།ཤ་རྗེན་ཟ་བ་ཐམས་ཅད་དང་གདོན་དང་མ་མོ་དང་གྲུལ་བུམ་ལ་སོགས་པ་དང་། ཤ་ཟ་རྣམས་དང་མཁའ་འགྲོ་མ་ཐམས་ཅད་དང་སྡིག་པའི་སེམས་དང་ལྡན་པ་ཐམས་ཅད་ལ་ནི་སོར་མོ་བཞི་བསྒྲེང་བའོ། །སྡིག་པ་ཐམས་ཅད་ཀྱི་ཕྱག་རྒྱར་འགྱུར་བ་ནི་སོར་མོ་ཐམས་ཅད་བསྡུས་པའོ། །ལག་སོར་བསྡུས་པའི་ཕྱག་རྒྱ་ནི་དགུག་པའོ། །ལག་སོར་བརྐྱང་བ་ནི་སླར་གཏང་བའི་ཕྱག་རྒྱའོ། །ལས་ཐམས་ཅད་ནི་རང་གི་སེམས་ཀྱིས་བྱའོ། །ཅི་འདོད་པའི་ཕྱག་རྒྱ་འདི་དག་ལ་རང་རང་གི་སྔགས་སྦྱར་བར་བྱའོ། །གཞན་གྱི་ཕྱག་རྒྱར་གཞན་གྱི་ལས་ནི་མི་བྱའོ། །གང་གི་སྔགས་གང་ལ་ཡོད་པ་དེ་དང་དེའི་ཕྱག་རྒྱར་སྦྱར་བར་བྱའོ། །ཕྱག་རྒྱ་འདི་དག་ནི་རིན་ཐང་མཉམ་པ་མེད་པ་ཡིན་ཏེ། སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་སེམས་ཅན་ཐམས་ཅད་ཀྱིས་ཕྱག་རྒྱ་མཐོང་བས་ཁྲོ་བར་བྱེད་མི་ནུས་སོ། །ཕྱག་རྒྱ་ལས་འདའ་བར་བྱེད་པ་ནི་རྣམ་པར་ཉམས་པ་ཐོབ་པར་འགྱུར་རོ། །ཕྱག་རྒྱ་ཉམས་པ་ལས་ནི་དམ་ཚིག་ཉམས་པ་དང་རིག་པ་ཐམས་ཅད་ལས་རྣམ་པར་འདས་པར་འགྱུར་རོ། །མཐར་ཡང་ངུ་འབོད་ཀྱི་འགྲོ་བ་ཐོབ་པར་འགྱུར་རོ། །དམྱལ་བ་ཆེན་པོ་མནར་མེད་པར་ཡང་ཤིན་ཏུ་བརྟན་པར་སྐྱེ་བ་ཐོབ་པར་འགྱུར་བ་ནི་ཕྱག་རྒྱ་ལ་བགེགས་བྱེད་པས་སོ། །གང་ཡང་ཕྱག་རྒྱ་དང་དམ་ཚིག་ལ་གནས་པ་དེ་དག་ནི་ཡུན་རིང་པོ་མི་ཉུང་བར་བདེ་བར་འགྱུར་ཏེ། ལྷའི་གནས་ཆེན་པོའི་འགྲོ་བར་སྐྱེ་བར་འགྱུར་རོ། །མཐར་ཡང་ངེས་པར་བྱང་ཆུབ་ལ་གཞོལ་བར་འགྱུར་རོ། །མདོར་ན་དང་པོའི་སངས་རྒྱས་དང་བྱང་ཆུབ་སེམས་དཔའ་རྫུ་འཕྲུལ་ཆེན་པོ་དག་གིས་ཕྱག་རྒྱ་རྣམ་པ་མང་པོ་རྣམས་རབ་ཏུ་གསུངས་སོ། །སེམས་ཅན་ཐམས་ཅད་ཀྱིས་ཀྱང་འདིའི་མཐའ་རྟོགས་པར་རམ་གཟུང་བར་རམ་གྲངས་རྩི་བར་བྱེད་པར་མི་ནུས་སོ། །མདོར་ན་རྒྱལ་བའི་རིགས་ཀྱི་རིག་པའི་རྒྱལ་པོ་འཁོར་ལོས་སྒྱུར་བའི་ཡི་གེ་གཅིག་པ་དེའི་ཕྱག་རྒྱར་འགྱུར་བ་ནི་ལག་པ་གཡས་གཡོན་སྔ་མ་བཞིན་དུ་ཁུ་ཚུར་དུ་བྱས་ལ། གུང་མོ་གཉིས་ཕྱིར་ཕྱུང་ལ་བརྐྱང་སྟེ་གཅིག་ཏུ་རྩེ་སྤྲད་ལ། གཉི་གའི་ཡང་རྩེ་མོའི་ཚིགས་བཀུག་ལ་མཛུབ་མོ་གཉིས་ཀྱི་ཚིགས་གཉིས་བཀུག་ཅིང་སེན་མོ་གཉིས་ཕན་ཚུན་རྩེ་སྤྲད་དེ། མཐེ་བོ་གཉིས་ཀྱི་སེན་མོའི་སྟེང་དུ་བཞག་པ་འདི་ནི་འཁོར་ལོས་སྒྱུར་བའི་ཕྱག་རྒྱ་སྟེ།