།ནམ་མཁའ་ལ་འགྲོ་བ་དང་མི་སྣང་བ་དང་བྱང་ཆུབ་སེམས་དཔའི་ས་དང་རང་སངས་རྒྱས་ཉིད་དམ་ཉན་ཐོས་ཉིད་དམ། ཚེ་རིང་བ་ཉིད་དམ་རྒྱལ་སྲིད་ཆེན་པོ་དང་། ལོངས་སྤྱོད་ཆེན་པོ་ཉིད་དམ་རྒྱལ་པོ་དགའ་བ་ཉིད་དམ། འཕགས་པ་འཇམ་དཔལ་དང་ལྷན་ཅིག་རྗེས་སུ་སྤྱོད་པར་འགྱུར་ཏེ་མདོར་ན་གང་འདོད་པ་དེ་ཐམས་ཅད་སྩོལ་བར་འགྱུར་རོ། །གང་དོན་དུ་གཉེར་བ་དེ་ཡང་རྗེས་སུ་སྩོལ་བར་འགྱུར་རོ། །གྲུབ་པའི་རྫས་ཐམས་ཅད་ཀྱང་འགྲུབ་པར་འགྱུར་རོ། །སེམས་ཅན་ཆེན་པོ་རྣམས་ཀྱང་འགུགས་པར་བྱེད་པར་འགྱུར་རོ། །མདོར་ན་ཇི་ལྟ་ཇི་ལྟར་བརྗོད་པ་དེ་ཐམས་ཅད་བྱེད་པར་འགྱུར་རོ། །སྔོན་གྱི་ལས་ཀྱི་ཉེས་པ་ཡང་ཡང་དག་པར་སྦྱོང་བར་བྱེད་དོ་ཞེས་བཅོམ་ལྡན་འདས་ཤཱཀྱ་ཐུབ་པས་གསུངས་སོ། །གཞན་ཡང་ལས་ཀྱི་ཐབས་བར་མ་སྒྲུབ་པ་ཡང་ཡོད་དེ་དང་པོར་རེ་ཞིག་དེ་ལྟར་ཁྱད་པར་དུ་གྱུར་པའི་གནས་སམ་གཙང་བའི་ས་ཕྱོགས་སམ། ཆུ་བོའམ་ཆུ་གླིང་གི་ངོགས་སུ་སྔ་མ་བཞིན་དུ་ཐམས་ཅད་བྱ་སྟེ། རས་རིས་ནུབ་ཏུ་བསྟན་ཏེ་བཞག་ལ་བདག་ཀྱང་ཤར་དུ་མངོན་པར་ཕྱོགས་པར་བྱས་ནས་ཀུ་ཤའི་ཁྲེས་ལ་འདུག་སྟེ། སྔ་མ་བཞིན་དུ་རྒྱ་ཆེར་སྦྱར་བར་བྱས་ནས་དུས་གསུམ་དུ་ཡི་གེ་དྲུག་པ་བཟླ་བར་བྱ་སྟེ། བཟླས་པ་རྫོགས་པ་དང་དོང་ཀའི་མེ་ཏོག་ལ་ཙནྡན་དཀར་པོའམ་གུར་གུམ་གྱིས་བསྒོས་པས་སྔ་མ་བཞིན་དུ་སྦྱིན་སྲེག་སྟོང་ཕྲག་བརྒྱ་བྱའོ། །དེ་བཞིན་དུ་མེ་སྦར་ནས་སྦྱིན་སྲེག་གི་མཇུག་ཏུ་རས་རིས་རབ་ཏུ་འགུལ་བ་ན་ནི་བློན་པོ་ཉིད་ཐོབ་པར་འགྱུར་རོ། །རས་རིས་ལས་འོད་ཀྱི་སྣང་བ་བྱུང་ན་ནི་འོད་ལས་རྒྱལ་སྲིད་ཐོབ་པར་འགྱུར་རོ། །རས་རིས་འོད་འབར་བའི་ཕྲེང་བས་ཀུན་དུ་ཁྱབ་ན་ནི་རྒྱལ་པོ་ཆེན་པོ་བཞིའི་རྒྱལ་སྲིད་ཐོབ་པར་འགྱུར་རོ། །རས་རིས་ལས་མེ་སྟག་བྱུང་ན་ནི་སུམ་ཅུ་རྩ་གསུམ་གྱི་དབང་ཕྱུག་བརྒྱ་བྱིན་ཉིད་ཐོབ་པར་འགྱུར་རོ། །རས་རིས་ལས་ཆོས་འཆད་པའི་སྒྲ་བྱུང་ན་ནི། བྱང་ཆུབ་སེམས་དཔའ་ས་གསུམ་གྱི་དབང་ཕྱུག་ཉིད་ཐོབ་པར་འགྱུར་རོ། །རས་རིས་ཀྱི་ཕྱག་གིས་མགོ་ལ་བྱུག་པར་མཛད་ན་ནི། མངོན་པར་ཤེས་པ་ལྔ་དང་། ས་བདུན་པ་ཐོབ་པ་དང་སྟོབས་བཅུ་ལ་གནས་པ་མཐར་གྱིས་ཐོབ་པ་ཡིན་ནོ།