Degé Kangyur volume 40, F.127.b

མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །​དེ་ནས་དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོས་ཡང་འདི་སྐད་ཅེས་བཀའ་སྩལ་ཏོ། །​རིགས་ཀྱི་བུ་ཇི་ལྟར་ཁྱེད་གནས་པ་མེད་པས་གནས་མེད་པ་ལ་གནས་ནས་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་མཁས་པ་ལ་གནས་པ་དེ་བཞིན་དུ་རིགས་ཀྱི་བུ་ཆོས་ཐམས་ཅད་ཀྱང་དེ་བཞིན་ཏེ། དེ་བཞིན་གཤེགས་པ་འཇིག་རྟེན་པའི་རྗེས་སུ་འཐུན་པར་མཛད་པའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་བརྙེས་པར་སྟོན་པར་མཛད་དོ། །གལ་ཏེ་དེ་བཞིན་གཤེགས་པ་འཇིག་རྟེན་པའི་རྗེས་སུ་འཐུན་པར་མི་མཛད་ན་དེ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་མངོན་དུ་མཛད་པ་ཡང་མི་སྟོན་ཏོ། །​རིགས་ཀྱི་བུ་ཆོས་རྣམས་ལ་ནི་གནས་མེད་དོ། །​གནས་མེད་པ་ཡང་མ་ཡིན་ནོ། །​གནས་དང་གནས་མེད་པ་ཞེས་བྱ་བ་གང་ཡིན་པ་དེ་དག་ཐམས་ཅད་ནི་འཇིག་རྟེན་པའི་རྗེས་སུ་འབྲང་བའོ། །​འཇིག་རྟེན་པའི་རྗེས་སུ་འབྲང་བ་གང་ཡིན་པ་དེ་ལ་ནི་ཆོས་འགའ་ཙམ་ཡང་སྐྱེ་བར་བྱ་བ་འམ། ཁོང་དུ་ཆུད་པར་བྱ་བ་མེད་པས་དེའི་ཕྱིར་རིགས་ཀྱི་བུ་ནན་ཏན་བརྩོན་འགྲུས་བསྐྱེད་ནས་མྱུར་དུ་ཆོས་རྣམས་ལས་རྣམ་པར་གྲོལ་བ་འཐོབ་པར་བྱའོ། །​བྱང་ཆུབ་སེམས་དཔའ་དེ་གཉིས་དེ་བཞིན་གཤེགས་པ་དེ་ལས་ཆོས་དེ་ལྟ་བུ་ཐོས་པ་དང་། ནམ་མཁའ་ལ་འཕགས་ནས་ཚིགས་སུ་བཅད་དེ་དེ་བཞིན་གཤེགས་པ་ལ་མངོན་པར་བསྟོད་པ། །​ཆོས་ཀྱི་རྒྱལ་པོ་བསམ་མི་ཁྱབ། །​ངོ་མཚར་ཆོས་ནི་རབ་ཏུ་བརྙེས། །​ཐམས་ཅད་མཁྱེན་པ་རྐང་གཉིས་གཙོ། །​སངས་རྒྱས་ཆོས་ནི་བླ་ན་མེད། །​ཆོས་ཉིད་བླ་ན་མ་མཆིས་སླད། །​དེ་བཞིན་གཤེགས་དང་མཚུངས་མ་མཆིས། །​ཆོས་རྣམས་སྐྱེ་བ་མ་མཆིས་པས། །དེང་བདག་བཟོད་པ་འདི་ཐོབ་ལགས། །​བདག་ནི་རྟག་ཏུ་སྐྱེ་བ་དང་། །​སྐྱེ་བ་མ་མཆིས་རྟོག་མི་བགྱིད། །​དེ་བཞིན་རྣམ་མི་རྟོག་ལ་ཡང་། །​ཐམས་ཅད་བསམ་པར་མི་བགྱིད་དོ། །​ཆོས་རྒྱལ་ཐུབ་པ་ཆེན་པོ་སྟེ། །​ཡོན་ཏན་ཚིག་དང་རྟོག་སྤངས་པ། །​རྣམ་པར་དག་པའི་ཆོས་



The English translation of this folio by 84000 Translating the words of the Buddha can be found at:
https://read.84000.co/translation/toh51.html?part=UT22084-040-002-1011#UT22084-040-002-1011