།བློ་ལྡན་དག་ནི་ཐམས་ཅད་ཀུན། །རྟེན་པར་ཡང་ནི་མི་བྱེད་དོ། །བསྟན་མེད་དབྱིངས་ནི་གང་ཡིན་པ། །དེ་ནི་ཆོས་ཀྱི་དབྱིངས་ཤེས་བྱ། །གནས་པའི་གནས་ནི་མེད་པས་ན། །དེ་ནི་གནས་པ་ཞེས་བྱའོ། །ཆོས་ཀྱི་དབྱིངས་ལ་སྐྱེ་བ་མེད། །སྲོག་ཀྱང་མེད་ལ་རྒ་བའང་མེད། །འཆི་བ་མེད་ཅིང་བྱིང་བ་མེད། །ངེས་པར་འབྱུང་བའང་ཡོད་མ་ཡིན། །ཆོས་ཀྱི་དབྱིངས་ནི་བསམ་དཀའ་བས། །འོང་བ་མེད་ཅིང་འགྲོ་བ་མེད། །ཆོས་ཀྱི་དབྱིངས་ནི་ཕུང་པོ་མིན། །ཁམས་དང་སྐྱེ་མཆེད་ཀྱང་མ་ཡིན། །གནས་ཀྱང་སྤོང་བར་མི་བྱེད་པས། །གཡོ་བ་མེད་པར་གྱུར་པ་ཡིན། །ཆོས་ཀྱི་དབྱིངས་ཀྱི་དེ་བཞིན་ཉིད། །རང་བཞིན་དག་ནི་ཡོད་མ་ཡིན། །བྱང་ཆུབ་སེམས་དཔའ་ཐམས་ཅད་ཀྱིས། །ཆོས་ཀྱི་དབྱིངས་ནི་བསམ་དཀའ་བས། །དེ་ལྟར་ཁོང་དུ་ཆུད་གྱུར་ན། །ཆོས་ཀྱི་སྣང་བ་འཐོབ་པར་འགྱུར། །དེ་ཡི་དབང་གིས་བྱང་ཆུབ་ཀྱི། །སྙིང་པོར་ཡང་ནི་བགྲོད་པར་འགྱུར། །སངས་རྒྱས་རྣམས་ཀྱི་ཆོས་ལ་ཡང་། །ཐེ་ཚོམ་དག་ནི་མེད་པར་འགྱུར། །གཡོ་བ་དག་ནི་མེད་པར་ཡང་། །ཆོས་ཀྱི་སྣང་བ་དག་གིས་ཀྱང་། །སེམས་ཅན་དག་ནི་ཐམས་ཅད་ཀུན། །བདེ་བ་ཆེན་པོ་འཐོབ་པར་བྱེད། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཟབ་མོ་འདི་ལྟ་བུ་དག་ལ་ནན་ཏན་གྱིས་མངོན་པར་སྒྲུབ་པར་བྱེད་ན། །ཆོས་ཀྱི་སྣང་བ་དེ་ལྟ་བུ་འཐོབ་པར་འགྱུར་ཏེ། །ཤེས་རབ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ།། །།བམ་པོ་དྲུག་པ་སྟེ་ཐ་མ། །གཞན་ཡང་བློ་གྲོས་མཐའ་ཡས་ངས་མངོན་པར་དྲན་ཏེ། སྔོན་བསྐལ་པ་གྲངས་མེད་པ་གཉིས་འདས་པ་ན་དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ་བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཟླ་བའི་སྒྲོན་མའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ། བསྐལ་པའི་མིང་ནི་བདུད་རྩི་ཞེས་བྱའོ། །འཇིག་རྟེན་གྱི་ཁམས་ནི་ཡོངས་སུ་དག་པར་བྱེད་པ་ཞེས་བྱ་སྟེ།