་དེ་དག་གོ། །དེ་ནས་འཇམ་དཔལ་གཞོན་ནུར་གྱུར་པས་ཐམས་ཅད་དང་ལྡན་པའི་གནས་གཙང་མའི་གཞལ་མེད་ཁང་དང་། འཁོར་གྱི་དཀྱིལ་འཁོར་ཆེན་པོ་ལ་གཟིགས་ནས། དམ་ཚིག་ཐམས་ཅད་ཡང་དག་པར་བསྐུལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །གང་དུ་ཏིང་ངེ་འཛིན་ལ་སྙོམས་པར་ཞུགས་པ་ན་སེམས་ཅན་མཐའ་དག་གི་སྒྲུབ་པའི་སྤྱོད་པ་སེམས་ལ་རབ་ཏུ་ཞུགས་པར་གྱུར་ཏོ། །འཇམ་དཔལ་གཞོན་ནུར་གྱུར་པ་སྙོམས་པར་ཞུགས་མ་ཐག་ཏུ་ཐམས་ཅད་དང་ལྡན་པའི་གནས་གཙང་མའི་གཞལ་མེད་ཁང་ནོར་བུ་རིན་པོ་ཆེ་སྣ་ཚོགས་པའི་རྒྱན་བཀོད་པའི་དཀྱིལ་འཁོར་དུ་གྱུར་ཏེ། བསམ་གྱིས་མི་ཁྱབ་ཅིང་རྨད་དུ་བྱུང་བའི་བྱང་ཆུབ་སེམས་དཔའི་རྣམ་པར་འཕྲུལ་པ་རང་སངས་རྒྱས་ཐམས་ཅད་དང་། འཕགས་པ་ཉན་ཐོས་དང་། བྱང་ཆུབ་སེམས་དཔའ་སྤྱོད་པ་ལ་ཞུགས་པ་དང་། ས་བཅུའི་དབང་ཕྱུག་ལ་གནས་པ་དག་གིས་ཀྱང་དཀྱིལ་འཁོར་དེ་བྲི་བའམ་འདྲིར་གཞུག་པར་མི་ནུས་ན་སོ་སོའི་སྐྱེ་བོར་གྱུར་པའི་སེམས་ཅན་གྱིས་ལྟ་སྨོས་ཀྱང་ཅི་དགོས།