།སངས་རྒྱས་བཅོམ་ལྡན་འདས་ཀྱི་འོག་ཏུ་ནི་པདྨའི་མཚོ་ལས་འཕགས་པ་འཇམ་དཔལ་གྱི་ཞབས་དྲུང་དང་ཉེ་བ་ན། ཀླུའི་རྒྱལ་པོ་ཉེ་དགའི་ཕྱོགས་སུ་རིན་པོ་ཆེ་ཆེན་པོའི་རི་བོ་པདྨའི་མཚོ་ལས་མངོན་པར་འཐོན་པ་རིན་པོ་ཆེའི་མྱུ་གུ་དང་ཕུག་དང་རི་སུལ་དང་བྱི་རུའི་ཡལ་ག་དང་རིན་པོ་ཆེའི་ཤིང་གིས་ཡོངས་སུ་བསྐོར་བ། དྲང་སྲོང་ཆེན་པོའི་གནས་དང་གྲུབ་པ་དག་གིས་དེ་ལ་བརྟེན་པ། རིའི་རྩེ་མོའི་སྟེང་དུ་ཁྲོ་བོའི་རྒྱལ་པོ་གཤིན་རྗེ་གཤེད་ཤིན་ཏུ་མི་བཟད་པའི་གཟུགས་ཅན། ལག་པ་གཡས་པ་ན་ཞགས་པ་ཐོགས་པ། ལག་པ་གཡོན་པ་ན་གཞུ་ཐོགས་པ། བཞིན་ཁྲོ་གཉེར་དང་ལྡན་པ། བཀའ་ཉན་ཅིང་འཕགས་པ་འཇམ་དཔལ་ལ་ཕྱོགས་ཏེ་ལྟ་བ་གསུས་པ་འཕྱང་བ། སྐྲ་གྱེན་དུ་བརྫེས་པ། མིག་སྨན་ནག་པོ་དང་སྤྲིན་ནག་པོ་དང་འདྲ་བ། ཁ་སྤུ་སེར་བ་སེན་མོ་རིང་བ་མིག་དམར་བ། མགུལ་བའི་ཕྱོགས་སྦྲུལ་གྱིས་བརྒྱན་པ། སྟག་གི་པགས་པ་མནབས་པ་བགེགས་ཐམས་ཅད་རྣམ་པར་འཇོམས་པར་བྱེད་པ་རབ་ཏུ་མི་བཟད་པ་ཆེན་པོ་ཁྲོ་བོའི་རྒྱལ་པོ་ཆེན་པོ་ཀུན་ནས་འབར་བ་ཁྲོ་བོའི་རྒྱལ་པོ་གཤིན་རྗེའི་གཤེད་བྲི་བར་བྱའོ། །རི་དེའི་འོག་ཏུ་རྡོའི་སྟེང་ན་འདུག་པ། ལུས་ས་ལ་བཏུད་དེ་སྤོས་ཀྱི་སྣོད་ལག་ན་ཐོགས་པ། ཆ་བྱད་དང་དབྱིབས་ཅི་ལྟ་བ་བཞིན་རྟགས་འཛིན་པ། ཇི་ལྟར་རྗེས་སུ་མཐུན་པའི་སྤྱོད་པ་དང་། འཕགས་པ་འཇམ་དཔལ་གྱི་རྗེས་སུ་ལྟ་བའི་སྒྲུབ་པ་པོ་བྲི་བར་བྱའོ། །ཀླུའི་རྒྱལ་པོ་དགའ་བོ་དང་ཉེ་བར་བཅོམ་ལྡན་འདས་ཤཱཀྱ་ཐུབ་པའི་འོག་དེའི་གཡས་ངོས་སུ་པདྨའི་མཚོ་ལས་མངོན་པར་བྱུང་བའི་རིན་པོ་ཆེའི་རིའི་རྒྱལ་པོ། ཇི་ལྟར་སྔར་རིའི་རྒྱལ་པོར་བསྟན་པ་དེ་བཞིན་དུ་བྲི་བར་བྱའོ། །ཁྲོ་བོའི་རྒྱལ་པོ་གཤིན་རྗེའི་གཤེད་མེད་པ་ལྷའི་མེ་ཏོག་གིས་ཁྱབ་པ་བྲི་བར་བྱའོ། །རི་དེ་ཡང་འཕགས་པ་སྤྱན་རས་གཟིགས་དབང་ཕྱུག་གི་འོག་ཏུ་བྲིའོ། །རི་དེ་ཡང་ཤིན་ཏུ་མཐོ་བ་རིན་པོ་ཆེ་པདྨ་རཱ་གའི་ཐེམ་སྐས་འདྲ་བ། བཻ་ཌཱུརྱའི་རང་བཞིན་རྩེ་མོ་མྱུ་གུ་འདྲ་བ་བྲི་བར་བྱའོ། །དེ་ལ་བརྟེན་པའི་ལྷ་མོ་འཕགས་པ་སྤྱན་རས་གཟིགས་དབང་ཕྱུག་གི་ཐུགས་རྗེའི་ངོ་བོ་འཕགས་མ་སྒྲོལ་མ་རྒྱན་ཐམས་ཅད་ཀྱིས་བརྒྱན་པ། དར་ལ་དམར་པོས་སྟོད་གཡོགས་བྱས་པ་ཁ་དོག་རྣམ་པ་སྣ་ཚོགས་དང་ལྡན་པའི་གོས་ཅན། བུད་མེད་ཀྱི་རྒྱན་ཐམས་ཅད་ཀྱིས་ལུས་བརྒྱན་པ།