།སྒྲུབ་པའི་གྲོགས་མཆོག་གི་སློབ་དཔོན་གྱིས་དཀྱིལ་འཁོར་གྱི་ཕྱི་རོལ་ཤར་ལྷོ་མཚམས་ཀྱི་ཕྱོགས་སུ་ཆོ་ག་མཐོང་བའི་ལས་ཀྱིས་ཐབ་ཁུང་བྱ་སྟེ། རྒྱར་ཁྲུ་དོ་ལ་ཟབས་སུ་ཁྲུ་གང་བ་ཀུན་ནས་འཁོར་བར་པདྨའི་ཟེ་བ་འདྲ་བ། ཕྱི་རོལ་ཡང་པདྨའི་ཟེ་བ་འདྲ་བ་ཤིང་པ་ལ་ཤའི་ཡམ་ཤིང་གིས་མེ་སྦར་བར་བྱ། ཤིང་བིལ་བའི་ཡམ་ཤིང་མཐོ་གང་ཙམ་རློན་པ་ལ་ཞོ་དང་སྦྲང་རྩི་དང་། མར་ལ་བཏགས་པ་ལ་རྩ་བའི་སྔགས་འབྲུ་དྲུག་པའམ་སྙིང་པོས་ཁུ་ཚུར་གྱི་ཕྱག་རྒྱ་བཅིངས་ཏེ་མེ་ལྷ་སྤྱན་དྲང་བར་བྱའོ། །སྤྱན་དྲངས་ནས་སྔར་བསྟན་པ་ཉིད་ཀྱི་རྩ་བའི་སྔགས་ཡི་གེ་གཅིག་པའི་སྙིང་པོས་ཕྱིར་ཡང་བརྒྱ་རྩ་བརྒྱད་སྦྱིན་སྲེག་བྱའོ། །དེ་ནས་དཀྱིལ་འཁོར་གྱི་སློབ་དཔོན་གྱིས་ཅོད་པན་དང་འཚོག་ཆས་བྱས་ནས་བདག་ཉིད་དང་རི་མོ་མཁན་ཡང་རྩེ་གཅིག་པར་བྱས་ནས་སྦྱིན་སྲེག་བྱེད་དུ་གཞུག་གོ། །དེ་ནས་དཀྱིལ་འཁོར་གྱི་སློབ་དཔོན་སངས་རྒྱས་དང་བྱང་ཆུབ་སེམས་དཔའ་རྣམས་ཡིད་ལ་བྱས་ཏེ། སྔར་བསྟན་པའི་བདུག་པས་བདུགས་ནས་ཐལ་མོ་སྦྱར་ཏེ་བྱང་ཆུབ་སེམས་དཔའ་ཐམས་ཅད་ལ་རབ་ཏུ་བཏུད་ནས། འཇམ་དཔལ་གཞོན་ནུར་གྱུར་པ་ལ་ཡང་ཕྱག་བྱས་ཏེ། ཚོན་གྱི་ཕྱེ་མ་བླངས་ནས་སྐུའི་གཟུགས་ཀྱིས་བཅད་པ་ལ། རི་མོ་མཁན་གྱིས་ཡོངས་སུ་རྫོགས་པར་བྱའོ། །ཆོ་ག་འདི་དག་གིས་དང་པོར་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཉིད་རྣམ་པ་ཐམས་ཅད་ཀྱི་མཆོག་དང་ལྡན་པ། སེང་གེའི་ཁྲི་ལ་བཞུགས་པ་གནས་གཙང་མའི་གཞལ་མེད་ཁང་ན་ཆོས་སྟོན་ཅིང་བཞུགས་པ་བྲི་བར་བྱའོ། །དཀྱིལ་འཁོར་གྱི་སློབ་དཔོན་རི་མོ་འདྲི་བ་ན་འདིར་སྒྲུབ་པའི་གྲོགས་མཆོག་གིས་སློབ་དཔོན་བདག་ཉིད་བསྲུང་བའི་ཕྱིར། རྩ་བའི་སྔགས་ཀྱིས་འབྱུང་པོ་ཐམས་ཅད་པའི་གཏོར་མ་གཏང་བར་བྱ་སྟེ། ཕྱི་རོལ་གྱི་ཕྱོགས་བཞི་དང་སྟེང་དང་འོག་དག་ཏུ་གཏོར་བར་བྱའོ། །དེ་ནས་ཁྲུས་བྱས་ཏེ་ཐབ་ཁུང་དུ་ཉེ་བར་སོང་ནས་གོས་གཙང་མ་བགོས་ཏེ། གཙང་སྦྲ་དང་སྲུང་བའི་ཆོ་ག་བྱས་ནས་གུར་གུམ་དང་བསྲེས་པའི་མར་གྱི་སྦྱིན་སྲེག་སྟོང་རྩ་བརྒྱད་བྱའོ། །དེ་ནས་ཀུ་ཤའི་ཁྲེས་ལ་འདུག་ནས་བཟླས་པ་བྱ་སྟེ། དེ་ཉིད་དུ་གནས་པར་བྱའོ། །ཡུངས་ཀར་ལ་ཁྲོ་བོའི་རྒྱལ་པོ་གཤིན་རྗེ་གཤེད་ཀྱི་སྔགས་བརྒྱ་རྩ་བརྒྱད་ཀྱིས་མངོན་པར་བསྔགས་ལ་ཁམ་ཕོར་ཁ་སྦྱར་གྱི་ནང་དུ་གཞག་པར་བྱའོ།