ནན་ཏན་བརྩོན་འགྲུས་ཀྱིས་སྒྲུབ་པར་བྱེད་ན་ཇི་ལྟར་མོས་པ་བཞིན་དུ་རིགས་ཤིན་ཏུ་མཐོ་བའི་རིགས་སུ་སྐྱེ་བར་འགྱུར་བ་ནས་བྱང་ཆུབ་ཀྱི་ཤིང་དྲུང་དུ་མངོན་པར་རྫོགས་པར་སངས་རྒྱས་པའི་བར་དུ་ཡང་ཐོབ་ནས་གྲགས་པ་ཕུན་སུམ་ཚོགས་པ་དང་། འཇིག་རྟེན་གྱི་ཁམས་ཁྱད་པར་དུ་འཕགས་ཤིང་ལམ་ཐ་དད་པ་དང་། འདྲེས་པ་མེད་པ་དང་། བྲམ་ཟེ་དང་མུ་སྟེགས་ཅན་གྱི་མིང་ཡང་མེད་ན་ལྟ་བ་ངན་པས་ལོག་པར་ཡོངས་སུ་ཚོལ་བ་ལྟ་སྨོས་ཀྱང་ཅི་དགོས་པ་དང་། མི་དགེ་བའི་ཆོས་རྣམས་ཀྱི་མིང་ཡང་མི་ཐོས་ན་མི་དགེ་བའི་རྩ་བ་མངོན་པར་བསྒྲུབ་པ་ལྟ་ཡོད་པར་ག་ལ་འགྱུར་བ་དང་། ལག་པ་དང་། རྐང་པའི་སོར་མོ་ལས་འོད་ཟེར་བཀྱེ་ནས་འཇིག་རྟེན་གྱི་ཁམས་ཚད་མེད་པ་རྣམས་སྣང་བར་བྱེད་དེ། སེམས་ཅན་གང་གི་ལུས་ལ་རེག་པ་དེ་དག་ཐམས་ཅད་བདེ་བ་ཐོབ་པར་བྱེད་པ་དང་། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་སུམ་དུ་བྱེད་པར་འགྱུར་རོ། །བློ་གྲོས་འཕགས་པ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་ངའི་བསྟན་པ་ལ་ནན་ཏན་གྱིས་སྒྲུབ་པར་བྱེད་པ་དེ་དག་ནི་ཡོན་ཏན་ཁྱད་པར་དུ་འཕགས་པ་དེ་ལྟ་བུ་དག་འཐོབ་པར་འགྱུར་ཏེ། གལ་ཏེ་ངས་ཡོངས་སུ་རྫོགས་པར་བརྗོད་པར་གྱུར་ན་ནམས་ཀྱང་མཐར་ཐུག་པར་མི་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་འཕགས་པ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་འཕགས་པ་གང་དག་བྱང་ཆུབ་སེམས་དཔའི་ལམ་འདི་ལ་གནས་པ་དེ་དག་གིས་ནི་རྣམ་པར་དག་པའི་ཆོས་ཟབ་མོ་འདི་ནན་ཏན་གྱིས་མངོན་པར་བསྒྲུབས་ནས་སྟོང་པ་ཉིད་དང་རྗེས་སུ་འཐུན་པ་དང་། རབ་ཏུ་དབེན་པ་དང་རྗེས་སུ་འཐུན་པར་གྱུར་ན་ཆོས་ཀྱི་སྣང་བ་རབ་ཏུ་འཐོབ་པར་འགྱུར་རོ། །ཆོས་ཀྱི་སྣང་བའི་དབང་གིས་ནི་ཆོས་ཐམས་ཅད་ཀྱི་ངོ་བོ་ཉིད་ཐ་དད་པ་མེད་པ་མཐོང་བར་འགྱུར་རོ། །ངོ་བོ་ཉིད་ཐ་དད་པ་མེད་པ་མཐོང་བའི་ཕྱིར་ནི་ལྟ་བ་རྣམ་པར་དག་པར་འགྱུར་རོ། །ལྟ་བ་རྣམ་པར་དག་པའི་ཕྱིར་ནི་ཆོས་སུ་ལྟ་བ་ཡང་མེད་ལ། ཆོས་གང་ཡང་རང་བཞིན་དང་བྲལ་བར་ལྟ་བ་ཡང་མེད་དོ། །ཆོས་སུ་ལྟ་བ་རྣམ་པར་དག་པས་རྣམ་པར་དག་པ་ཡང་མེད་དོ། །རྣམ་པར་དག་པ་ཡང་མེད་པ་གང་ཡིན་པ་དེ་ལ་ནི་རྣམ་པར་དག་པའི་ལུས་ཀྱང་མེད་པས་རྣམ་པར་དག་པའི་ཡེ་ཤེས་ཀྱི་སྤྱོད་ཡུལ་ཐོབ་ནས་ཆོས་ཀྱི་དབྱིངས་རྣམས་དབྱིངས་ཀྱང་མ་ཡིན། དབྱིངས་མ་ཡིན་པ་ཡང་མ་ཡིན་པར་ཡང་ཡང་དག་པར་འཐོབ་པར་འགྱུར་རོ།