།གོས་གཞན་དག་ནི་བཀག་མ་ཡིན། །ཤིན་ཏུ་དྲག་པས་དེ་མི་བྱ། །གནོད་པར་དགའ་བའི་མ་ཡིན་ན། །རླུང་ཡབ་གཙང་དང་དེ་བཞིན་གོས། །ལོ་མས་ཀྱང་ནི་རླུང་ཡབ་བྱ། །རླུང་གིས་ཁྱད་དུ་མི་གསོད་པ། །མེ་ནི་རབ་ཏུ་སད་བྱས་ནས། །སྔགས་ཤེས་པས་ནི་མེ་སྦར་ཏེ། །སྦྱིན་སྲེག་དོན་དུ་ལེགས་མཉམ་གཞག །ལག་པ་དེ་ནི་གཡོན་པ་ཡིས། །ལན་གསུམ་བར་དུ་ཆུས་གཏོར་ནས། །དེར་ནི་བ་ཡི་མར་གྱིས་ནི། །སྲེག་བླུགས་གསུམ་ནི་དེས་སྦྱིན་བྱ། །དེ་ནས་ཀྱང་ནི་ཕྱག་བྱ་སྟེ། །སངས་རྒྱས་ཀུན་དང་སྐྱོབ་པ་དང་། །རང་སྔགས་སྔགས་ཀྱི་མགོན་པོ་ལ། །དེ་ནས་ཅི་འདོད་ཕྱག་བྱའོ། །དེ་ཚེ་མེ་ཡི་སྙིང་པོ་ཡིས། །སྔགས་ཀྱིས་ལན་བདུན་རྟག་བཟླས་པའི། །དྲི་ཞིམ་མེ་ཏོག་དག་གིས་ནི། །སྡོམ་བརྩོན་མེ་ནི་སྤྱན་དྲང་བྱ། །སྔགས་ཤེས་རྟག་ཏུ་སྤྱན་དྲངས་ནས། །མཁས་པས་གནས་ནི་སྦྱིན་པར་བྱ། །གདན་དང་གནས་ནི་སྦྱིན་བྱེད་ནའང་། །དེ་ཉིད་སྔགས་ཡིན་གཞན་པས་མིན། །ཞོ་དང་མར་གྱིས་སྦགས་པ་དང་། །སྦྲང་རྩིས་སྦགས་པའི་ཡམ་ཤིང་གིས། །རྒྱས་པའི་ལས་ནི་བྱ་བའི་ཕྱིར། །སྔགས་ཀྱིས་ཀུན་དུ་སྦྱིན་སྲེག་བྱ། །མར་དང་སྦྲང་རྩིར་ལྡན་པ་འམ། །ཡང་ན་ཞོ་དང་ལྡན་པ་ཡི། །ཡམ་ཤིང་རྫས་དང་ལྡན་པ་ཡིས། །གཉི་ག་ལ་གནས་དེ་ཚེ་བྱ། །སྟོང་ངམ་ཡང་ན་འབུམ་མམ་ནི། །ཡང་ན་བརྒྱ་རྩ་བརྒྱད་དུ་བརྟག །དེ་ཚེ་སྔགས་པས་སྔགས་བཟུང་ནས། །ལན་རེ་བཟླས་ཤིང་མེ་ལ་དོར། །འབར་བའི་མེ་ཡི་ཕྲེང་བ་འམ། །དེ་བཞིན་མེ་ལྕེ་གཅིག་གྱུར་ལ། །ཞི་བའི་ལས་ཀྱི་སྦྱིན་སྲེག་བྱ། །དུད་པ་མེད་ལ་རྒྱས་པའང་བྱ། །དུད་བཅས་དྲག་པོའི་ལས་ལ་བྱ། །དེ་ནི་རྒྱལ་བས་སྨད་ཅིང་སྤངས། །གལ་ཏེ་མེ་ནི་མདོག་ལྡན་ན། །སྦྱིན་སྲེག་ལས་ནི་རབ་ཏུ་སྦྱར། །ཞི་ལ་ཁ་དོག་དཀར་པོ་ནི། །རྒྱལ་བ་མཆོག་གིས་རྟག་ཏུ་བསྔགས། །གལ་ཏེ་མེ་དཀར་སྦྱིན་སྲེག་བྱས། །དེར་ནི་སྔགས་རྣམས་འགྲུབ་པར་འགྱུར། །དེ་བཞིན་རྟག་ཏུ་མདོག་དམར་ལ། །རྒྱས་པ་འགྲུབ་པར་འདོད་པ་ཡིན། །གནག་དང་དུ་བའི་ཁ་དོག་དང་། །སེར་སྐྱ་ལ་ནི་སྡིག་ལྡན་ལས། །ཁ་དོག་རྣམ་གསུམ་བསྟན་པས་ནི། །རྣམ་གསུམ་གྲུབ་པ་འདི་དག་ཡིན།