།ཚུལ་ཁྲིམས་བསམ་གཏན་རྣམ་ཐར་རྣམས། །མདོར་བསྡུས་འདི་ཡིས་ཐོབ་པ་སྟེ། །དོན་ཀུན་སྒྲུབ་བྱེད་གྲུབ་པ་སྟེ། །རྒྱལ་བ་མཆོག་གིས་གསུངས་པ་ཡིན། །ནོར་རྣམས་རྒྱས་པར་འཐོབ་འགྱུར་ཏེ། །དམ་པའི་འགྲོ་བར་གནས་པ་དང་། །དེ་བཞིན་རྟག་ཏུ་གནོད་སྦྱིན་སྤྱན། །ལྷ་མིའི་རྒྱལ་སྲིད་བྱེད་པར་འགྱུར། །མི་ལྷ་ལྷ་མིན་འཇིག་རྟེན་གྱི། །དེ་བཞིན་བདག་པོ་ཐོབ་འགྱུར་ཏེ། །བདག་པོ་མ་ལུས་དེ་དག་གི། །སྔགས་པས་ཐམས་ཅད་འཐོབ་པ་དང་། །འབྲས་བཅས་བྱ་བ་བྱེད་པར་འགྱུར། །གཙང་སྦྲའི་སྤྱོད་དང་ལྡན་པ་དང་། །ཚུལ་ཁྲིམས་བསམ་གཏན་རྟག་ཏུ་དགའ། །རྒྱུད་རྣམས་ཀུན་ལས་གསུངས་པ་ཡི། །སྔགས་པས་བཟླས་པ་རྟག་ཏུ་བྱ། །སྔགས་པ་འབྱོར་པ་འདོད་པ་ཡིས། །ལས་རྣམས་སྣ་ཚོགས་བྱ་བ་སྟེ། །དེ་བཞིན་མཆོག་དང་བར་མ་དང་། །ཐ་མ་ཉིད་ཀྱང་བྱ་བ་ཡིན། །ཐ་མས་ལོངས་སྤྱོད་འཕེལ་པའི་གནས། །འབྲིང་གིས་གོང་མའི་ལུས་ཐོབ་ཅིང་། །མཆོག་གིས་རབ་ཏུ་འགྲོ་བ་སྟེ། །ཟློས་པས་རྟག་ཏུ་ཐོབ་པར་འགྱུར། །སྔགས་པས་ཟློས་མཐར་ངལ་བསོ་ཞིང་། །ཇི་སྲིད་དུས་སུ་བསྡད་པར་བྱ། །ཟློས་པས་དུས་ལ་བབ་པ་ན། །དེར་ནི་བསྒྲུབ་པ་བྱ་བ་ཡིན། །དེ་ལྟར་མོད་ཀྱི་དེ་ལ་སྔགས་པས་ལས་རྣམས་བསྒྲུབ་པ་ན་དེར་རྟག་ཏུ་བཟླས་ན། སྐྱེས་བུ་རྣམས་ཀྱི་སྡིག་པ་ཟད་པར་བྱེད་ཅིང་། ལས་རྣམ་པ་སྣ་ཚོགས་སྐྱེ་བ་བརྒྱུད་པ་དག་ཏུ་གང་དུ་གང་བྱས་པ་དེ་དག་ལ་གྲུབ་པ་གནས་པར་ནམ་ཞིག་འགྱུར་ཞེ་ན། སྐྱེས་བུས་ཇི་སྲིད་ཚོགས་པ་རྙེད་པ་ན། སྔགས་པའི་ངོ་བོས་སྔགས་བཟླས་པ་ན་སྡིག་པ་ཟད་པའི་དོན་དང་ལས་བསྲབས་པས་སྔགས་འགྲུབ་པར་འགྱུར་ཏེ། དེ་བཞིན་དུ་མཆོག་དང་བར་མ་དང་ཐ་མ་དང་འཇིག་རྟེན་གྱིས་མཆོད་པ་དང་། བཟླས་པས་སྡིག་པ་མཐའ་དག་ཟད་པར་བྱེད་ཅིང་། ལུས་ཅན་ཐམས་ཅད་ཀྱི་སྐྱེ་བ་བརྒྱུད་པ་དག་ཏུ་གང་བྱས་པའི་སྡིག་པ་དེ་དག་ཐམས་ཅད་འཇིག་པར་བྱེད་དེ། དེ་བཞིན་གཤེགས་པ་རྣམས་ཀྱི་སྔགས་བཟླས་ན་ལུས་རྒྱན་རྣམ་པ་སྣ་ཚོགས་ཀྱིས་བརྒྱན་པ་ཡིད་དགའ་ཞིང་། ཡོན་ཏན་ཐམས་ཅད་ཀྱིས་གྲགས་པར་འགྱུར་བ་དང་། གནོད་སྦྱིན་གྱི་ཚོགས་ཀྱི་རྒྱལ་པོ་ཉིད་དང་རྟག་ཏུ་དོན་ཐམས་ཅད་ཐོབ་པ་དང་ལྡན་པ་ཡིན་ནོ།