Degé Kangyur volume 88, F.188.b

ཀུན། །​དེ་བཞིན་མི་ཡི་དབང་པོ་ཉིད། །​སེམས་ཅན་ཀུན་ལ་དབང་དོན་དང་། །​ཡང་ན་རྒྱལ་པོ་དབང་དུ་འགྱུར། །​དེ་བཞིན་རྟག་ཏུ་ལས་ཀུན་ལ། །​སྦྱིན་སྲེག་གིས་ནི་ཀུན་དུ་བྱ། །​ཐམས་ཅད་ཀུན་ལ་བརྩོན་བདག་ཉིད། །​ལས་ཀུན་ལས་ནི་བསྟེན་བྱས་ན། །​དེ་ནི་ངེས་པར་འགྲུབ་འགྱུར་ཏེ། །​ལས་དགེའི་དོན་ནི་དམ་པ་ཡིན། །​བར་མ་ཉིད་ཀྱང་འགྲུབ་པར་འགྱུར། །​ཐ་མའི་ལས་ཀྱང་དེ་བཞིན་ནོ། །​རྫས་རྣམས་དག་ནི་དེ་བཞིན་དུ། །​གྲུབ་དང་ལྡན་པའང་རྣམ་པ་གསུམ། །​འབྲས་དང་བཅས་པར་གྲུབ་སྣང་སྟེ། །​སྦྱིན་སྲེག་ལས་ལ་རབ་ཏུ་བསྟན། །​ཕྱག་རྒྱ་གཙུག་ཕུད་ལྔ་བཅིངས་ནས། །​སྔགས་ཀྱང་སྐྲ་ཅན་མས་བྱས་ན། །​ལས་རྣམས་ཀུན་ནི་བྱ་བ་དང་། །​སྔགས་པས་བདག་ཉིད་བསྲུང་བ་བྱ། །​སྦྱིན་སྲེག་ལས་ལ་རབ་འཇུག་པས། །​དེ་ནས་སྔགས་འདི་བརྗོད་པར་བྱ། །​བདུན་ནམ་བརྒྱད་དུ་བཟླས་པ་ཡིས། །​ལས་འདི་ལ་ནི་རྟག་ཏུ་བྱ། །​ན་མཿསརྦ་བུད་དྷཱ་བོ་དྷི་སཏྭཱ་ནཱཾ། ཨ་པྲ་ཏི་ཧ་ཏ་ག་ཏིཾ་ག་ཏཱ་ནཱཾ། ཏདྱ་ཐཱ། ཨོྃ་ཛྭ་ལ་ཏིཥྛ་ཧཱུཾ་རུ་རུ་བི་ཤྭ་སཾ་བྷ་བ་སཾ་བྷ་བེ་སྭཱ་ཧཱ། སྔགས་ཀྱི་སྦྱོར་བ་འདི་ཡིས་ནི། །​ཡང་དང་ཡང་དུ་ཤིང་ལ་བཟླ། །​གཉིས་སམ་བདུན་དུ་བཟླས་པ་ཡིས། །​སྔགས་རིག་དེས་ནི་སྦྱིན་སྲེག་བྱ། །​མེ་ཏོག་བདུག་པ་དྲི་ཡང་རུང་། །​མ་ལུས་ཐམས་ཅད་དག་དང་ནི། །​ཆུ་ལ་སྔགས་རྣམས་བཟླས་པ་ཡང་། །​འདི་ཉིད་ཀྱིས་ནི་སྦྱིན་པར་བྱ། །​ལས་རྣམས་ཀུན་གྱི་རྒྱུ་ཡི་ཕྱིར། །​དེ་ནས་ཆོ་ག་བརྩམ་པར་བྱ། །​ལས་རྣམས་དག་ནི་ཐམས་ཅད་ལ། །​སྔ་མའི་སྦྱོར་བ་ཉིད་ཀྱིས་བྱ། །​སྔ་མའི་གཙུག་པུད་ལྔ་བཅིངས་ཏེ། །​ཕྱག་རྒྱ་ཆེན་པོ་གྲགས་ལྡན་མ། །​སྔ་མའི་གཙུག་པུད་ལྔ་བཅིངས་བྱ། །​སྐྲ་ཅན་མ་ཉིད་རབ་བཟླས་པས། །​དེས་ན་སྲུང་བ་བྱེད་པར་འགྱུར། །​གྲུབ་པའི་རྒྱུ་ལ་འཇིགས་མེད་པས། །​ལས་རྣམས་ཐམས་ཅད་བརྩམ་པར་བྱ། །​གལ་ཏེ་ལ་ཉེ་བཟང་མཐོང་བའམ། །​རྟག་ཏུ་དགེ་བའི་སྒྲ་ཐོས་ན། །​དེ་ལ་སྔགས་ནི་དོན་ཡོད་དེ། །​ཇི་ལྟར་འདོད་བཞིན་མཆོག་སྩོལ་འགྱུར། །​དང་པོའི་ལས་ལ་རབ་སྦྱོར་དང་། །​སྔགས་ཀྱི་རྒྱུ་ལ་རབ་འཇུག་ན། །​ཐམས་ཅད་འབྲས་བུ་བཅས་པ་དང་། །​དེ་ལ་གྲུབ་



The English translation of this folio by 84000 Translating the words of the Buddha can be found at:
https://read.84000.co/translation/toh543.html?part=UT22084-088-038-19083#UT22084-088-038-19083