།དང་པོར་རེ་ཞིག་རས་དེ་བླངས་ལ་ཆོ་འཕྲུལ་གྱི་ཟླ་ཕྱེད་དམ། ཡར་ངོའི་ཉིན་ཞག་ལ་རྒྱུ་སྐར་བཟང་པོ་དང་ལྡན་པའི་གྲངས་བཟང་པོ་ལ། འཕགས་པ་འཇམ་དཔལ་བྱིས་པ་ཁྱེའུ་ཡི་གཟུགས་ཅན་མགོ་ཟུར་ཕུད་ལྔ་དང་ལྡན་པ། བྱིས་པའི་རྒྱན་གྱིས་བརྒྱན་པ་མདོག་གསེར་འདྲ་བ། ན་བཟའ་སྔོན་པོ་གཡོ་བཞིན་པ་མནབས་པ། ན་བཟའ་དར་ལ་སྔོན་པོས་སྟོད་གཡོགས་བྱས་པ། ཆོས་འཆད་པ་སེང་གེའི་ཁྲི་ལ་སྐྱིལ་མོ་ཀྲུང་ཕྱེད་པས་བཞུགས་ལ། ཞབས་གཡས་པས་རིན་པོ་ཆེའི་ཞབས་རྟེན་ལ་བཞག་པ། གཡོན་པ་སེང་གེའི་གདན་ལ་བཞུགས་པ། རྒྱན་ཐམས་ཅད་དང་ལྡན་པ་བཞིན་ཅུང་ཟད་འཛུམ་པ་དང་བཅས་པ། སྒྲུབ་པ་པོ་ལ་ལྟ་བ་བྲི་བར་བྱའོ། །གཡས་ཕྱོགས་སུ་འཕགས་པ་ཀུན་དུ་བཟང་པོ་རྔ་མ་དཀར་པོ་གཡོབ་པ། པྲི་ཡང་ཀུའི་མདོག་ལྟར་སྔོ་བསངས་ལག་པ་གཡོན་པ་ན་ནོར་བུ་རིན་པོ་ཆེ་ཐོགས་པ། ཡན་ལག་ཐམས་ཅད་མཛེས་པ། རྒྱན་ཐམས་ཅད་ཀྱིས་བརྒྱན་པ། ན་བཟའ་སྔོན་པོ་གཡོ་བ་མནབས་པ། མུ་ཏིག་གི་ཕྲེང་བས་མཆོད་ཕྱིར་ཐོགས་པ། པདྨ་དཀར་པོའི་གདན་ལ་འདུག་པ་བྲི་བར་བྱའོ། །འཕགས་པ་འཇམ་དཔལ་གྱི་གཡོན་ཕྱོགས་སུ་འཕགས་པ་སྤྱན་རས་གཟིགས་དབང་ཕྱུག་སྟོན་ཀའི་ཟླ་རྒྱུའི་མདོག་ལྟར་དཀར་བ། ན་བཟའ་སྔོན་པོ་གཡོ་བ་མནབས་པ། ཡན་ལག་ཐམས་ཅད་མཛེས་པ། རྒྱན་ཐམས་ཅད་ཀྱིས་བརྒྱན་པ། མུ་ཏིག་གི་ཕྲེང་བས་མཆོད་ཕྱིར་ཐོགས་བྱས་པ། ལག་པ་གཡོན་པ་ན་པདྨ་དཀར་པོ་འཛིན་པ། ལག་པ་གཡས་པ་ན་རྔ་ཡབ་གསེར་གྱི་ཡུ་བ་ཅན་དཀར་པོ་ཐོགས་པ། ཞི་བའི་ཆ་བྱད་ཅན་འཕགས་པ་འཇམ་དཔལ་ལ་ལྟ་བ། དེ་བཞིན་དུ་འཕགས་པ་ཀུན་དུ་བཟང་པོ་པདྨ་དཀར་པོ་ལ་གནས་པ། གཉི་ག་ཡང་དེ་ལྟར་བྲི་བར་བྱའོ། །དེ་ནས་སྡོང་བུ་གཅིག་ལས་སྐྱེས་པའི་པདྨ་གསུམ་ལ་དབུས་ཀྱི་རྩ་བའི་པདྨའི་གེ་སར་ལ་ནི་འཕགས་པ་འཇམ་དཔལ་གྱི་སེང་གེའི་ཁྲི་དང་རིན་པོ་ཆེའི་ཞབས་རྟེན་ནོ། །གཉིས་པའི་པདྨ་ལ་ནི་འཕགས་པ་ཀུན་དུ་བཟང་པོའོ། །གསུམ་པའི་པདྨ་ལ་ནི་སྤྱན་རས་གཟིགས་དབང་ཕྱུག་གོ། །པདྨའི་སྡོང་བུ་མཛེས་པ་རིན་པོ་ཆེ་མརྒད་འདྲ་བ།