སྣ་རྩེར་གནས་ཉིད་ལྟ་སྟངས་ཀྱིས། །རེངས་པ་ཉིད་ཀྱིས་རེངས་པ་ཅན། །ནས་ཀྱི་མེ་ཏོག་ཀུ་མ་བྷ་ཀ། །སྣ་ཧཱི་པྲྀཀྵ་པཱུར་ཀ། །རླན་བཅས་ཤིང་ནི་རེ་ཙ་ཀ། །མིག་དེ་ཡང་ནི་སྟམ་བྷ་ག། །ཀུན་གྱི་ལྟ་སྟངས་ངེས་སྦྱོར་ལས། །ཟླ་བ་དྲུག་ཏུ་བསམ་པར་བྱ། །ཀུན་གྱི་ནུས་པ་དང་ལྡན་པར། །སེམས་ནི་འགོག་པས་འགྲུབ་པར་འགྱུར། །སེམས་ནི་འགགས་པས་རླུང་འགག་གོ། །རླུང་འགགས་པས་ཀྱང་སེམས་ཀྱང་འགག །ཕན་ཚུན་འགག་པར་འགྱུར་བ་ཡི། །གནས་ལ་སེམས་ནི་གནས་པའོ། །རྡོ་རྗེ་པདྨ་མཉམ་སྦྱོར་བས། །ཐབས་དང་ཤེས་རབ་གཅིག་ཏུ་སྦྱོར། །འགོག་པའི་བདེ་ལ་ལོངས་སྤྱོད་པས། །ཁྱབ་བདག་མི་གཡོ་དེ་འགྲུབ་བོ། །རྡོ་རྗེ་སེམས་སོགས་སངས་རྒྱས་རྣམས། །སྔགས་པ་དེ་ཡི་ལྷན་ཅིག་ན། །བདེ་བྱེད་ལ་སོགས་གྲགས་པ་ཡི། །འཇིག་རྟེན་ལྷ་རྣམས་སྨོས་ཅི་དགོས། །རྒྱུད་རྣམས་ཀུན་དུ་རབ་སྦས་པ། །བདག་གིས་དེ་ཉིད་མི་གཡོ་གཙོ། །གང་ཞིག་དེ་ཉིད་བརྟེན་བྱས་པས། །ནམ་མཁའ་ལྟ་བུའི་སངས་རྒྱས་གྱུར། །གང་གཱའི་བྱེ་མ་དང་མཚུངས་པའི། །ཆེན་པོ་རྣམས་ནི་འབྱུང་བར་འགྱུར། །དེ་ལྟར་གྱི་ཡང་རྣམ་སངས་རྒྱས། །སངས་རྒྱས་ཡེ་ཤེས་དང་ལྡན་ཉིད། །དེ་ཕྱིར་རྟག་ཏུ་རྣལ་འབྱོར་པས། །ཁྱབ་བདག་མི་གཡོ་བསམ་པར་བྱ། །གང་ཞིག་མི་གཡོ་མི་ཤེས་པ། །དེ་ཡི་སྐྱེ་བ་འབྲས་མེད་ཡིན། །དེ་ཉིད་མེད་ལ་དངོས་གྲུབ་ནི། །ཕྲ་མོ་ཙམ་ཡང་ཐོབ་པ་མེད། །ཞེས་པ་ནི་དཔའ་བོ་གཅིག་པ་ཉིད་དུ་གསུངས་པའི་དཔལ་གཏུམ་པོ་ཁྲོ་བོ་ཆེན་པོའི་རྒྱུད་ལས་རླུང་གི་རྣལ་འབྱོར་གྱི་རིམ་པར་ཕྱེ་བ་སྟེ་ཉི་ཤུ་རྩ་གཉིས་པའོ།། །།དེ་ནས་བཅོམ་ལྡན་འདས་ཀྱིས་བཀའ་སྩལ་པ། རྐང་མཐིལ་ལྟེ་བར་འབུགས་བྱེད་ན། །ཞག་གསུམ་ནས་ནི་འཆི་བར་འགྱུར། །རྐང་པའི་མཐིལ་དུ་འབུགས་པ་དང་། །མིག་ཏུ་ཟུག་རྔུས་ཟླ་གསུམ་ན། །རྐང་པའི་མཐིལ་དུ་འབུགས་པ་དང་། །སྣ་ཡི་ཟུག་རྔུས་ཟླ་གསུམ་ན། །བཤང་བ་འཛག་པའི་དུས་སུ་ནི། །སྦྲིད་པ་མཉམ་བྱུང་ཟླ་བ་ན། །ལྟེ་བ་དང་ལྟོ་བའི་ཟུག་ཇུ་ཡིས་ལོ་ལྡནའོ། །མཛོད་སྤུའི་ཟུག་རྔུ་ཡིས་ཉི་མ་གཅིག་ནའོ། །ལྕེ་ཡི་རྩེ་མོ་མ་མཐོང་ན་ཟླ་བ་ཕྱེད་ནའོ། །སྣའི་རྩེ་མོའི་ཟུག་རྔུ་ཡིས་ཟླ་བ་བཞིན་བོ། །འཁྲིག་པའི་དུས་ཀྱི་སྦྲིད་པ་ཡིས་ཟླ་བ་ནའོ། །མཐེའུ་ཆུང་ཐམས་ཅད་མཉམ་དུ་ཟུག་རྔུར་གྱུར་ན་ཟླ་བ་ནའོ། །མཉམ་དུ་སྙིང་ག་དང་མགྲིན་པར་ཟུག་རྔུར་གྱུར་ན་ཟླ་བ་ཕྱེད་པ་གསུམ་ནའོ། །མཉམ་དུ་ཏཱ་ལུ་ཀ་གསུམ་དུ་ཟུག་རྔུར་གྱུར་ན་ཉི་མ་གསུམ་ནའོ།