Degé Kangyur volume 88, F.118.b

སརྦ་ཀཱརྱ་མ། ད་ཧ་ད་ཧ། པ་ཙ་པ་ཙ། མཱ་བི་ལམྦ། མཱ་བི་ལམྦ། ས་མ་ཡ་མ་ནུ་སྨ་ར། ཧཱུཾ་ཧཱུཾ་ཕཊ། སྥོ་ཊ་ཡ་སྥོ་ཊ་ཡ། སརྦ་ཨཱ་ཤ་པ་རི་པཱུ་ར་ཀ། ཧེ་བྷ་ག་བཱན་ཀིཉྩི་རཱ་ཡ་སི་མ་མ་སརྦཱམརྠཾ་སཱ་དྷ་ཡ་སྭཱ་ཧཱ། འདི་ནི་བཅོམ་ལྡན་འདས་འཇམ་དཔལ་གཞོན་ནུར་གྱུར་པའི་ཁྲོ་བོ་ཆེན་པོ་གཤིན་རྗེའི་གཤེད་ཅེས་བྱ་བ་ཡིན་ཏེ། གཤིན་རྗེའི་རྒྱལ་པོ་ཡང་འཇོམས་པ་དང་། འགུགས་པར་བྱེད་པ་ཡིན་ན། སེམས་ཅན་གཞན་ལྟ་སྨོས་ཀྱང་ཅི་དགོས། །​ཁྲོ་བོའི་རྒྱལ་པོ་ཆེན་པོས་གཟུངས་སྔགས་འདི་སྨྲས་མ་ཐག་ཏུ་སེམས་ཅན་ཐམས་ཅད་བཅོམ་ལྡན་འདས་ཀྱི་སྤྱན་སྔར་ལྷགས་པར་གྱུར་ཏེ། འཇིགས་པ་དང་ཉམ་ཐག་པ་དང་། དངངས་པ་དང་ཡིད་སྐྱོ་བ་དང་སྙིང་འགས་པར་འགྱུར་ཏེ། སངས་རྒྱས་བཅོམ་ལྡན་འདས་དང་འཇམ་དཔལ་གཞོན་ནུར་གྱུར་པ་མ་གཏོགས་པར་སྐྱབས་གཞན་མེད་སྐྱོབ་པ་གཞན་མེད་དཔུང་གཉེན་གཞན་མེད་པར་གྱུར་ཏོ། །​དེ་ནས་གང་སུ་དག་ས་ལ་གནས་པ་དང་ཆུ་ལ་གནས་པ་དང་། ནམ་མཁའ་ལ་གནས་པ་དང་། བརྟན་པར་གནས་པ་དང་། མི་བརྟན་པར་གནས་པ་དང་། མངལ་ནས་སྐྱེས་པ་དང་། སྒོ་ང་ལས་སྐྱེས་པ་དང་། དྲོད་གཤེར་ལས་སྐྱེས་པ་དང་རྫུས་ཏེ་སྐྱེས་པའི་སེམས་ཅན་གྱི་གྲངས་སུ་གཏོགས་པ། འཇིག་རྟེན་གྱི་ཁམས་མཐའ་ཡས་པ་དག་ན་རྣམ་པར་གནས་པ་སྟེང་དང་། འོག་དང་ཐད་ཀ་དང་ཕྱོགས་དང་ཕྱོགས་མཚམས་དག་ཏུ་སྐད་ཅིག་དེ་དང་ཡུད་ཙམ་དེ་ལ་གབ་ཅིང་གནས་པ་དག་སྐད་ཅིག་དེ་ཉིད་ལ། ཁྲོ་བོའི་རྒྱལ་པོ་ཆེན་པོས་འདི་ཉིད་དུ་བཀུག་པར་གྱུར་ཏོ། །​ཁྲོ་བོའི་རྒྱལ་པོའི་སྔགས་འདི་ནི་འདོད་ཆགས་དང་མ་བྲལ་བ་རྣམས་ཀྱི་མདུན་དུ་བརྗོད་པར་མི་བྱ་སྟེ། དེ་ཅིའི་ཕྱིར་ཞེ་ན། དེ་ཡང་འཆི་བར་འགྱུར་བའམ། སྐམ་པར་འགྱུར་བའི་ཕྱིར་རོ། །​དམ་ཚིག་ལ་དམིགས་པར་བྱས་ནས་སངས་རྒྱས་ཀྱི་སྐུ་གཟུགས་སམ་སྐུ་གདུང་དང་བཅས་པའི་མཆོད་རྟེན་ནམ། འཇམ་དཔལ་གཞོན་ནུར་གྱུར་པའི་སྐུ་གཟུགས་ཀྱི་སྤྱན་སྔར་བཟླས་པར་བྱའོ། །​ཡང་ན་ལས་གཞན་གྱི་ཆེད་དུ་བརྗོད་པར་བྱ་སྟེ། གང་དེ་དང་དེ་དག་ཏུ་ནི་བརྗོད་པར་མི་བྱ་སྟེ། དེ་ཅིའི་ཕྱིར་ཞེ་ན། ལྟས་ངན་ཆེན་པོ་དང་། མྱ་ངན་ཆེན་པོ་དང་། བདག་ཉིད་འཇིགས་པ་ཆེན་པོར་འགྱུར་བའི་ཕྱིར་རོ། །​ཐུགས་རྗེ་མཆོག་དང་ལྡན་པའི་སངས་རྒྱས་



The English translation of this folio by 84000 Translating the words of the Buddha can be found at:
https://read.84000.co/translation/toh543.html?part=UT22084-088-038-18943#UT22084-088-038-18943