ཚུལ་ཁྲིམས་དང་ལྡན་པ་འམ་ཚུལ་ཁྲིམས་འཆལ་པའི་རི་མོ་མཁན་གྱིས་ཀྱང་བྲི་བར་བྱའོ། །བདག་ཉིད་དམ་སྒྲུབ་པ་པོས་ངེས་པར་སྔོན་དུ་བསྙེན་པ་བྱས་པ་དང་། དད་པ་དང་བྱང་ཆུབ་ཏུ་སེམས་བསྐྱེད་པ་ནི་ངེས་པར་བྱའོ། །དེ་ལྟར་བྱས་ན་སྔགས་འགྲུབ་པར་འགྱུར་གྱི་གཞན་དུ་སྡིག་པའི་ལས་ཅན་གྱིས་ནི་མི་འགྱུར་ཏེ། དེ་ལྟར་དད་པ་དང་དེ་ལྟར་གྱུར་པས་བསྒྲུབ་པར་བྱའོ། །སྔགས་ཀྱི་རྒྱལ་པོ་དང་སྔགས་ཀྱི་ལྷ་དག་འདིར་དད་པ་དང་ལྡན་པས་འགྲུབ་པར་འགྱུར་གྱི་གཞན་དག་གིས་ནི་མ་ཡིན་ནོ། །གང་ཕྱིར་དད་པ་ཐེག་པ་མཆོག །གང་གིས་རྣམ་པར་འདྲེན་པ་མཆོག །དད་པ་མེད་པའི་མི་ལ་ནི། །དཀར་པོའི་ཆོས་རྣམས་མི་སྐྱེ་སྟེ། །ས་བོན་ཚིག་པར་གྱུར་པ་ལས། །མྱུ་གུ་སྔོན་པོ་ཅི་བཞིན་ནོ། །དད་དང་ལྡན་པའི་མི་དག་ལ། །སངས་རྒྱས་ལས་ནི་འགྲུབ་འགྱུར་ཏེ། །སྔགས་རྣམས་ཐམས་ཅད་ཁྱད་པར་དུ། །དད་པ་མེད་ལ་མི་འགྲུབ་བོ། །གང་ཡང་འཇིག་རྟེན་ལྷ་དག་དང་། །དེ་བཞིན་འཇིག་རྟེན་འདས་པ་དག །དད་ལྡན་ཀུན་ལ་འགྲུབ་འགྱུར་ཏེ། །སྡིག་པ་དག་དང་བྲལ་ཕྱིར་རོ། །བྱང་ཆུབ་དེར་སོང་ཡིད་ཀྱིས་ནི། །དེ་དག་མྱུར་དུ་ངེས་འགྲུབ་སྟེ། །གཞན་ལ་འགྲུབ་པར་མི་འགྱུར་ཞིང་། །བསྟན་པ་འདི་ལ་རྣམ་པར་བཟློག །རས་ནི་ཆུང་དང་ཆེན་པོ་དང་། །འབྲིང་དུ་ཉེ་བར་བསྒྲགས་པ་ཡིན། །ལས་རྣམས་ཀུན་ལ་སྒྲུབ་པ་ནི། །ད་ནི་རབ་ཏུ་བསྟན་པར་བྱ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་ལས། འཕགས་པ་འཇམ་དཔལ་གྱི་རྩ་བའི་ཆོ་ག་བདུན་པའི་ལེའུ་རབ་འབྱམ་ལས། རས་རིས་ཀྱི་ཆོ་ག་བཞི་པའི་ལེའུ་རབ་འབྱམ་རྫོགས་སོ།། །།དེ་ནས་བཅོམ་ལྡན་འདས་ཤཱཀྱ་ཐུབ་པས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་གཞོན་ནུ་གང་ཁྱོད་ཀྱིས་བསྟན་པའི་སེམས་ཅན་དེ་དག་གི་ཕྱིར། ལེའུའི་ཆོ་ག་རབ་འབྱམ་འདི་ཐབས་སླ་བས་འགྲུབ་པར་འགྱུར་བ་ངས་ཀྱང་བསྟན་ཏེ། དེ་དག་གི་དོན་གྱི་ཕྱིར་ཡོན་ཏན་རྒྱ་ཆེ་བའི་བྱེ་བྲག་གི་དབྱེ་བ། ལས་རྣམ་པར་འབྱེད་པ་སེམས་ཅན་ཐམས་ཅད་ཀྱི་དོན་གྱི་ཕྱིར་ཡང་དག་པར་བཤད་པར་བྱ་ཡིས། དེ་ལེགས་པར་ཤིན་ཏུ་རབ་ཏུ་ཉོན་ཅིག་དང་བཤད་པར་བྱའོ།