།ཤར་ལྷོ་མཚམས་སུ་ནི་དཀྱིལ་འཁོར་གྲུ་གསུམ་པ་བྱ་སྟེ། དགྲ་སྟ་འོད་ཟེར་ཀུན་ནས་འབར་བས་མཚན་པའོ། །བྱང་ཤར་གྱི་མཚམས་སུ་ནི་རལ་གྲི་འོད་ཀུན་ནས་འབར་བ་གཞག་པར་བྱའོ། །དེ་ལྟར་ཐམས་ཅད་བྲིས་ནས་སྟེང་དང་འོག་དང་ཐད་ཀར་ཕྱག་རྒྱ་གསུམ་དཀྱིལ་འཁོར་གྱི་ཕྱི་རོལ་སྒོ་དང་ཉེ་བར་ཕྱེ་མ་དང་བྲི་བར་བྱ་ལ་འདི་ལྟ་སྟེ། ན་བཟའ་དང་རྔ་ཡབ་དང་ལྷམ་འོད་ཟེར་ཀུན་ནས་འབར་བ་བྲི་བར་བྱའོ། །འཇམ་པའི་དབྱངས་ནི་བློ་ཅན་གྱིས། །སེམས་ཅན་རྣམས་ལ་ཕན་བཞེད་ནས། །དཀྱིལ་འཁོར་གྱི་ནི་ཆོ་ག་རྣམས། །འདིར་ནི་མདོར་བསྡུས་བསྟན་པ་ཡིན། །དེ་ནས་དཀྱིལ་འཁོར་གྱི་སློབ་དཔོན་གྱིས་དང་པོ་ཉིད་དུ་སློབ་མ་གཟུང་བར་བྱ་བྱ་བ་ལ། དབང་པོ་མ་ཚང་བ་མེད་པ་དང་ཡན་ལག་ཐམས་ཅད་མཛེས་པ་དང་། བྲམ་ཟེ་དང་རྒྱལ་རིགས་དང་རྗེའུ་རིགས་དང་དམངས་རིགས་དང་། བྱང་ཆུབ་ཏུ་སེམས་བསྐྱེད་པ་དང་། ཐེག་པ་ཆེན་པོར་ཞུགས་པའི་རང་བཞིན་ཅན་དང་ཐེག་པ་དམན་པ་མི་འདོད་པའི་ངང་ཚུལ་ཅན་དང་། སེམས་དཔའ་ཆེན་པོ་དང་དད་པ་དང་ལྡན་པ་དང་། དགེ་བའི་ཆོས་ཅན་དང་རྒྱལ་པོ་ཆེན་པོ་མངོན་པར་འདོད་པ་དང་ལོངས་སྤྱོད་ཆུང་བ་ལ་སྨོད་པ་དང་། ལོངས་སྤྱོད་ཆེན་པོ་མངོན་པར་འདོད་པ་དང་ལྡན་པ་དང་། བཟང་བ་དག་དང་དུལ་བ་དང་ལྡན་པ་དང་། ཚུལ་ཁྲིམས་དང་ལྡན་པའི་དགེ་སློང་དང་དགེ་སློང་མ་དང་། དགེ་བསྙེན་དང་དགེ་བསྙེན་མ་རྣམས་ཡང་དག་པར་སྡོམ་པ་ལ་ངེས་པར་གནས་པ་དང་། གསོ་སྦྱོང་ལ་ཉེ་བར་གནས་ཤིང་སྡོམ་པ་ལ་གནས་པ་དང་། བྱང་ཆུབ་སེམས་དཔའ་ཆེན་པོ་ལ་ཞེ་མི་སྡང་བ་དང་། ཕྱོགས་ཆེན་པོ་དང་རིགས་མཐོན་པོ་དང་རང་བཞིན་ཉིད་ཀྱིས་ཆོས་སྤྱོད་པ་དང་ཞག་གཅིག་སྨྱུང་བ་བྱས་པ་དང་། གོས་གཙང་མ་བགོས་པ་དང་སྐྲ་དྲི་ཞིམ་པ་དང་། དུས་གསུམ་དུ་ཁྲུས་བྱེད་པ་དང་། དེའི་ཉིན་ཞག་ལ་ག་པུར་དང་གུར་གུམ་དང་ལི་ཤི་ལ་ཝང་གའི་དྲི་ཞིམ་པོས་དྲི་ཞིམ་པར་བྱས་པ། རྟག་ཏུ་ཉེ་རེག་དང་ལྡན་པ་དང་། ཀུ་ཤའི་ཁྲེས་ལ་འདུག་པ་དང་སྲུང་བའི་ཆོ་ག་བྱས་པ་དང་། ཚངས་པར་སྤྱོད་པ་དང་བདེན་པ་དང་ལྡན་པ་དང་དུས་མཚམས་ལས་རྒྱལ་བའི་དཀྱིལ་འཁོར་གྱི་ཕྱི་རོལ་དེ་ཉིད་དུ་ཧ་ཅང་ཡང་མི་ཉེ་ཧ་ཅང་མི་རིང་བར་གཞག་པར་བྱའོ།