Degé Kangyur volume 80, F.316.a

མ་ཁྱོད་གཟུགས་རྣལ་འབྱོར་པས། །​ཇི་ལྟ་བུར་ན་ཤེས་པར་བྱ། །​བཅོམ་ལྡན་འདས་མར་གུས་བྱ་བ། །​རྣལ་འབྱོར་པ་ཡིས་གང་ལ་བྱ། །​དེ་ནས་བཅོམ་ལྡན་འདས་མས་བཀའ་སྩལ་པ། ང་ནི་འཇིག་རྟེན་གསུམ་པོ་ན། །​མཐོ་དང་དམའ་བའི་གཟུགས་གྱུར་པ། །​བུད་མེད་གཟུགས་དེ་ལ་ནི་འདོད། །​ཇི་སྲིད་འཇིག་རྟེན་གྱིས་མི་མཐོང་། །​ལྷ་མོ་ལྷ་མིན་མོ་དང་ནི། །​དེ་བཞིན་གནོད་སྦྱིན་སྲིན་མོ་དང་། །​ཀླུ་མོ་འབྱུང་མོ་མི་ཅི་མོ། །​དེ་བཞིན་མི་ཡི་བུ་མོ་དང་། །​དྲི་ཟ་མོ་དང་དམྱལ་བ་མོ། །​དུད་འགྲོའི་བུ་མོ་ཡི་དགས་མོ། །​ཚངས་མ་རྒྱལ་རིགས་རྗེ་རིགས་མོ། །​དམངས་རིགས་མོ་སྟེ་ཤིན་ཏུ་མང་། །​ཡིག་མཁན་མ་དང་རྒྱལ་མོ་དང་། །​གཙོ་མོ་ཀ་ལ་ཨུཏྟི་ནི། །​ཆོད་མོ་སྐྱེད་མོས་ཚལ་མོ་དང་། །​སྨད་འཚོང་མ་དང་ཚོས་མཁན་མ། །​ཀོ་ལྤགས་སྣོད་མཁན་ཤ་བ་རི། །​ཧཱ་ཌི་ཌོསྦི་ཙཎྜ་ལཱི། །​ཁྲུས་མ་ཆང་མ་ལ་དུ་མཁན། །​ལྕགས་མགར་འདྲེག་མཁན་གར་མ་དང་། །​ཁར་བ་མོ་དང་གསེར་མགར་མ། །​ཉ་པ་མོ་དང་ཤན་པ་མོ། །​སྲུབ་མ་མཁན་དང་མེ་ཏོག་མ། །​ཐོད་པ་ཅན་མ་དུང་མཁན་མ། །​གདུགས་མཁན་མ་དང་ཁང་མཁན་མ། །​བ་ལང་སོང་དང་མདའ་མཁན་མ། །​ཕྲུ་ཀློག་རྡོ་མཁན་མ་དང་ནི། །ཤིང་མཁན་རྒྱན་ཆ་མཁན་མོ་དང་། །​རིགས་རྣམས་ཀུན་ལ་རབ་ཏུ་འཇུག །​མ་དང་སྲིང་མོ་ཆུང་མ་དང་། །​ཨ་ནེ་དང་ནི་ཚ་མོ་དང་། །​ཁ་ཊྚི་ཀ་དང་སྒྱུག་མོ་དང་། །​གཞན་ཡང་གཉེན་འདབ་མ་ཀུན་དང་། །​བརྟུལ་ཞུགས་ཅན་དང་རྣལ་འབྱོར་མ། །​ཡུགས་ས་མོ་དང་དཀའ་ཐུབ་མ། །ཞེས་སོགས་མང་པོ་ཀུན་ལ་ནི། །​ང་ནི་བུད་མེད་གཟུགས་གྱུར་ནས། །​སེམས་ཅན་ཀུན་གྱི་དོན་ཕྱིར་གནས། །​རང་རང་ཚུལ་དུ་ངེས་པ་ཡིས། །​དེ་རྣམས་ཇི་ལྟར་རྙེད་པ་ཉིད། །​འོ་དད་འཁྱུད་པ་ལ་སོགས་ཀྱིས། །​རྡོ་རྗེ་པདྨ་མཉམ་སྦྱོར་བ། །​རྣལ་འབྱོར་རྣམས་ཀྱིས་བསྟེན་པར་བྱ། །​སེམས་ཅན་ཀུན་ལ་ཕན་འདོད་པས། །​མི་མོ་བསྟེན་པས་དངོས་གྲུབ་པོ། །​སྐད་ཅིག་ཙམ་གྱིས་སྟེར་བྱེད་པ། །​དེ་ཕྱིར་བུད་མེད་བསྟེན་པར་བྱ། །​བུད་མེད་མཐོ་རིས་བུད་མེད་ཆོས། །​བུད་མེད་དེ་ཉིད་དཀའ་ཐུབ་མཆོག །​སངས་རྒྱས་བུད་མེད་དགེ་འདུན་ཉིད། །​བུད་



The English translation of this folio by 84000 Translating the words of the Buddha can be found at:
https://read.84000.co/translation/toh431.html?part=UT22084-080-015-2602#UT22084-080-015-2602