།སོར་བཞི་རྟ་མགྲིན་གནས་ཡིན་ཏེ། །སོར་བརྒྱད་གསང་བ་བདེ་སྐྱོང་གནས། །རྣལ་འབྱོར་ཕ་དང་རྣལ་འབྱོར་མའི། །ལུས་ཀྱི་རྟེན་གྱི་བྱེ་བྲག་ལས། །སོར་མོ་བཞི་བཅུ་བརྒྱད་ཉིད་ལས། །བརྒྱད་ནི་གསང་བའི་འཁོར་ལོའི་གནས། །བཞི་བཅུ་ལ་ནི་འཁོར་ལོ་གཞན། །བླ་མའི་ཞལ་ནས་ཤེས་པར་བྱ། །ཐམས་ཅད་སྒལ་ཚིགས་དབྱུག་གུ་སྟེ། །ཕྱི་དང་ནང་དུ་མཁས་པས་བརྟག །འཁོར་ལོ་ལ་ཡང་རྣམ་པ་གཉིས། །དང་པོར་འཁོར་ལོ་གཉིས་པ་རྩ། །རྐྱེན་དང་གསང་བ་རང་བཞིན་དང་། །དབང་དང་རྣམ་པ་བཞི་རུ་གསུངས། །རྐྱེན་ལ་གཉིས་ཏེ་གསང་བ་བཞི། །རང་བཞིན་བཅུ་དྲུག་དབང་ནི་གཉིས། །ཙཎྜ་ལཱི་ནི་ཉི་ཤུ་བཞི། །འཁོར་ལོ་བཞི་རུ་སྦས་པ་སྟེ། །བླ་མ་ཚོགས་ནང་མཐོང་ན་རྒྱབ་ཀྱིས་ཕྱོགས། །མན་ངག་གཞན་དུ་སྤེལ་ཞིང་འཕྱར་ལ་དགའ། །འདོད་ཆགས་སྤྱོད་ཕྱིར་སྦས་པའི་རིམ་པ་ནོད། །གབ་པའི་དོན་ལ་རྒྱབ་ཕྱོགས་སྐུར་པ་འདེབས། །གསང་སྔགས་བར་གཅོད་རྣལ་འབྱོར་གཞན་ལ་གཤེ། །འདི་ནི་མནར་མེད་སེམས་དམྱལ་ཆེན་པོར་སྐྱེ། །སངས་རྒྱས་སྟོང་རྩ་གཅིག་རྫོགས་ཚེ་ཡི་ཚད། །འདི་ལ་སྦས་ཀྱི་ཐམས་ཅད་ལ། །ང་ཡིས་སྦ་བར་མ་གསུངས་ཏེ། །དེ་ཕྱིར་རྒྱུད་གཞན་དུ་ནི་སྦས། །རྒྱུད་འདིར་ང་ཡིས་རྒྱས་པར་བཤད། །སུམ་ཅུ་རྩ་གཉིས་གཡས་གཡོན་ཆ། །དྲུག་ཅུ་རྩ་བཞི་གྲངས་སུ་སྦས། །སུམ་ཅུ་རྩ་གཉིས་ལས་ནི་ཟུང་། །བཅུ་དྲུག་གྲངས་སུ་སྦས་པ་ཡིན། །སུམ་ཅུ་རྩ་གཉིས་ཕྱོགས་དང་མཚམས། །བརྒྱད་ཀྱི་གྲངས་སུ་སྦས་པའོ། །སྤྱི་གཙུག་འཁོར་ལོ་སྤྱི་བོར་སྦས། །གསང་བ་བདེ་སྐྱོང་ལྟེ་བར་སྦས། །བཅུ་དྲུག་ལས་ནི་ཟུང་འགྱུར་བ། །བརྒྱད་ཀྱི་གྲངས་སུ་སྦས་པ་ཡིན། །བཅུ་དྲུག་ལས་ནི་གཡས་གཡོན་ཆ། །སུམ་ཅུ་རྩ་གཉིས་གྲངས་སུ་སྦས། །བཅུ་དྲུག་ལས་ནི་བཞི་བཞིར་འགྱུར། །དྲུག་ཅུ་རྩ་བཞིའི་གྲངས་སུ་སྦས། །མགྲིན་པ་ལོངས་སྤྱོད་འཁོར་ལོ་རུ། །རོ་དྲུག་ལ་ནི་ལོངས་སྤྱོད་པས། །རོ་མ་ལོངས་སྤྱོད་འཁོར་ལོར་སྦས། །རྟ་མགྲིན་འཁོར་ལོ་མགྲིན་པར་སྦས། །