།དེ་ནས་འཇམ་དཔལ་གཞོན་ནུར་གྱུར་པས་རང་གི་རྫུ་འཕྲུལ་གྱི་རྣམ་པར་འཕྲུལ་པས་རིན་པོ་ཆེའི་པདྨ་སྤྲུལ་པ་ལ་བཅོམ་ལྡན་འདས་ཤཱཀྱ་ཐུབ་པ་ལ་བལྟ་ཞིང་འདུག་གོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་ལ་དེ་བཞིན་གཤེགས་པ་དང་རྗེས་སུ་མཐུན་པའི་གཏམ་རྣམ་པ་སྣ་ཚོགས་སྔོན་དུ་འགྲོ་བ་མཛད་ནས་ཆོས་བསྟན་པ་དང་རྗེས་སུ་མཐུན་པ་དང་། བྱང་ཆུབ་སེམས་དཔའི་སྤྱོད་པ་སྒྲུབ་པ་དང་རྗེས་སུ་མཐུན་པས་ཚངས་པའི་དབྱངས་དང་། ཀ་ལ་པིང་ཀའི་སྐད་དང་འབྲུག་སྒྲ་དང་། རྔ་བོ་ཆེའི་སྒྲ་སྐད་ཀྱི་གསུང་གི་དབྱངས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་གཞོན་ནུར་གྱུར་པ་ཁྱོད་ལེགས་པར་འོངས་སམ། །སེམས་དཔའ་ཆེན་པོའི་སྤྱོད་པ་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་བསྒྲུབ་པས་བྱང་ཆུབ་སེམས་དཔའ་ཐམས་ཅད་ཀྱི་དོན་ཐོབ་པར་བྱེད་པ། སྔགས་ཐམས་ཅད་ཀྱི་ཚིག་དང་གསང་བ་དང་བཅས་པ་དང་། དབང་བསྐུར་བ་དང་ཕྱག་རྒྱ་དང་། དཀྱིལ་འཁོར་དང་ཆོ་ག་དང་། དབང་བསྐུར་བ་དང་ཚེ་དང་ནད་མེད་པ་དང་། དབང་ཕྱུག་དང་བསམ་པ་ཐམས་ཅད་ཡོངས་སུ་རྫོགས་པར་བྱེད་པ། སྒྲུབ་པའི་ཐབས་ཐམས་ཅད་དང་ལྡན་པ་རྒྱུད་ཤེས་པ་དང་། ཤེས་བྱ་དང་དུས་དང་མི་སྣང་བ་དང་། རྒྱལ་པོའི་ཞིང་དུ་གྱུར་པ་འདས་པ་དང་མ་འོངས་པ་དང་ད་ལྟར་བྱུང་བ་ཤེས་པར་བྱེད་པ་མདོར་ན་སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་བྱེད་པ། རང་གི་ཡོན་ཏན་དང་མཐུན་པའི་སྔགས་ཀྱི་སྤྱོད་པ་རྗེས་སུ་འཇུག་པ། སེམས་ཅན་གཞན་དགའ་བར་བྱེད་པ་མི་སྣང་བར་འགྲོ་བ། ནམ་མཁའ་ལ་འགྲོ་བ། ཆུ་ལ་མི་ནུབ་པར་འགྲོ་བ། ཡིད་གཞུངས་པར་བྱེད་པ། འགུགས་པར་བྱེད་པ། ས་འོག་ཏུ་འཇུག་པ། མངོན་དུ་སྤྱོད་པར་བྱེད་པ། འདོད་པ་ཐམས་ཅད་ཐོབ་པར་བྱེད་པ། གནོད་སྦྱིན་དང་། གནོད་སྦྱིན་མོ་ཐམས་ཅད་དང་། མངག་གཞུག་པ་དང་ཤ་ཟ་དང་འབྱུང་པོ་ཐམས་ཅད་འགུགས་པར་བྱེད་པ། བྱིས་པ་དང་། རྒན་པོ་དང་གཞོན་ནུ་གནས་ཅི་ལྟ་བ་བཞིན་འཇོག་པར་བྱེད་པ། མདོར་ན་ལས་ཐམས་ཅད་བྱེད་པ་སྟེ། ཡིད་ལ་རེ་བ་ཐམས་ཅད་རྫོགས་པར་བྱེད་པ། མངོན་སྤྱོད་དང་རྒྱས་པ་དང་། ཞི་བའི་ལས་དག་རབ་ཏུ་བྱེད་པ་ཇི་ལྟ་ཇི་ལྟར་རབ་ཏུ་སྦྱར་བ་དེ་ལྟ་དེ་ལྟར་བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ། བསྐལ་པ་ཆེན་པོའི་རིན་པོ་ཆེའི་ལེའུ་རབ་འབྱམ་འདི་ངས་ཀྱང་རྗེས་སུ་གནང་ཞིང་སངས་རྒྱས་ཐམས་ཅད་ཀྱིས་ཀྱང་གསུངས་ཏེ།