།ཙནྡན་ནི་པདྨའི་རིགས་ལའོ། །དེ་བཞིན་དུ་གུ་གུལ་ནི་གསང་བའི་བདག་པོ་ཕྱག་ན་རྡོ་རྗེ་ལ་ཤེས་པར་བྱའོ། །ལྷ་གཞན་ཐམས་ཅད་ནི་བདུག་པ་ཐ་མལ་པས་བྱའོ། །མར་གྱི་མར་མེ་འཕགས་པ་རྣམས། །ཐམས་ཅད་ལ་ནི་དབུལ་བར་བྱ། །འཕགས་མིན་ལྷ་ནི་ཐམས་ཅད་ལ། །དྲི་ཞིམ་འབྲུ་མར་དབུལ་བར་བྱ། །ཆོ་ག་ཇི་བཞིན་རིམ་པས་ནི། །བདུག་པ་མཐོང་བའི་རྒྱུ་ཡིས་སོ། །དེ་ལྟར་གསུངས་པ་དེ་བཞིན་དྲི། །སྔགས་རྣམས་ཀུན་ལ་རྟག་ཏུ་བྱ། །སྤྱན་རས་གཟིགས་ལ་གང་གསུངས་དང་། །གང་གསུངས་ཕྱག་ན་རྡོ་རྗེ་ལ། །རང་རང་གི་ནི་སྔགས་དག་གིས། །སྔགས་སྤྱོད་དོན་དུ་བསྒྲུབ་པའོ། །ཆོ་ག་གཅིག་པུ་བལྟ་བྱ་སྟེ། །རྟག་ཏུ་རྗེས་སུ་མཐུན་པར་བྱ། །དེ་ནས་དཀྱིལ་འཁོར་གྱི་སློབ་དཔོན་གྱིས་སྔར་མཐོང་བའི་ཆོ་གས་སྤྱན་དྲང་བ་དང་། མཆོད་པ་དང་བདུག་པ་ལ་སོགས་པ་བྱས་ནས། གཙོར་མཐུན་པའི་བྱ་བ་བྱས་ཏེ་དེའི་འོག་ཏུ་སྒྲུབ་པའི་གྲོགས་མཆོག་གིས་མཁས་པ་དང་། མྱུར་བས་འབྱུང་པོ་ཐམས་ཅད་པའི་གཏོར་མ་ཤ་མེད་པ། ཀུན་ནས་རྔ་པ་ཊ་ཧ་དང་དུང་གི་སྒྲ་དགའ་བའི་སྒྲ་སྒྲོགས་པ་ལ་སོགས་པ་དེས་བདུག་པ་དང་སྤོས་དང་མེ་ཏོག་དང་ཕྲེང་བས་བརྒྱན་པའི་ཕྱོགས་བཞི་མཚམས་བརྒྱད་སྟེང་དང་འོག་དང་ཐད་ཀ་ཐམས་ཅད་དུ་དཀྱིལ་འཁོར་གྱི་ཕྱི་རོལ་དུ་བསྐོར་བ་བྱ་ཞིང་། འབྱུང་པོ་ཐམས་ཅད་པའི་གཏོར་མ་རྒྱ་ཆེར་གཏོང་བར་བྱའོ། །དེ་ནས་ཁྲུས་བྱས་ཏེ་ཡང་ཞོ་དང་སྦྲང་རྩི་དང་། མར་གྱིས་བསྒོས་པའི་སཱ་ལུ་དང་། འབྲས་ཐུག་པོ་ཆེའི་སྦྱིན་སྲེག་རྩ་བའི་སྔགས་ཡི་གེ་དྲུག་པ་དང་སྙིང་པོས་སྟོང་རྩ་བརྒྱད་བྱའོ། །སྦྱིན་སྲེག་བྱས་ནས་དཀྱིལ་འཁོར་ལ་རྗེས་སུ་བཅུག་ཅིང་སྔར་བཞག་པའི་སེམས་དཔའ་ཆེན་པོ་ལ་སྲུང་བ་བྱས་ནས། དཀྱིལ་འཁོར་གྱི་སློབ་དཔོན་གྱི་སློབ་མ་ཉིད་དུ་ཁས་བླངས་པ། བྱང་ཆུབ་ཏུ་སེམས་བསྐྱེད་པ་གསོ་སྦྱོང་བྱས་པ། སངས་རྒྱས་དང་བྱང་ཆུབ་སེམས་དཔའ་ལ་བདག་ཉིད་ཀྱི་ལུས་ཕུལ་བ། དངོས་གྲུབ་ཀྱི་ཕྱིར་སེམས་ཅན་ཐམས་ཅད་ཀྱི་ཉེ་བར་ལོངས་སྤྱོད་པ་དང་ཡོངས་སུ་ལོངས་སྤྱོད་པ་ཐུན་མོང་དུ་གྱུར་པ་དང་། དགེ་བའི་རྩ་བ་བླ་ན་མེད་པའི་བྱང་ཆུབ་ཀྱི་སྙིང་པོ་གནོན་པར་བྱ་བ་དང་། ཐམས་ཅད་མཁྱེན་པའི་ཡེ་ཤེས་ཀྱི་སངས་རྒྱས་ཐོབ་པར་བྱ་བ་ལ་དཀྱིལ་འཁོར་བསྟན་པར་བྱའོ།