རྨི་ལམ་ལྟ་བུ་དང་། གཟུགས་བརྙན་ལྟ་བུ་དང་། མིང་མེད་པ་དང་། འདུ་ཤེས་མེད་པར་བསྟན་པ་ཡིན་ནོ། །དེ་བས་ན་ཁྱེད་ཀྱིས་དེ་བཞིན་གཤེགས་པའི་རྗེས་སུ་བསླབ་པར་བྱ་སྟེ། དེ་བཞིན་གཤེགས་པ་དེ་ནི་ཡེ་ཤེས་ཐོགས་པ་མེད་པ་སྟོན་ཅིང་སེམས་ཅན་རྣམས་ཀྱི་དབང་པོ་མཆོག་དང་། མཆོག་མ་ཡིན་པ་མཁྱེན་པ་ལ་མཁས་པ་ཡིན། དེ་བཞིན་གཤེགས་པ་དེ་ནི་ཡེ་ཤེས་ཐོགས་པ་མེད་པ་སྟོན་ཅིང་ཤེས་པ་ཐམས་ཅད་ལ་མཁས་པ་ཡང་དག་པར་རབ་ཏུ་སྟོན་པ་ཡིན་པས་བྱང་ཆུབ་སེམས་དཔའ་འདི་དག་ལ་མངོན་པར་ཤེས་པ་སྒྲུབ་པའི་ལས་རྫི་བ་མེད་ཅིང་མི་མཉམ་པ་དང་མཉམ་པ་ཡང་སྟོན་པར་མཛད་དོ། །མངོན་པར་ཤེས་པ་སྒྲུབ་པའི་ལས་དེས་བྱང་ཆུབ་སེམས་དཔའ་མངོན་པར་ཤེས་པའི་སྒོའི་རྫུ་འཕྲུལ་ཡང་སྒྲུབ་པར་བྱེད། བདེན་པའི་བྱིན་གྱི་རླབས་ཀྱི་སྟོབས་ཀྱང་སྒྲུབ་པར་བྱེད་ཅིང་ཚུལ་ཁྲིམས་རྣམ་པར་དག་པའི་སྟོབས་བསྐྱེད་པ་ལ་ཡང་གནས། ཏིང་ངེ་འཛིན་དང་། ཤེས་རབ་རྣམ་པར་དག་པ་དང་། ཡེ་ཤེས་རྣམ་པར་དག་པའི་སྟོབས་བསྐྱེད་པ་ལ་ཡང་གནས། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བའི་སྟོབས་བསྐྱེད་པ་ལ་ཡང་གནས། གཏོང་བ་རྣམ་པར་དག་པའི་སྟོབས་བསྐྱེད་པ་ལ་ཡང་གནས། ཆོས་ཤེས་པའི་སྟོབས་བསྐྱེད་པ་ལ་ཡང་གནས་སོ། །བྱང་ཆུབ་སེམས་དཔའ་སྟོབས་བསྐྱེད་པ་འདི་ལ་གནས་ནས། བདེན་པའི་བྱིན་གྱི་བརླབས་ཀྱི་སྟོབས་བསྐྱེད་པ་ཡང་འཐོབ་པར་འགྱུར་ཞིང་དེས་ཀྱང་ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་སྒྱུར་བར་ཡང་འགྱུར། རྫུ་འཕྲུལ་གྱི་བྱ་བ་དུ་མ་ཡང་ཉམས་སུ་མྱོང་བར་འགྱུར། ཆོས་ཀྱི་རྔ་རྣམ་པ་དུ་མ་ཡང་བརྡུང་བར་འགྱུར། སེང་གེའི་ཁྲི་ལ་འདུག་ནས་འཁོར་རྣམས་ཀྱང་ཆོས་ཀྱིས་ཚིམ་པར་བྱེད་པར་འགྱུར། སེམས་ཅན་ཐམས་ཅད་ལ་ཡང་ཕན་པ་ཉེ་བར་སྒྲུབ་པས་གནས་པར་འགྱུར་རོ། །བཀོད་པ་མཐའ་ཡས་འདི་ལྟ་སྟེ་དཔེར་ན་རིའི་རྒྱལ་པོ་ཁོར་ཡུག་ཆེན་པོ་ནི་སེམས་ཅན་རྣམས་ཀྱིས་དམྱལ་བ་པའི་དྲི་ང་བ་མི་འཐུན་པ་ཚོར་བ་དང་། དམྱལ་བ་པའི་སྒྲ་ཐོས་པ་དང་། དམྱལ་བ་པ་མཐོང་ན་མི་རུང་བས་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པས་འཇིག་རྟེན་གྱི་ཁམས་འདི་ཁོར་ཡུག་ཏུ་བསྐོར་ནས་འདུག་གོ