Degé Kangyur volume 88, F.114.b

ཟ་བར་བྱེད་པ་དང་། ཚོགས་དང་། ཉི་མ་དང་། དུས་ཀྱི་མཐའི་ཉི་མ་དང་། སྲོག་འཕྲོག་བྱེད་དང་། སྲོག་འཇོམས་བྱེད་དང་། ཞེ་སྡང་དང་། ཕྲག་དོག་དང་། ཐབ་སྦྱོར་ཅན་དང་། ཐབ་སྦྱོར་བཟང་པོ་ཅན་དང་། བདུད་རྩི་ཐབ་སྦྱོར་ཅན་དང་། མཐའ་ཡས་ཐབ་སྦྱོར་ཅན་དང་། ཐབ་སྦྱོར་དམར་པོ་ཅན་དང་། ལག་པ་དང་། ལག་པ་ཆེན་པོ་དང་། ཁྲོ་བོ་ཆེན་པོ་དང་། མ་རུངས་པ་དང་། སྦྲུལ་དང་། འགོ་བའི་ནད་དང་། མཛེ་དང་། རྒྱལ་བྱེད་ཤིང་རྟ་དང་། འཇིགས་བྱེད་ཤིང་རྟ་དང་། རྣམ་པར་ཞུ་བྱེད་དང་། ཟ་བྱེད་དང་། མི་ངོམས་པ་དང་། འཆོལ་བ་དང་། བྲན་ཏེ་དེ་དག་དང་། གཞན་ཡང་རིག་པའི་རྒྱལ་པོ་ཁྲོ་བོ་ཆེན་པོས་སེམས་ཅན་མ་ལུས་པ་མཐའ་དག་འདུལ་བར་བྱེད་པ། བསྐྲད་པ་དང་། འཇིག་པ་དང་། མགོ་འགས་པར་བྱེད་པ་དང་། འཆི་བར་བྱེད་པ་དང་། རྣམ་པར་ཉམས་པར་བྱེད་པ་དང་། གུས་པ་དག་ལ་ནི་མཆོག་སྦྱིན་པར་བྱེད་པ་ཞི་བ་དང་རྒྱས་པ་དང་མངོན་སྤྱོད་ཀྱི་ལས་རྣམས་སྟོན་པར་བྱེད་པ་རིག་པའི་རྒྱལ་པོ་བྱེ་བ་ཁྲི་ཕྲག་བརྒྱ་སྟོང་དུ་མས་ཡོངས་སུ་བསྐོར་བ། བཅོམ་ལྡན་འདས་ཤཱཀྱ་ཐུབ་པ་དང་འཇམ་དཔལ་གཞོན་ནུར་གྱུར་པ་ལ་ངེས་པར་སེམས་ཤིང་བདག་ཉིད་ཀྱི་རིག་པའི་རྒྱལ་པོ་ཕྱག་ན་རྡོ་རྗེ་ལ་ཕྱག་འཚལ་ཞིང་བཀའ་རབ་ཏུ་སྡོད་ཅིང་འདུག་སྟེ། རང་གི་རིགས་དང་མཐུན་པའི་གནས་ལ་འདུག་ཅིང་རང་གི་སྟན་ལ་འདུག་པར་གྱུར་ཏོ། །​གང་བཅོམ་ལྡན་འདས་ཕྱག་ན་རྡོ་རྗེ་གང་ཡང་ཕོ་ཉ་མོའི་རིག་པའི་རྒྱལ་མོ་དེ་དག་ཀྱང་འཁོར་བརྒྱ་སྟོང་དུ་མས་བསྐོར་བ་ཡང་རང་གི་ཆོས་ཀྱི་དབྱིངས་ནམ་མཁའི་རང་བཞིན་སྤྲོས་པ་མེད་པ་ལ་དམིགས་ནས་གནས་དེར་འདུས་པ་ལ་འདི་ལྟ་སྟེ། འོག་པག་མ་དང་། འོག་པག་བཟང་མོ་དང་། ལུ་གུ་རྒྱུད་མ་དང་། རྡོ་རྗེ་འོད་མ་དང་། རྡོ་རྗེ་ལྕེ་མ་དང་། རྡོ་རྗེའི་སྦྱིན་མ་དང་། རྡོ་རྗེ་སྤྱན་མ་དང་། རྡོ་རྗེའི་ཐལ་གོང་མ་དང་། རྡོ་རྗེ་ཁྲོ་གཉེར་མ་དང་། རྡོ་རྗེ་རྣ་བ་མ་དང་། རྡོ་རྗེ་ཡི་གེ་མ་དང་། རྡོ་རྗེ་ཁབ་མ་དང་། རྡོ་རྗེ་ཁུ་ཚུར་མ་དང་། རྡོ་རྗེ་ལྕགས་ཀྱུ་མ་དང་། རྡོ་རྗེ་རལ་གྲི་མ་དང་། རྡོ་རྗེ་ཐོག་འབབ་མ་དང་། རྡོ་རྗེ་ལུ་གུ་རྒྱུད་མ་དང་། གནས་དང་ལྡན་མ་དང་། གནས་



The English translation of this folio by 84000 Translating the words of the Buddha can be found at:
https://read.84000.co/translation/toh543.html?part=UT22084-088-038-18935#UT22084-088-038-18935