མཐོང་བ་ཙམ་གྱིས་གྲོལ་འགྱུར་ཏེ། །རས་རིས་མཐོང་བ་ཙམ་གྱིས་ཀྱང་། །དེ་ཡི་མོད་ལ་གྲོལ་བར་འགྱུར། །སངས་རྒྱས་བྱེ་བ་སྟོང་ཕྲག་ལ། །བློ་དང་ལྡན་པས་བསྙེན་བཀུར་བས། །རས་རིས་ཐ་མ་མཐོང་བ་ནི། །བཅུ་དྲུག་ཆར་ཡང་མི་ཕོད་དོ། །སངས་རྒྱས་སྐྱོབ་པ་ཀུན་ལ་ནི། །མཆོད་བྱས་བསོད་ནམས་གང་ཡིན་པ། །མཁས་པས་བསོད་ནམས་གང་ཐོབ་དེ། །རས་རིས་མཐའ་མ་མཐོང་བའི་ཡིན། །དགེ་བ་དག་གི་ལས་རྣམས་ལ། །ལོངས་སྤྱོད་ཕྱིར་ཡང་འདིར་སྤྱད་དོ། །སྔགས་རྣམས་གང་དག་ཅི་ཡོད་པ། །ཚངས་དབང་དྲང་སྲོང་གིས་བཤད་དང་། །ནམ་མཁའ་ལྡིང་གིས་གང་བཤད་དང་། །ཆུ་ལྷ་ཉི་མ་ལུས་ངན་དང་། །ནོར་སྦྱིན་སོགས་དང་སྲིན་པོ་དང་། །ལྷ་མིན་དབང་པོ་ལྟོ་འཕྱེ་དང་། །ཟླ་བ་རླུང་དང་གཤིན་རྗེ་སོགས། །ཁྱབ་འཇུག་ལྷ་ཆེན་སོགས་བཤད་པ། །སྔགས་རྣམས་འདིར་ནི་བཀུག་པ་དག །རས་རིས་མདུན་དུ་དངོས་གྲུབ་འགྱུར། །འདིར་ནི་ཞི་བ་བྱ་བ་སྟེ། །དེ་བཞིན་དུ་ནི་རྒྱས་པ་བྱ། །འདིར་ནི་མངོན་སྤྱོད་སྤང་བྱ་སྟེ། །ཐུབ་པ་མཆོག་གིས་སྨད་པ་ཡིན། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོའི་མདོ་སྡེ་ཤིན་ཏུ་རྒྱས་པ་ལས། འཇམ་དཔལ་གྱི་རྩ་བའི་ཆོ་ག་ཞིབ་མོ་ལེའུ་དྲུག་པའི་ཆོ་ག་རབ་འབྱམ་ལས། རས་རིས་ཆུང་ངུ་གསུམ་པའི་ཆོ་ག་རྫོགས་སོ།། །།དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས། བཅོམ་ལྡན་འདས་ཤཱཀྱ་ཐུབ་པ་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་ཀྱི་རྣམ་གྲངས་འདི་བཤད་པ་ནི་ལེགས་སོ་ལེགས་སོ། །རིག་པ་ཐམས་ཅད་ཀྱི་བརྟུལ་ཞུགས་སྤྱད་པའི་དོན་དང་། ཕན་པ་དང་བདེ་བ་དང་འཇིག་རྟེན་ལ་སྙིང་བརྩེ་བའི་ཕྱིར་དང་། བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པ་སྟོན་པ། ཕུང་པོ་ལྷག་མ་དང་བཅས་པའི་མྱ་ངན་ལས་འདས་པའི་གྲོང་ཁྱེར་དུ་འགྲོ་བར་བྱེད་པ། བྱང་ཆུབ་སེམས་དཔའ་རྣམས་ཀྱི་རྒྱུད་ངེས་པར་བྱང་ཆུབ་སྒྲུབ་པར་བྱེད་པ།