།གྲུབ་པ་བསྟན་པའི་ཁུ་ཚུར་དུ་གནས་པའི་རྒྱ་ནི་གཞོན་ནུ་མ་བཞིའི་ཕྱག་རྒྱ་དང་དེ་ཉིད་ཀྱི་སྔགས་ཀྱིས་སོ། །དེ་བཞིན་དུ་སྨིན་དྲུག་གི་བུ་ལ་ནི་མདུང་གི་ཕྱག་རྒྱས་སོ། །དེ་བཞིན་དུ་གཤིན་རྗེ་དང་ཆུ་ལྷ་དང་ལུས་ངན་དང་གནོད་སྦྱིན་དང་སྲིན་པོ་དང་ཤ་ཟ་དང་ལྟོ་འཕྱེ་ཆེན་པོ་ལ་སོགས་པ་སེམས་ཅན་སྲིད་པ་གསུམ་ལ་ཡང་དག་པར་གནས་པ་ཐམས་ཅད་དང་འགྲོ་བ་ཐམས་ཅད་དུ་གཏོགས་པ་དང་ཁམས་ཐམས་ཅད་ན་གནས་པ་དང་སེམས་ཅན་ཐམས་ཅད་ཀྱི་གདོན་དང་མ་མོ་དང་ཤ་རྗེན་ཟ་བ་དང་སྡིག་པ་ཅན་གྱི་སེམས་ཅན་ཐམས་ཅད་དང་ཐམས་ཅད་ཀྱི་ཕྱག་རྒྱ་དང་སྔགས་ཀྱང་ཐམས་ཅད་དུ་གསུངས་པ་ཡིན་ནོ། །རིམ་གྱིས་སྦྱར་ཞིང་མཐར་གྱིས་ཐམས་ཅད་ཀྱི་ཐམས་ཅད་དུ་འགྱུར་གྱི་གཞན་དུ་ནི་མ་ཡིན་ནོ། །དང་པོར་རེ་ཞིག་སྒྲུབ་པ་པོས་ཆོ་གའི་རྒྱལ་པོ་འདི་ལ་དེ་བཞིན་གཤེགས་པ་ལས་བྱུང་བའི་ཕྱག་རྒྱ་ཆེན་པོ་དང་ཕྱག་རྒྱ་དེའི་ཡན་ལག་ཏུ་གྱུར་པ་ལས་བྱུང་བ་དང་འཕགས་པ་ཀུན་ཏུ་བཟང་པོ་དང་མཐུ་ཆེན་ཐོབ་དང་དྲི་མ་མེད་པར་གྲགས་པ་དང་འཇམ་དཔལ་ཁྱོད་ཀྱི་ཨུཏྤ་ལའི་ཕྱག་རྒྱ་དང་བྱང་ཆུབ་སེམས་དཔའ་འདི་དག་གི་ཕྱག་རྒྱ་ཤར་དུ་མངོན་པར་བལྟས་ཏེ་གནས་པ་དང་ཉི་མ་ལ་མངོན་དུ་བལྟས་ཏེ་གནས་ནས། ཐོ་རངས་ལངས་ལ་གཙང་ཞིང་གཙང་བའི་གནས་ལ་གནས་ནས་སྒྲུབ་པ་པོས་ངེས་པར་འདི་དག་གི་ཕྱག་རྒྱ་གང་ཡང་རུང་བ་བཅིངས་ལ་རང་གི་སྤྱི་བོའི་སྟེང་དུ་གཞག་པར་བྱའོ། །འདི་དག་གང་ཡང་རུང་བའི་སྔགས་བརྒྱ་རྩ་བརྒྱད་བཟླས་པ་བྱས་ན་ནད་ཐམས་ཅད་ལས་རྣམ་པར་གྲོལ་བར་འགྱུར་རོ། །ཚེ་རིང་བ་དང་བགེགས་ཐམས་ཅད་ཀྱིས་ཟིལ་གྱིས་གནོན་པར་མི་འགྱུར་རོ། །སེམས་ཅན་ཐམས་ཅད་ཀྱིས་མི་ཚུགས་པར་འགྱུར་རོ། །མྱུར་དུ་གྲུབ་པ་སྟེར་བར་འགྱུར་རོ། །སངས་རྒྱས་ཐམས་ཅད་ཀྱིས་བྱིན་གྱིས་བརླབ་པར་འགྱུར་རོ། །ངེས་པར་བྱང་ཆུབ་ལ་གཞོལ་བར་འགྱུར་རོ། །བྱང་ཆུབ་ཀྱི་སྙིང་པོའི་བར་དུ་འཇམ་དཔལ་གཞོན་ནུར་གྱུར་པ་འདིའི་དགེ་བའི་བཤེས་གཉེན་དུ་འགྱུར་རོ། །སྙིང་པོ་དང་ཕྱག་རྒྱར་འགྱུར་བ་དེ་ཡང་གང་ཞེ་ན། དང་པོར་རེ་ཞིག་དཔའ་བོ་ཆེན་པོའི་ཕྱག་རྒྱ་བཅའ་བར་བྱ་སྟེ། ལག་པ་གཉིས་སྦྱར་བར་བྱས་ལ་སོར་མོ་རྣམས་ནང་དུ་བསྡུས་ཏེ། མཐེ་བོ་གཉིས་བཏེག་ལ་ཚིགས་གསུམ་པའི་ཆ་བཀུག་པ་འདི་ནི་དཔའ་བོ་ཆེན་པོའི་ཕྱག་རྒྱ་དེ་བཞིན་གཤེགས་པ་རྣམས་ཀྱིས་གསུངས་སོ།