མྱུར་དུ་ཐམས་ཅད་མཁྱེན་པ་ཞེས་བྱ་བའི་མིང་ཐོབ་ནས་བྱང་ཆུབ་ཀྱི་སྙིང་པོ་ལ་འདུག་པར་འགྱུར་བས་རྒྱལ་པོ་ཆེན་པོ་བཞི་གདུགས་ཐོགས་ནས་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པས་ལྷ་དང་མི་རྣམས་ལ་སྣང་བ་ཆེན་པོ་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་འགོད་པར་འགྱུར་རོ། །གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཐམས་ཅད་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་བརྩོན་འགྲུས་ཀྱིས་སྒྲུབ་པར་བྱེད་ན་ཆོས་ཐམས་ཅད་ཆོས་ཀྱི་དབྱིངས་དང་མཚུངས་པ་ཉིད་དུ་མཐོང་བར་འགྱུར་ཏེ། དེ་ལྟར་མཐོང་བའི་ཚེ་ཆོས་ཀྱི་དབྱིངས་ལ་ཡང་ཆོས་ཐམས་ཅད་དུ་མི་མཐོང་ལ། ཆོས་རྣམས་ལ་ཡང་ཆོས་ཀྱི་དབྱིངས་སུ་མི་མཐོང་བས་བརྩོན་འགྲུས་ཀྱིས་མངོན་པར་སྒྲུབ་པར་བྱེད་དོ། །ཆོས་ཐམས་ཅད་ཀྱི་ཁམས་འདུས་པ་ལ་ཐབས་མཁས་པས་ཆོས་ཐམས་ཅད་ཀྱི་ཁམས་ལ་ཡང་མངོན་པར་ཞེན་པ་ཡང་མེད་གཡོ་བ་ཡང་མེད་དོ། །ཆོས་ཐམས་ཅད་ཀྱི་ཁམས་འདུས་པ་ལ་ཐབས་མཁས་ཤིང་མངོན་པར་ཞེན་པ་ཡང་མེད། རྣམ་པར་རྟོག་པ་ཡང་མེད་པས་ཆོས་གཅིག་ཏུ་འདུས་པའི་ནང་དུ་ཆོས་ཐམས་ཅད་འདུས་པར་མཐོང་ལ། །ཆོས་ཐམས་ཅད་འདུས་པའི་ནང་དུ་ཆོས་གཅིག་འདུས་པར་མཐོང་ཡང་ཆོས་ཐམས་ཅད་འདུས་པས་ཆོས་གཅིག་འདུས་པ་ལ་སྟེན་པར་ཡང་མི་བྱེད་ལ། ཆོས་གཅིག་གི་འདུས་པས་ཀྱང་ཆོས་ཐམས་ཅད་ཀྱི་འདུས་པ་ལ་སྟེན་པར་ཡང་མི་བྱེད་དོ། །ཆོས་འདི་གཅིག་རབ་ཏུ་རྟོགས་པའི་ཕྱིར་ཡང་ཆོས་ཐམས་ཅད་རབ་ཏུ་རྟོགས་པར་འགྱུར་ལ། ཆོས་ཐམས་ཅད་རབ་ཏུ་རྟོགས་པའི་ཕྱིར་ཡང་ཆོས་འདི་གཅིག་ཤེས་པར་བྱ་བའི་གནས་རྣམས་རབ་ཏུ་རྟོགས་པར་འགྱུར་ཡང་ཆོས་རྣམས་ཀྱིས་ཆོས་ཐམས་ཅད་ལ་སྟེན་པར་མི་བྱེད་དོ། །ཉེ་བར་ལེན་པའི་ཕུང་པོ་རྣམས་འདུས་པ་རྟོགས་པར་ཁོང་དུ་ཆུད་པས་ཉེ་བར་ལེན་པའི་ཕུང་པོ་སྣ་ཚོགས་ཀྱི་ངོ་བོ་ཉིད་ཀྱི་མཚན་ཉིད་ལ་ཡང་འདུས་པ་ཡོད་པ་འམ། འདུས་པ་མེད་པར་མངོན་པར་ཞེན་པ་སྐྱེད་པར་མི་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དེ་ལྟར་སྤྱོད་པའི་ཚེ་ཆོས་གང་རྒྱུ་དང་། རྐྱེན་མང་པོ་འདུས་པ་ལས་སྐྱེ་བ་དང་། ཆོས་གང་རྒྱུ་དང་། རྐྱེན་མང་པོ་འདུས་པ་ལས་མངོན་པར་སྒྲུབ་པར་འགྱུར་བའི་ཆོས་དེ་དག་ཀྱང་རྟོགས་པར་ཁོང་དུ་ཆུད་དོ།