Degé Kangyur volume 88, F.277.a

།མཛུབ་མོ་དེ་ཉིད་ཀྱི་རྩེ་མོ་ཡང་དག་པར་བཀུག་ལ་གུང་མོ་སྦྱར་བའི་སེན་མོ་དང་ཚིགས་ནང་དུ་ཡང་དག་པར་སྦྱར་བ་ནི་འཁོར་ལོས་སྒྱུར་བ་ཆེན་པོའི་ཕྱག་རྒྱའོ། །​མཛུབ་མོ་དེ་ཉིད་ཀྱི་རྩེ་མོ་གཉིས་ཡང་དག་པར་བཀུག་ལ་གུང་མོ་སྦྱར་ཞིང་འོག་ཏུ་ཡང་དག་པར་སྦྱར་ཏེ། གདུབ་ཀོར་ལྟར་བྱས་པ་ནི་འཁོར་ལོས་སྒྱུར་བ་ཆེན་པོའི་ཕྱག་རྒྱའོ། །​མཛུབ་མོ་དེ་ཉིད་ཀྱི་རྩེ་མོ་ཡང་དག་པར་བཀུག་ལ་གུང་མོའི་ཚིགས་གསུམ་པའི་ནང་དུ་ཡང་དག་པར་སྦྱར་བ་ནི་སྔགས་ཀྱི་བདག་པོ་འཁོར་ལོས་སྒྱུར་བ་ཆེན་པོའི་ཕྱག་རྒྱ་སྟེ། སྲིད་པའི་ལས་ཐམས་ཅད་རྣམ་པར་འཇིག་པར་བྱེད་པ། སེམས་ཅན་ཐམས་ཅད་ཀྱི་ཉེ་བར་འཚོ་བ་ཚེ་དང་ནད་མེད་པ་དང་དབང་ཕྱུག་དང་བསམ་པ་ཐམས་ཅད་ཡོངས་སུ་རྫོགས་པར་བྱེད་པ། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱེད་པ། སེམས་ཅན་ཐམས་ཅད་ཡོངས་སུ་དགའ་བར་བྱེད་པ། སེམས་ཅན་ཐམས་ཅད་ཀྱི་ཡིད་ལ་མངོན་པར་འདོད་པ་འབྲས་བུ་དང་བཅས་པར་བྱེད་པ། ལས་ཐམས་ཅད་བྱེད་པ། སྔགས་ཐམས་ཅད་རབ་ཏུ་སྒྲུབ་པར་བྱེད་པ། ཕྱག་རྒྱ་དང་སྔགས་ཐམས་ཅད་དང་ལྡན་པ་ཡིན་ཏེ། འཇམ་དཔལ་གཞོན་ནུར་གྱུར་པ་ཁྱོད་དེ་ཉོན་ཅིག །​དང་པོ་རེ་ཞིག་གཙུག་ཏོར་གྱི་མཚན་ཉིད་དུ་གྱུར་པ་ནི། ལག་པ་གཉིས་མཉམ་པོར་བཀན་ཅིང་བརྐྱང་བར་བྱའོ། །​མཐེ་བོ་དང་སྲིན་ལག་གཉིས་ལག་པའི་དཀྱིལ་དུ་སེན་མོས་བཟུང་ཞིང་མཐེ་བོའི་རྩེ་མོ་སྦྱར་བར་བྱའོ། །​མཐེའུ་ཆུང་གཉིས་ཀྱི་རྩེ་མོ་གཏུག་ཅིང་སྦྱར་བར་བྱའོ། །​དེ་བཞིན་དུ་གུང་མོ་གཉིས་ཀྱི་སེན་མོ་དང་རྩེ་མོ་གཉིས་སྦྱར་བར་བྱ་ཞིང་མཛུབ་མོ་དང་མཛུབ་མོ་ཡང་སྦྱར་བར་བྱའོ། །ཀུན་ཏུ་སྣང་བའི་གཙུག་ཏོར་གྱི་མཚན་ཉིད་ཆེན་པོ་ཞེས་བྱ་བའི་ཕྱག་རྒྱ་ཡིན་ཏེ། འདིར་སྔགས་ནི། ཨཾ་མུ་ཧྃ། མཛུབ་མོ་དེ་ཉིད་ཡང་དག་པར་བཀུག་སྟེ། སེན་མོ་དང་སེན་མོའི་རྩེ་མོའི་དཀྱིལ་འཁོར་ལྟར་སྦྱར་བས་ནི། ལྟ་བ་ངན་པའི་ཟུག་རྔུའི་ཕྱིན་ཅི་ལོག་སེལ་བ་ཞེས་བྱ་བ་ཆོས་ཀྱི་འཁོར་ལོ་ཆེན་པོའི་ཕྱག་རྒྱའོ། །​འདིར་སྔགས་སུ་འགྱུར་བ་ནི། ཨོཾ་བཛྲཱ་ཤ་ནི་ཧཱུྃ་ཕཊ། འདི་ནི་སྐྱིལ་ཀྲུང་གི་ཕྱག་རྒྱ་སྟེ། སྔགས་དང་ཡང་དག་པར་ལྡན་ན་ལས་ཐམས་ཅད་བྱེད་པ། ཇི་ལྟར་སྟོན་ཀའི་སྤྲིན་བཞིན་དུ་བགེགས་ཐམས་ཅད་འཇིགས་པར་བྱེད་པ། གང་ཡང་བདུད་བཞིས་བྱམས་པ་དང་གང་ཡང་ལྷ་དང་ལྷ་མ་ཡིན་གྱི་བགེགས་རྣམས་ནི་སྐྱིལ་ཀྲུང་གི་ཕྱག་རྒྱ་དམ་པ་མཐོང་བ་ཙམ་གྱིས་འཇིགས་པར་འགྱུར་རོ།

PreviousNext


The English translation of this folio by 84000 - Translating the words of the Buddha can be found at:
https://read.84000.co/translation/toh543.html?part=UT22084-088-038-19261#UT22084-088-038-19261