Degé Kangyur volume 79, F.80.b

རྣམས་ནི་ཡིད་ཆེས་འགྱུར། །​མཚོན་པ་འདི་ནི་འབྲས་བུར་གྱུར། །​ཁམས་གསུམ་དུ་ནི་དྲི་མེད་སྣང་། །​གང་དང་གང་གིས་གནས་གྱུར་པ། །​དེ་ནི་དེ་ཡི་ངོ་བོ་ཅན། །​བུད་ཤིང་བསྲེགས་པའི་རིགས་པས་ནི། །​དགྱེས་པའི་རྒྱལ་བ་གར་མཁན་མཆོག །​ཕུང་པོ་ཁམས་དང་སྐྱེ་མཆེད་རྣམས། །​འདི་ཉིད་རྣམ་དག་མཚོན་པ་འདི། །​ཇི་ལྟར་དགྲ་བོ་ནུས་པ་ལ། །​དགྲ་བོ་ནུས་པས་དེ་བསྣུན་པ། །​གཏི་མུག་དག་པས་གཏི་མུག་སྟེ། །​ཞེ་སྡང་དག་པས་ཞེ་སྡང་ཉིད། །​འདོད་ཆགས་དག་པས་འདོད་ཆགས་ཏེ། །​ང་རྒྱལ་རྣམ་དག་ང་རྒྱལ་ཆེ། །​ཕྲག་དོག་དག་པས་ཕྲག་དོག་ཉིད། །​ཐམས་ཅད་རྣམ་དག་རྡོར་འཛིན་མགོན། །​དེ་ཡི་ངོ་བོ་རྣམ་དག་པ། །​ཉོན་མོངས་ལྔ་ནི་མཉམ་པར་འགྱུར། །​དེ་ལྟར་རིགས་ནི་ལྔ་རྣམས་དང་། །​ཡེ་ཤེས་ལྔ་དང་སངས་རྒྱས་ལྔ། །​འདི་ལས་རྡོ་རྗེ་སྙིང་པོ་དང་། །​ཁྲོ་བོ་ཁམས་གསུམ་སེམས་ཅན་སྐྱེ། །​ནང་གི་དབྱེ་བ་འདི་ཉིད་ནི། །​བླ་མའི་ཞལ་ལས་རྙེད་པར་འགྱུར། །​བླ་མ་དམན་པའི་སེམས་ཅན་རྣམས། །​སྔགས་དང་ཕྱག་རྒྱ་རྙེད་མི་འགྱུར། །​གང་ཞིག་ཤིན་ཏུ་གསལ་བས་ནི། །​འཛམ་གླིང་དེ་འདིར་སངས་རྒྱས་བསྔགས། །​གྲུ་གསུམ་དག་པ་ཨེ་ཡི་དབྱིབས། །​དབུས་སུ་དགྱེས་པའི་ཨེ་བྃ་ཡིན། །​གྲུ་གསུམ་དཀྱིལ་འཁོར་ཉམས་དགའ་བར། །​རྡོ་རྗེ་ར་ལི་རྣམ་པར་བྱུང་། །​བཙུན་མོའི་བྷ་ག་ཞེས་ཀྱང་བྱ། །​ཆོས་ཀྱི་འབྱུང་གནས་ཞེས་བྱར་བཤད། །​དེ་ཡི་ནང་སོང་པདྨ་ནི། །​འདབ་མ་བརྒྱད་པ་སྙིང་པོར་བཅས། །​དེ་ལ་ཨ་ལི་ཀ་ལི་འདྲེས། །​སྡེ་ཚན་བརྒྱད་ནི་རྣམ་པར་གནས། །​སྔགས་ཀྱི་གཟུགས་ཀྱིས་ལུས་ཅན་གྱི། །​ལས་ཀྱི་ཚོགས་ནི་བྱེད་པར་འགྱུར། །​ཡི་གེ་རྣམས་ནི་ལྔ་བཅུ་ཉིད། །​རིག་བྱེད་རྣམས་ལ་ཉེ་བར་གནས། །​སྔགས་རྣམས་ཉིད་དང་རྒྱུད་རྣམས་དང་། །​ཕྱི་རོལ་ཚུལ་གྱི་བསྟན་བཅོས་ཀྱི། །​རྡོ་རྗེ་སྙིང་པོའི་རང་བཞིན་འདི། །​གཞན་དུ་འདི་ལས་ཅུང་ཟད་མེད། །​ཨ་ཀ་ཙ་ཊ་ཏ་པ་ཡ་ཤ། །​སྡེ་ཚན་དགའ་བ་ལྔ་བཅུ་ཡང་། །​མཉམ་པ་དག་ཏུ་སྤྲུལ་པ་རྣམས། །​རྡོ་རྗེ་ར་ལི་པདྨར་སོན། །​འདབ་མ་བརྒྱད་པོ་ཕྱོགས་རྣམས་དང་། །​མཚམས་རྣམས་སུ་ནི་འདི་རྣམས་རིགས། །​དེ་རྣམས་དབུས་སུ་ཟེ་



The English translation of this folio by 84000 Translating the words of the Buddha can be found at:
https://read.84000.co/translation/toh381.html?part=UT22084-079-008-9015#UT22084-079-008-9015