ཨུཏྤ་ལའི་ཕྱག་རྒྱ་ཀུན་ནས་འབར་བ་འདི་གཉིས་ཕན་ཚུན་འབྲེལ་བ་བྱའོ། །དཀྱིལ་འཁོར་ཀུན་ནས་སྒོ་བྲི་བར་བྱའོ། །སྒོ་དག་ནི་རྒྱབ་ཀྱིས་ལྟ་བ་དང་། འཇུག་པ་ན་ནི་མདུན་གྱིས་བལྟ་བར་བྱའོ། །ཕྱི་རོལ་གྱི་དཀྱིལ་འཁོར་ཐམས་ཅད་དུ་འགྱུར་བ་ཡང་ཁ་དོག་ལྔའི་ཚོན་ཤིན་ཏུ་གསལ་བ་སྣ་ཚོགས་བལྟ་ན་སྡུག་པ། ཟུར་བཞིས་རྣམ་པར་འབྱེས་པ། རྟ་བབས་བཞིའི་རྣམ་པ་ཕྱོགས་བཞིར་ཁྲུ་གཉིས་ཙམ་ནང་གི་དཀྱིལ་འཁོར་གྱི་ཕྱི་རོལ་གྱི་ཤར་ཕྱོགས་སུ་ཚངས་པ་ཆེན་པོ་བྲི་བར་བྱ་སྟེ། གདོང་བཞི་པ་གོས་དཀར་པོ་བགོས་པ་ལ་སྟོད་གཡོགས་གོས་དཀར་པོ་དང་། ཚངས་སྐུད་དཀར་པོ་ཐོགས་པ། ཁ་དོག་གསེར་འདྲ་བ། རལ་པའི་ཅོད་ཅན་འཛིན་པ། ལག་ན་དབྱུག་པ་དང་། སྤྱི་བླུགས་འཛིན་པ། དེའི་གཡས་ཕྱོགས་སུ་འོད་གསལ་གྱི་ལྷའི་བུ་བྱ་སྟེ། མདོག་གསེར་འདྲ་བ་བསམ་གཏན་ཁྱད་པར་ཅན་གྱི་གཟུགས་ཅན། དར་ལའི་གོས་བགོས་པ་དར་ལའི་སྟོད་གཡོགས་བྱས་པ། བཞིན་ཤིན་ཏུ་གསལ་བ་རལ་བའི་ཅོད་ཅན་འཛིན་པ་མཆོད་ཕྱིར་ཐོགས་དཀར་པོ་ཅན། སྐྱིལ་མོ་ཀྲུང་གིས་འདུག་པ་ལག་གཡས་པས་མཆོག་སྦྱིན་པ། དེའི་གཡས་ཕྱོགས་སུ་འོག་མིན་གྱི་ལྷའི་བུ་བྱ་སྟེ། རྒྱན་ཐམས་ཅད་ཀྱིས་བརྒྱན་པ། ལུས་རབ་ཏུ་ཞི་བ་བསམ་གཏན་གྱི་རྣམ་པའི་ཆ་བྱད་ཅན། དར་ལའི་གོས་བགོས་པ་དར་ལའི་གོས་ཀྱིས་སྟོད་གཡོགས་བྱས་པ། སྐྱིལ་མོ་ཀྲུང་གིས་འདུག་པ་ལག་པ་གཡས་པས་མཆོག་སྦྱིན་པ། མཆོད་ཕྱིར་ཐོགས་དཀར་པོས་བྱས་པ། དེའི་རིམ་གྱིས་དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། འཐབ་བྲལ་དང་། བརྒྱ་བྱིན་ལ་སོགས་པའི་ལྷའི་བུ་བྲི་བར་བྱ་སྟེ། གོ་རིམས་ཇི་ལྟ་བ་དང་ཆ་བྱད་དང་དབྱིབས་ཅི་ལྟ་བ་བཞིན་དུའོ། །བརྒྱ་བྱིན་གྱི་འོག་ཏུ་རྒྱལ་པོ་ཆེན་པོ་བཞིའི་རིས་ལ་རྟག་ཏུ་མྱོས་དང་། ཕྲེང་ཐོགས་དང་། ལག་ན་གཞོང་ཐོགས་དང་། པི་བང་གཉིས་པ་དང་ས་བླའི་ལྷའི་བུ་དག་གོ་རིམས་ཇི་ལྟ་བ་དང་། ཆ་བྱད་ཇི་ལྟ་བ་བཞིན་དུ་བྲི་བར་བྱའོ། །དེ་བཞིན་དུ་ལྷོ་ཕྱོགས་སུ་མི་ཆེ་བ་དང་། མི་གདུང་བ་དང་ཤིན་ཏུ་མཐོང་བ་དང་གྱ་ནོམ་སྣང་དང་། དགེ་ཆུང་དང་བསོད་ནམས་སྐྱེས་ལ་སོགས་པའི་ལྷའི་བུ་ཆ་བྱད་དང་དབྱིབས་ཅི་ལྟ་བ་བཞིན་བྲི་བར་བྱའོ།