ཐམས་ཅད་མཁྱེན་པའི་ཡེ་ཤེས་ཀྱི་སངས་རྒྱས་ཐོབ་པར་བྱ་བ་ལ་དཀྱིལ་འཁོར་བསྟན་པར་བྱའོ། །བསྟན་པ་ཙམ་ཉིད་ཀྱིས་སྡིག་པའི་རྙོག་པ་ཐམས་ཅད་ལས་གྲོལ་བར་འགྱུར་ཏེ། མཚམས་མེད་པ་ལྔ་བྱེད་པའི་སྐྱེ་བོ་ཡང་དེ་མ་ཐག་ཏུ་གྲོལ་བར་འགྱུར་རོ། །དེ་ནས་དཀྱིལ་འཁོར་གྱི་སློབ་དཔོན་གྱིས་རས་མ་ཉམས་པ་ཐག་མས་བཏགས་མ་ཐག་པ་སྐྲ་མེད་པ་ལ། རྩ་བའི་སྔགས་ཀྱིས་ལན་གསུམ་བཟླས་ཏེ། དྲི་ཞིམ་པོའི་ཙནྡན་དང་གུར་གུམ་གྱིས་བསྒོས་པའི་རས་ཀྱིས་གདོང་གཡོགས་པར་བྱའོ། །དང་པོར་བྱིས་པ་ལོ་གསུམ་ནས་ལོ་བཅུ་དྲུག་པའི་བར་ཟུར་ཕུད་ལྔས་ཉེ་བར་མཛེས་པའམ། གཙུག་ཕུད་གཅིག་གིས་ཉེ་བར་མཛེས་པའམ། གཙུག་ཕུད་གསུམ་གྱིས་ཉེ་བར་མཛེས་པ་སྐྲ་དང་ལྡན་པ། རྒྱལ་པོའི་བུ་སྤྱི་བོ་ནས་དབང་བསྐུར་བའམ། རྒྱལ་རིགས་ཀྱི་བུའམ་གཞན་བདག་ཉིད་ཆེན་པོ་རྒྱལ་པོ་ཆེན་པོ་འདོད་པ་དཀྱིལ་འཁོར་དུ་གཞུག་པར་བྱའོ། །དཀྱིལ་འཁོར་གཉིས་པ་ལ་ཕྱིན་པ་ན་གདོང་གཡོགས་པར་བྱ་སྟེ། ཨུཏྤ་ལའི་ཕྱག་རྒྱ་བཅིངས་ནས། འཇམ་དཔལ་གཞོན་ནུར་གྱུར་པའི་རྩ་བའི་སྔགས་ལན་ཅིག་བརྗོད་དུ་གཞུག་སྟེ། མེ་ཏོག་དྲི་ཞིམ་པོ་ཙནྡན་དང་གུར་གུམ་དང་བསྲེས་པ་ཤིན་ཏུ་གཙང་བར་བྱས་པ། ལག་པ་གཉིས་སུ་བྱིན་ལ་མེ་ཏོག་འདོར་དུ་གཞུག་གོ། །གང་དུ་དེའི་མེ་ཏོག་བབས་པ་དེར་དེའི་སྔགས་སྦྱིན་པར་བྱ་སྟེ། སྔགས་འདི་ནི་དེའི་ཡིན་པར་བསྟན་ཏེ། སྐྱེ་བ་བརྒྱུད་པ་ནས་དེ་དང་རྗེས་སུ་འབྲེལ་པ་ཡིན་ཏེ། དེ་ཉིད་དགེ་བའི་བཤེས་གཉེན་བྱང་ཆུབ་ཀྱི་སྙིང་པོ་ལ་གནོན་པ། བྱང་ཆུབ་སེམས་དཔའ་ཆེན་པོ་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པའི་དོན་དུ་མངོན་པར་སྒྲུབ་པར་བྱེད་པ། ལོངས་སྤྱོད་ཆེན་པོ་དང་རྒྱལ་པོ་ཆེན་པོ་དང་གྲགས་པ་ཆེན་པོ་དང་། གང་ཟག་རྩེ་གཅིག་པར་མངོན་པར་སྒྲུབ་པ་ཡིན་ནོ། །ཚེ་འདི་ཉིད་ལ་ཡང་ཆོས་ཐམས་ཅད་ལ་ཡང་ཐེ་ཚོམ་མེད་པར་བསྒྲུབ་པར་བྱ་བ་འགྲུབ་པར་འགྱུར་རོ། །དེ་བཞིན་དུ་མཐར་གྱིས་དངོས་གྲུབ་འདོད་པས་བརྒྱ་རྙེད་ཀྱི་བར་དུ་བྱ་སྟེ་གཞན་ལ་ནི་མ་ཡིན་ནོ། །གཞན་དག་ལ་ཅི་ལྟར་སྡིག་པ་སྤང་བའི་ཕྱིར་དམ་ཚིག་ཙམ་སྦྱིན་པར་བྱའོ། །དཀྱིལ་འཁོར་གྱི་སློབ་དཔོན་གྱིས་དབང་བསྐུར་ན། དང་པོར་རེ་ཞིག་དཀྱིལ་འཁོར་གྱི་ཕྱི་རོལ་ཧ་ཅང་ཡང་མི་ཉེ་ཧ་ཅང་ཡང་མི་རིང་བར་བྱང་ཤར་གྱི་ཕྱོགས་སུ་རྩ་བའི་སྔགས་ཀྱིས་དག་པར་བྱས་པས་བྱིན་གྱིས་བརླབ་པར་བྱའོ།