Degé Kangyur volume 40, F.133.a

བ་གང་ཡིན་པ་ཡི་གེ་ཨ་ཞེས་བྱ་བ་སྔོན་དུ་འགྲོ་བས་མ་རིག་པ་ཉེ་བར་ཞི་བར་བྱེད་དོ། །​གནས་པར་བྱ་བ་ཅི་ཡང་མེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མཚན་མ་མེད་པའི་ཕྱག་རྒྱའི་སྒོར་འཇུག་པར་བྱའོ། །ཡི་གེ་ཨི་ཞེས་བྱ་བའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ནས་ལས་ཀྱི་རྣམ་པར་སྨིན་པའི་འབྲས་བུ་དང་། ལས་ཀྱི་བྱ་བ་དང་། ལས་དང་། འབྲས་བུ་དང་། ཚོགས་པ་རྣམས་འགྲུབ་པར་བྱེད་པ་དང་། ལས་དང་འབྲས་བུ་དང་། ཚོགས་པ་དང་། རྐྱེན་རབ་ཏུ་རྟོགས་པར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལས་མེད་པ་དང་། འབྲས་བུ་མེད་པ་དང་། ཚོགས་པ་མེད་པ་དང་། རྐྱེན་མེད་པའི་ཕྱག་རྒྱའི་སྒོར་འཇུག་པར་བྱའོ། །​འདི་ལྟར་འདུ་བྱེད་རྣམས་ཀྱི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ནས་ལས་རྣམ་པ་སྣ་ཚོགས་དང་། ལས་ཀྱི་བྱ་བ་སྣ་ཚོགས་དག་ལས་ཆོས་ཀྱི་ཡེ་ཤེས་ཀྱི་སྣང་བ་ཐམས་ཅད་རབ་ཏུ་སྐྱེད་པར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདུ་བྱེད་ཐམས་ཅད་ལ་ཐབས་མཁས་པའི་ཕྱག་རྒྱའི་སྒོར་འཇུག་པར་བྱའོ། །​འདི་ལྟར་ཡི་གེ་དྷ་ཞེས་བྱ་བའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ནས་ཡི་གེ་མཱ་ཞེས་བྱ་བས་མིང་དང་ཚིག་ཏུ་གདགས་པའི་གྲོགས་བྱས་པས་ཆོས་སྣ་ཚོགས་དང་མཚུངས་པར་ལྡན་པར་འགྱུར་བ་དང་། ཡི་གེ་དྷ་དང་མས་གྲོགས་བྱས་པར་རབ་ཏུ་རྟོགས་པར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདུས་པ་མེད་པ་དང་། གྲོགས་མེད་པ་དང་། མིང་མེད་པའི་ཕྱག་རྒྱའི་སྒོར་འཇུག་པར་བྱའོ། །​འདི་ལྟར་ཕྱག་རྒྱ་དཔག་ཏུ་མེད་པས་ཆོས་ཐམས་ཅད་ཕྱག་རྒྱས་བཏབ་པས་རྣམ་པར་རྟོག་པ་ཐམས་ཅད་མི་དམིགས་ཤིང་རྣམ་པར་རྟོག་པ་ཡོངས་སུ་སྤོང་བར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྣམ་པར་མི་རྟོག་པའི་ཕྱག་རྒྱའི་སྒོར་འཇུག་པར་བྱའོ། །​འདི་ལྟར་མཐའ་མེད་པའི་ཕྱག་རྒྱས་



The English translation of this folio by 84000 Translating the words of the Buddha can be found at:
https://read.84000.co/translation/toh51.html?part=UT22084-040-002-1022#UT22084-040-002-1022