Degé Kangyur volume 39, F.95.b

དེས་ན་མྱུར་དུ་མི་སྐྱེ་བའི་ཆོས་ལ་བཟོད་པ་ཡང་ཐོབ་པར་འགྱུར། སྤོབས་པ་ཕུན་སུམ་ཚོགས་པ་ཡང་ཀུན་ནས་འདྲེན་པར་ཡང་འགྱུར་རོ། །​དེ་ནས་བཅོམ་ལྡན་འདས་ཀྱིས་ཆོས་ཀྱི་སྒོ་བསྒྲུབ་པ་འདི་ཡང་དག་པར་བརྗོད་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །​མ་བྱུང་བ་ལས་ཆོས་འབྱུང་སྟེ། །​བྱུང་ནས་སོ་སོར་འབྲལ་བར་འགྱུར། །​བྱུང་ནས་འབྲལ་བའི་དོན་ཡིན་ན། །​འདི་ལ་གང་ཞིག་འཛིན་པར་འགྱུར། །​ཆོས་ཀུན་དངོས་པོ་མེད་པ་སྟེ། །​ཉོན་མོངས་མེད་ཅིང་ལེན་པ་མེད། །​གང་ལ་ཆོས་ཀྱང་མི་རྙེད་པ། །​དེ་དག་ཇི་ལྟར་ཀུན་ཏུ་འཛིན། །​ཆོས་ཀུན་ངོ་བོ་ཉིད་ཀྱིས་ནི། །​ཐོབ་པ་མེད་ཅེས་རློམ་པ་གང་། །​དེ་དག་མཚན་མ་སྤྱོད་པ་སྟེ། །​གཟུངས་འདི་ཐོབ་པར་མི་འགྱུར་རོ། །​དེ་ཡི་ཕྱིར་ན་ཆོས་རྣམས་ཀུན། །​ནམ་མཁའ་ལྟ་བུར་རབ་ཏུ་གསལ། །​ནམ་མཁའ་དག་ནི་རབ་གསལ་བ། །​དེ་དག་གཉི་ག་ཡོད་མ་ཡིན། །ཆོས་འདི་ཐམས་ཅད་ཡོད་མིན་ཞིང་། །​མེད་པ་དང་ཡང་བྲལ་བ་ཡིན། །​གང་གིས་དེ་ལྟར་ཆོས་ཤེས་པ། །​དེ་དག་ལ་ནི་གཟུངས་སྐྱེའོ། །​གང་ཞིག་མཐའ་མེད་རྗེས་རྟོགས་ཤིང་། །​དབུས་སུའང་རློམ་པར་མི་བྱེད་པ། །​དེ་དག་རློམ་སེམས་བྲལ་བ་སྟེ། །​ཆོས་རྣམས་ཐམས་ཅད་མེད་པར་བཤད། །​གང་ལ་སྙིང་པོ་མི་རྙེད་པ། །​དེ་ལ་སྙིང་པོ་ཡོད་མིན་ན། །​ཆོས་རྣམས་ཐམས་ཅད་ཇི་ལྟ་བུར། །​ཡང་དག་ཚུལ་གྱིས་ཀུན་ཏུ་འཛིན། །​དེ་ལྟར་ཆོས་རྣམས་རང་བཞིན་གྱིས། །​ཉོན་མོངས་མེད་པར་ཤེས་པ་གང་། །​དེ་དག་རྣམས་ལ་མདོར་ན་འདིར། །​རྣམ་པར་དག་པའི་གཟུངས་སུ་འགྱུར། །​གང་ཞིག་ཆོས་ཀུན་མཁའ་འདྲ་ཞིང་། །​རྟག་ཏུ་བར་སྣང་ལྟ་བུར་ཡང་། །​ཤེས་རབ་ཀྱིས་ནི་ངེས་རྟོགས་པ། །​དེ་ལ་གཟུངས་ཀུན་སྐྱེ་བར་འགྱུར། །​ཆོས་རྣམས་ཐམས་ཅད་མ་སྐྱེས་ཤིང་། །མ་བྱུང་ཉོན་མོངས་མེད་པ་ཡིན། །​ཉོན་མོངས་མེད་ཅིང་ལེན་མེད་པ། །​འདིར་ནི་ཇི་ལྟར་ཀུན་ཏུ་འཛིན། །​ཆོས་ཀུན་ངོ་བོ་ཉིད་ཀྱིས་ནི། །​སྤྲོས་པ་མེད་ཅིང་མཚན་ཉིད་མེད། །​ཆོས་ཀུན་མཚན་ཉིད་བྲལ་བས་ན། །​ཉོན་མོངས་མེད་པར་བཤད་པ་ཡིན། །​གང་གིས་དེ་ལྟར་ཆོས་ཤེས་ཤིང་།