ཆུབ་སེམས་དཔའ་ཐམས་ཅད་དང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་དང་ཉན་ཐོས་དང་རང་སངས་རྒྱས་ཐམས་ཅད་དང་རྫུ་འཕྲུལ་ཆེན་པོ་དང་ལྡན་པའི་སེམས་ཅན་ཐམས་ཅད་དང་རིག་པའི་རྒྱལ་པོ་རྣམས་འོད་ཟེར་གྱིས་ཡང་དག་པར་བསྐུལ་ནས་ལྷགས་པར་གྱུར་ཏོ། །འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན་རྣམ་པར་གནས་པའི་སེམས་ཅན་མང་པོ་དབང་དུ་གྱུར་ཏོ། །དམྱལ་བ་དང་དུད་འགྲོ་དང་ཡི་དགས་ཀྱི་ངན་འགྲོ་ལ་གནས་པ་རྣམས་འོད་ཟེར་ཆེན་པོའི་སྣང་བས་རེག་ཅིང་སྣང་བར་བྱས་པས་སྡུག་བསྔལ་གྱི་ཚོར་བའི་རྒྱུན་ལ་གནས་པ་ཡིད་ཤིན་ཏུ་བདེ་བས་ཚིམ་ཞིང་སྐྱོ་བ་མེད་པར་གྱུར་ཏེ། ངེས་པར་ཐེག་པ་གསུམ་ལ་གནས་པར་གྱུར་ཏོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་འཁོར་གྱི་དཀྱིལ་འཁོར་དེ་ལ་གཟིགས་ནས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཉོན་ཅིག་རིག་པའི་རྒྱལ་པོ་འདི་རྫུ་འཕྲུལ་ཆེ་བ་དཔའ་བོ་གཅིག་པུ་ལས་ཐམས་ཅད་བྱེད་པ། རིག་པ་ཐམས་ཅད་ཀྱི་རྒྱལ་པོ་འཁོར་ལོས་སྒྱུར་བ། སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་མཛད་པ་ཆོ་ག་ཞིབ་མོ་ཐམས་ཅད་ཡོངས་སུ་རྒྱས་པ། ཁྱོད་ཀྱི་སྔགས་དང་རྒྱུད་དང་། ཆོ་ག་རབ་འབྱམ་ལ་ཡང་དག་པར་ཞུགས་པ། སྔགས་ཐམས་ཅད་སྒྲུབ་པར་བྱེད་པ། ཐུན་མོང་དུ་གྱུར་པ། གྲགས་པ་ཆེ་བ་དང་། སྤྲོ་བ་ཆེ་བ་དང་། སེམས་ཅན་སྒྲུབ་པ་པོའི་ཁྱད་པར་གྱི་ཐབས་དང་ཤེས་རབ་ལ་མཁས་པ་བྱང་ཆུབ་ཀྱི་ལམ་ཐམས་ཅད་ཡོངས་སུ་སྦྱོང་བར་བྱེད་པ། མྱ་ངན་ལས་འདས་པ་ལ་རབ་ཏུ་འཇུག་པར་བྱེད་པ། བདུད་ཟིལ་གྱིས་གནོན་པར་བྱེད་པ། བྱང་ཆུབ་ཀྱི་སྙིང་པོ་ལ་གནས་པར་བྱེད་པ། དགེ་བའི་ཚོགས་ཡང་དག་པར་འབྱུང་བར་བྱེད་པའོ། །འདི་ཉིད་མདོར་བསྡུ་ན། ཆོ་ག་ཞིབ་མོ་རྒྱས་པ་རས་རིས་ཀྱི་ཆོ་གའི་དཀྱིལ་འཁོར་སྒྲུབ་པའི་ཐབས། སྔོན་གྱི་སྔགས་ཀྱི་སྤྱད་པ་རྗེས་སུ་སྤྱོད་པ། གང་ལ་རབ་ཏུ་གནས་ན་སེམས་ཅན་གྱི་རིག་པའི་རྒྱལ་པོ་འཁོར་ལོས་སྒྱུར་བ་ཆེན་པོ་སྒྲུབ་པར་འགྱུར་ཏེ། རྨད་དུ་བྱུང་བ་ཆེན་པོ་སྔགས་ཐམས་ཅད་ཀྱི་དབང་ཕྱུག་དམ་པ། འོད་བྱེད་པ། ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་པ། རྣམ་པར་འདྲེན་པ། འགྲོ་བ་ཐམས་ཅད་ལ་ཕན་པར་བྱེད་པ། སངས་རྒྱས་བཞིན་དུ་མངོན་སུམ་དུ་ཉེ་བར་བཞུགས་པ་རང་བྱུང་དུ་གྱུར་པ་མཆོག་དང་བར་མ་དང་ཐ་མའི་ལས་ཐམས་ཅད་བྱེད་པ་ཤིན་ཏུ་བདེ་བ་དམ་པ་ཤིས་པ་དང་ཞི་བར་བྱེད་པ་སྡིག་པ་ཐམས་ཅད་རབ་ཏུ་འཇིག་པར་བྱེད་པའོ།